ប្រទេសស៊ីរី ៖ ចាប់តាំងពី២ខែមកហើយ កងទ័ពស៊ីរី និងរុស្ស៊ីបានវាយប្រហារពិសេសតាមជើងអាកាសលើខេត្តអុីដលីបស៊ីរីកាន់កាប់ដោយបណ្ដាក្រុមឧទ្ទាមនិងពួកជីហាដ។ ក្នុងរយៈពេល២ខែនៃការវាយលុករបស់កងកម្លាំងរុស្ស៊ី និងស៊ីរីលើ ខេត្តអុីដលីប ជាទីតាំងធំចុងក្រោយកាន់កាប់ដោយបណ្ដាក្រុមឧទ្ទាម ដែលចាប់តាំងពីខែមករាមកធ្លាក់ក្នុងដៃពួកជីហាដ ក្រុមHAYAT TAHRIR AL CHAMអតីតសាខាអាល់កៃដានៅស៊ីរី បណ្ដាលឲ្យជនស៊ីវិលស្លាប់យ៉ាងតិច៥៤៤នាក់និង២.១១៧នាក់រងរបួស។
ចាប់ពីថ្ងៃទី២៦មេសាមកកងទ័ពរុស្ស៊ី បានចូលរួមជាមួយកងទ័ពស៊ីរី ដើម្បីបើកការវាយលុកកាន់តែធំប្រឆាំងភាគពាយ័ព្យស៊ីរី។ អង្គការសិទ្ធិមនុស្សស៊ីរីOSDH មានប្រភពព័ត៌មានច្រើនក្នុងប្រទេស ដែលតែងចេញផ្សាយជាប់ជាប្រចាំរបាយការណ៍ពីជនរងគ្រោះក្នុងជម្លោះនៅស៊ីរីថ្លែងថា ក្នុងចំណោមជនស៊ីវិលទាំង៥៤៤នាក់ដែលស្លាប់ក្នុងការវាយលុកនានា មានកុមារ១៣០នាក់។
អង្គការនោះមានមូលដ្ឋាននៅអង់គ្លេសនិយាយថា កងទ័ពរុស្ស៊ី និងស៊ីរីតែងវាយប្រហារលើបណ្ដាជនស៊ីវិល។ ប៉ុន្តែកងទ័ពរុស្ស៊ីក៏ដូចជាកងទ័ពស៊ីរីដែរ បានបដិសេធថាកងយន្តហោះរបស់ពួកគេ ពុំបានវាយប្រហារទាំងងងឹតងងុលលើបណ្ដាជនស៊ីវិលឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ