រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ជម្រាបជូនប្រជាពលរដ្ឋនៅទូទាំងប្រទេសឱ្យជ្រាបថា កាលពីមុនធ្លាប់ធ្វើដំណើរទៅព្យាបាលជំងឺនៅមន្ទីរពេទ្យជោរៃ នៅទីក្រុងហូជីមិញ ឥឡូវសូមមករកការព្យាបាលនៅមន្ទីរពេទ្យជោរៃនៅរាជធានីភ្នំពេញ ដែលស្ថិតនៅក្នុងខណ្ឌច្បារអំពៅ រាជធានីភ្នំពេញតាមបណ្តោយផ្លូវជាតិលេខ១ ។
សម្តេចតេជោនាយករដ្ឋមន្ត្រីបានមានប្រសាសន៍ជម្រាបប្រជាពលរដ្ឋនៅទូទាំងប្រទេសបែបនេះ នាព្រឹកថ្ងៃទី១៣ មករា ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ជាមួយលោកង្វៀន តាន់យ៉ុង នាយករដ្ឋមន្ត្រីនៃសាធារណរដ្ឋសង្គមនិយមវៀតណាម ប្រារព្ធពិធីសម្ពោធដាក់ឱ្យប្រើប្រាស់ជាផ្លូវការមន្ទីរពេទ្យជោរៃ-ភ្នំពេញ ដែលស្ថិតនៅតាមបណ្តោយផ្លូវជាតិលេខ១ ក្នុងភូមិតាង៉ូវ សង្កាត់និរោធ ខណ្ឌមានជ័យ ។ មន្ទីរពេទ្យជោរៃ-ភ្នំពេញ គឺជាសមិទ្ធផលដ៏ធំធេងប្រសូតចេញពីគំនិតផ្តួចផ្តើមរបស់ប្រមុខដឹកនាំនៃប្រទេសទាំងពីរ ក្រោមកិច្ចសហប្រតិបត្តិការយ៉ាងជិតស្និទ្ធរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋសង្គមនិយមវៀតណាម ។ សម្តេចតេជោនាយករដ្ឋមន្ត្រីមានប្រសាសន៍បន្តថាដោយសាររាជធានីភ្នំពេញកាលពីមុនមានទំហំត្រឹមតែ៣០០គីឡូការ៉េតែប៉ុណ្ណោះ ប៉ុន្តែដោយសាររាជធានីភ្នំពេញរីកចម្រើន ឥឡូវនេះទីក្រុងភ្នំពេញមានវិសាលភាពរហូតទៅដល់៧០០គីឡូម៉ែត្រការ៉េ គឺមានកំណើនមួយជាពីរ ដែលការប្រើប្រាស់ចរន្តអគ្គិសនីមានត្រឹមតែ៣០មេហ្គាវ៉ាត់ ឥឡូវនេះទីក្រុងភ្នំពេញប្រើប្រាស់អគ្គិសនីជិត៥០០មេហ្គាវ៉ាត់ ។ ដូច្នេះស្ថានភាពនេះគឺការកសាងមន្ទីរពេទ្យជោរៃ នៅកន្លែងនេះគឺពិតជាត្រឹមត្រូវហើយ សមស្របទៅតាមភូមិសាស្ត្រនៃរាជធានីភ្នំពេញ ហើយមន្ទីរពេទ្យនេះមិនគ្រាន់តែទទួលអ្នកជំងឺនៅរាជធានីភ្នំពេញទេ គឺទទួលអ្នកជំងឺពីកន្លែងដទៃៗទៀត រាប់ទាំងជនបរទេសដែលកំពុង
ធ្វើការនៅក្នុងព្រះរាជាណាចក្រកម្ពុជារា៉ប់ម៉ឺននាក់រាប់ទាំងភ្ញៀវទេសចរ ដែលមកទស្សនានៅព្រះរាជាណាចក្រកម្ពុជាផងដែរ ។
យើងត្រូវការឱ្យមានមន្ទីរពេទ្យដែលមានស្តង់ដារកម្រិតខ្ពស់ឆ្លើយតបទៅនឹងតម្រូវការនៃអ្នកជំងឺ ដែលកាលពីមុនអ្នកជំងឺយកទៅកាន់ប្រទេសវៀតណាម នៅពេលបញ្ជូនអ្នកជំងឺម្តងៗមានការលំបាកណាស់ជួនកាលផ្សងព្រេងនឹងគ្រោះថ្នាក់ដូចជាជំងឺដាច់សរសៃឈាមជាដើមដែលត្រូវសង្គ្រោះបន្ទាន់មានការលំបាក ។ សម្តេចតេជោនាយករដ្ឋមន្ត្រីមានប្រសាសន៍បញ្ជាក់ថា ជោរៃ ថ្ងៃនេះបានកើតជារូបរាងទោះបីថាដំណាក់កាលទី១ ទើបនឹងចាប់ផ្តើមមាន៣០០គ្រែ និងនៅដំណាក់កាលទី២បន្ថែម២០០គ្រែ ទៀតទាំងអស់៥០០គ្រែ ។ សម្តេចបានថ្លែងអរគុណជាមួយនឹងការគាំទ្រទាំងឡាយរបស់រដ្ឋាភិបាលសង្គមនិយមវៀតណាម ពិសេសអតីតលោកនាយករដ្ឋមន្ត្រី និងពិសេសលោកង្វៀន តាន់យ៉ុង នាយករដ្ឋមន្ត្រីបច្ចុប្បន្ន ដែលលោកនឹងខ្ញុំគឺជាដៃគូសហប្រតិបត្តិការ ដែលនាំមកការវិនិយោគដ៏សន្ធឹកសន្ធាប់ ដែលមានជាង៣ពាន់លានដុល្លាររួចទៅហើយ និងធ្វើឱ្យពាណិជ្ជកម្មរវាងប្រទេសទាំងពីរក្នុងឆ្នាំកន្លងផុតទៅមានរហូត៣.៥០០លានដុល្លារ ហើយនឹងខិតខំសម្រេចនូវគោលដៅពាណិជ្ជកម្មទ្វេភាគីឱ្យឡើងទៅដល់៥ពាន់លានដុល្លារនៅឆ្នាំ២០១៥ ខាងមុខ សង្ឃឹមអាចធ្វើការងារនេះបាន ។ រាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសធារណរដ្ឋសង្គមនិយមវៀតណាមគាំទ្រនិងតម្រង់ទិស ប៉ុន្តែវិស័យផ្នែកឯកជនដាក់ទុនដើម្បីវិនិយោគបង្កើតចេញជារូបរាងនូវមន្ទីរពេទ្យនេះ នៅលើទឹកដីនៃព្រះរាជាណាចក្រ
កម្ពុជា ។
ជាមួយនឹងមោទនភាពនៅទីនេះសម្តេចតេជោនាយករដ្ឋមន្ត្រីក៏បានថ្លែងអំណរគុណចំពោះរដ្ឋាភិបាលនៃសាធារណរដ្ឋសង្គមនិយមវៀតណាម ដែលបានជួយឧបត្ថម្ភគាំទ្រតាមរយៈនៃការជួយព្យាបាលជំងឺដល់ប្រជាពលរដ្ឋកម្ពុជានៅតាមមន្ទីរពេទ្យរបស់វៀតណាម ដោយមានកន្លែងខ្លះមិនយកប្រាក់ និងមានកន្លែងខ្លះទៀតបង់ថ្លៃដូចប្រជាជនវៀតណាមដែរ គឺមិនយកថ្លៃតាមរបៀបជនបរទេសទេ គឺបានលាតសន្ធឹងនៅទីក្រុងហូជីមិញ នៅតាមបណ្តាខេត្តជាប់ព្រំដែនកម្ពុជា-វៀតណាម ។ បន្ថែមពីលើនេះ តាមរយៈនៃសហប្រតិបត្តិការដ៏ល្អប្រជាជនកម្ពុជា ជាពិសេសស្ត្រីមានផ្ទៃពោះ អ្នកដែលមានជំងឺធ្ងន់ និងកុមារ បានទទួលការព្យាបាលដោយកៀកទៅនឹងតាមព្រំដែន ។ កិច្ចការទាំងនេះសម្តេចបញ្ជាក់ថា សម្តេចបានធ្វើកិច្ចការងារនេះជាមួយសាធារណរដ្ឋសង្គមនិយមវៀតណាម ជាមួយព្រះរាជាណាចក្រកម្ពុជា និងជាមួយសាធារណរដ្ឋប្រជាធិបតេយ្យប្រជាមានិតឡាវផងដែរ ដើម្បីសុំឱ្យមានការគាំទ្រផ្នែកវិស័យសុខាភិបាលសម្រាប់ប្រជាពលរដ្ឋដែលរស់នៅក្បែរព្រំដែន ។ ដូច្នេះវិធីដែលល្អគឺតាមរយៈសហប្រតិបត្តិការជាមួយប្រទេសជិតខាង ដើម្បីទទួលបាននៃការព្យាបាលជំងឺក្នុងករណីធ្ងន់ធ្ងរត្រូវសង្គ្រោះបន្ទាន់ ជាមួយនេះកុមារក៏ត្រូវទទួលបានវា៉ក់សាំងផងដែរ ។
សម្តេចបានថ្លែងអរគុណចំពោះលោកនាយករដ្ឋមន្ត្រី ង្វៀន តាន់យ៉ុង តាមរយៈលោកនាយករដ្ឋមន្ត្រីសម្តេចសូមផ្ញើជូនចំពោះគ្រូពេទ្យទាំងអស់ ដែលបានជួយឧបត្ថម្ភដល់ប្រជាជនកម្ពុជាបែបនេះ ។ លោក ង្វៀន តាន់យ៉ុង នាយករដ្ឋមន្ត្រីនៃសាធារណរដ្ឋសង្គមនិយមវៀតណាមបានមានប្រសាសន៍ថា មន្ទីរពេទ្យជោរៃ-ភ្នំពេញ គឺជាសំណង់ដំបូងនៃកិច្ចសហប្រតិបត្តិការវិនិយោគរវាងប្រទេសទាំងពីរ ក្នុងវិស័យសុខាភិបាល ។ វិស័យសុខាភិបាលគឺជាវិស័យមួយដែលប្រជាជនកម្ពុជាមានការយកចិត្តទុកដាក់យ៉ាងខ្លាំង ។ នេះគឺជាជោគជ័យនៃកិច្ចសហប្រតិបត្តិការរវាងរាជធានីភ្នំពេញនិងទីក្រុងហូជីមិញ មានបំណងក្នុងគោលដៅសាងសង់មន្ទីរពេទ្យមួយដែលមានគ្រប់សេវា ដើម្បីសេចក្តីត្រូវការព្យាបាលជំងឺជូនប្រជាពលរដ្ឋកម្ពុជានិយាយរួមនិងប្រជាជនរស់នៅភ្នំពេញ ។ លោកនាយករដ្ឋមន្ត្រីសាធារណរដ្ឋសង្គមនិយមវៀតណាមបន្តថា នៅក្នុងពិធីសម្ពោធមន្ទីរពេទ្យជោរៃ-ភ្នំពេញ នៅថ្ងៃនេះគឺមានអត្ថន័យសំខាន់ៗ ក្នុងពេលដែលប្រជាជនកម្ពុជារំលឹកខួប៣៥ឆ្នាំថ្ងៃរំដោះពីរបបប្រល័យពូជសាសន៍ ។ ខ្ញុំសង្ឃឹមថា បន្ទាប់ពីគម្រោងនេះបណ្តាខេត្ត និងទីក្រុងមានពាណិជ្ជកររបស់វៀតណាម មកបន្តវិនិយោគសំណង់មួយចំនួនទៀត ដែលមានអត្ថន័យសំខាន់ៗរួមចំណែកក្នុងការដោះស្រាយតម្រូវការព្យាបាលជំងឺដល់ប្រជាជនកម្ពុជា ហើយនិងរួមចំណែកក្នុងការពង្រឹងនិងពង្រីកមិត្តភាពល្អប្រពៃរវាងប្រទេសទាំងពីរ ។ មន្ទីរពេទ្យជោរ៉ៃ -ភ្នំពេញ នឹងរួមចំណែកយ៉ាងសកម្មក្នុងការព្យាបាលថែទាំសុខភាពជូនប្រជាជនកម្ពុជា ហើយបានក្លាយទៅជាមន្ទីរពេទ្យមួយដ៏ល្បីឈ្មោះនៅក្នុងប្រទេសកម្ពុជារយៈពេលខាងមុខ។
លោកប៉ា សុជាតិវង្ស អភិបាលរាជធានីភ្នំពេញមានប្រសាសន៍ថា សមិទ្ធផលដ៏ធំធេងដែលដាក់ឱ្យសម្ពោធប្រើប្រាស់ជាផ្លូវការនៅពេលនេះ គឺបានប្រសូតចេញពីគំនិតផ្តួចផ្តើមរបស់ប្រមុខដឹកនាំនៃប្រទេសទាំងពីរដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោក ង្វៀង តាន់យ៉ុង នាយករដ្ឋមន្ត្រីនៃសាធារណរដ្ឋសង្គមនិយមវៀតណាម រៀបចំឱ្យមានគម្រោងសាងសង់មន្ទីរពេទ្យជោរៃនៅទីក្រុងភ្នំពេញ ដោយដាក់បញ្ចូលទៅក្នុងក្របខណ្ឌនៃផែនការកិច្ចសហប្រតិបត្តិការរវាងប្រទេសទាំងពីរ ដែលបានចុះហត្ថលេខាលើអនុស្សរណៈរវាងថ្នាក់ដឹកនាំប្រទេសទាំងពីរក្នុងអំឡុងឆ្នាំ២០០២ និងការអនុវត្តអនុស្សារណៈស្តីពីកិច្ចសហប្រតិបត្តិការមិត្តភាពរវាងរាជធានីភ្នំពេញ និងទីក្រុងហូជីមិញ ដែលបានចុះហត្ថលេខាកាលពីឆ្នាំ២០០៤ ។ លោកអភិបាលរាជធានីភ្នំពេញបានឱ្យដឹងថា មន្ទីរពេទ្យនេះត្រូវបានបើកការដ្ឋានសាងសង់នៅថ្ងៃទី១៥ ឧសភា ២០១០ ក្រោមអធិបតីដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានសាងសង់រួចជាស្ថាពរដំណាក់កាលទី១នៅថ្ងៃទី២០ ធ្នូ ឆ្នាំ២០១៣ ដោយបានប្រើប្រាស់ថវិកាសរុបចំនួន៣៨លាន៨៧៩.០០០ដុល្លារអាេម
រិក ។ នៅក្នុងដំណាក់កាលទី១នេះ មាន៣អគារដែលមានគ្រែសម្រាប់ព្យាបាលចំនួន២០០ ដែលនៅក្នុងនោះបែងចែកចេញជាអគារនីមួយមាន៥ជាន់ ជាអគារពិគ្រោះនិងព្យាបាលជំងឺទូទៅ ផ្នែកវះកាត់ទូទៅ វះកាត់ឆ្អឹង និងវះកាត់ប្រព័ន្ធសរសៃប្រាសាទ ជំងឺត្រចៀក ច្រមុះ បំពង់ក ផ្នែកជំងឺភ្នែក និងជំងឺមាត់ធ្មេញ ។ អគារទី២មាន៥ជាន់ជាអគារបច្ចេកទេសសង្គ្រោះបន្ទាន់ជំងឺធ្ងន់ ផ្នែកពិសោធន៍ឈាម ផ្នែកថតឆ្លុះ ផ្នែកវិនិច្ឆយរោគដោយរូបភាព ផ្នែករោគស្ត្រី សម្ភព និងកុមារ ផ្នែកបេះដូងនិងផ្នែករដ្ឋ
បាល ។
អគារទី៣ មាន២ជាន់ ជាអគារស្ដុកសម្ភារពេទ្យ និងថ្នាំពេទ្យ អាហារដ្ឋាន និងកាហ្វេ ។ មន្ទីរពេទ្យជោរៃភ្នំពេញបានបំពាក់នូវឧបករណ៍បរិក្ខាពេទ្យរួមមាន ម៉ាសីុនស្គែន ម៉ាសីុនថត ឆ្លុះឌីជីថល ម៉ាសីុនពិនិត្យអេកូពណ៌ អេកូបេះដូង ម៉ាសីុនវះកាត់ ម៉ាសីុនសម្រាប់ថតឆ្អឹង ម៉ាសីុនវ៉ាស់សរសៃខួរក្បាល ម៉ាសីុនត្រួតពិនិត្យសរសៃឈាម ម៉ាសីុនវិភាគគីមីក្នុងឈាម ម៉ាសីុនអេម៉ូតតឺរី …។ តំណាងរដ្ឋអំណាចទីក្រុងហូជីមិញបានថ្លែងថា ពិធីសម្ពោធមន្ទីរពេទ្យជោរ៉ៃភ្នំពេញគឺជាសក្ខីភាពដ៏រស់រវើកទំនាក់ទំនងសហប្រតិបត្តិការដ៏មានប្រសិទ្ធភាពរវាងវៀតណាមនិងកម្ពុជា ។ លោកបានបន្តថា យើងខ្ញុំមានវត្ដមាននៅទីនេះ ដើម្បីធ្វើជាសាក្សីការសម្ពោធសមិទ្ធផលដែលជាទីមោទន គឺមន្ទីរពេទ្យជោរៃភ្នំពេញ ត្រូវបានសាងសង់តាមស្ដង់ដាអឺរ៉ុបមាន៣០០គ្រែ ក្នុងបុព្វហេតុថែទាំសុខភាពសុខុមាលភាពប្រជាជនកម្ពុជា ។ លទ្ធផលទាំងអស់ដែលសម្រេចបានថ្ងៃនេះ គឺជាការខិតខំរួមរបស់ថ្នាក់ដឹកនាំប្រទេសទាំងពីរ ៕
ចែករំលែកព័តមាននេះ