ខេត្តបន្ទាយមានជ័យ ៖ មន្ត្រីគយ និងរដ្ឋាករច្រកទ្វារអន្តរជាតិប៉ោយប៉ែត បានចាប់បន្លែ-ផ្លែឈើ១រទេះ ដែលលួចនាំចូលពីថៃ នៅល្ងាចថ្ងៃទី១៧ ខែមិថុនា ឆ្នាំ២០២៥ នៅក្រុងប៉ោយប៉ែត…
ខេត្តបន្ទាយមានជ័យ ៖ មន្ត្រីគយ និងរដ្ឋាករច្រកទ្វារអន្តរជាតិប៉ោយប៉ែត បានចាប់បន្លែ-ផ្លែឈើ១រទេះ ដែលលួចនាំចូលពីថៃ នៅល្ងាចថ្ងៃទី១៧ ខែមិថុនា ឆ្នាំ២០២៥ នៅក្រុងប៉ោយប៉ែត ។
លោក ងួន កុសល ប្រធានស្នាក់គយ និងរដ្ឋាករច្រកទ្វារអន្តរជាតិប៉ោយប៉ែតបានប្រាប់ថា ក្រោយមានការណែនាំពីរាជរដ្ឋាភិបាលកម្ពុជា និងអគ្គនាយកដ្ឋានគយ និងរដ្ឋាករកម្ពុជា មន្ត្រីជំនាញបានឃាត់ទំនិញបន្លែ-ផ្លែឈើជាបន្តបន្ទាប់ពីកម្មករអូសរទេះ បានលូចលាក់នាំចូលពីប្រទេសថៃចូលមកកម្ពុជា តាមច្រកទ្វារព្រំដែនអន្តរជាតិប៉ោយប៉ែត ដែលមានប្រមាណ១រទេះ ។
លោកបានបញ្ជាក់ថា ក្រោយពេលដែលមន្ត្រីគយនិងរដ្ឋាករ ច្រកទ្វារអន្តរជាតិប៉ោយប៉ែត ឃាត់ទំនិញបន្លែ-ផ្លែឈើចំនួន១រទេះ មានផ្លែទុរេន មង្ឃុត សាវម៉ាវ សណ្តែកកួរ និងបន្លែជាច្រើនមុខទៀត ត្រូវបានយកទៅរក្សាទុកនៅស្នាក់ការគយ និងដ្ឋាករច្រកទ្វារអន្តរជាតិប៉ោយប៉ែត ដើម្បីសុំគោលការណ៍ពីប្រធានសាខាគយ និងរដ្ឋាករខេត្តបន្ទាយមានជ័យ ដើម្បីយកទៅបំផ្លាញចោល ។
លោក ងួន កុសល បានសំណូមពរដល់ពលរដ្ឋខ្មែរ ត្រូវបញ្ឈប់សកម្មភាពការនាំចូលទំនិញបន្លែ -ផ្លែឈើពីប្រទេសថៃ ដើម្បីលើកស្ទួយកសិផលក្នុងស្រុកឱ្យមានទីផ្សារ ដូចជួយដល់ប្រជាពលរដ្ឋខ្មែរ ហើយការហាមមិនឱ្យមានការនាំចូលបន្លែ-ផ្លែឈើចូលពីថៃនេះ ក៏ជាគោលនយោបាយរបស់រាជរដ្ឋាភិបាលប្រឆាំងទៅនឹងភាពទំនើងរបស់ថៃ ដែលបានបិទព្រំដែនជាឯកតោភាគី រំលោភកិច្ចព្រមព្រៀងរវាងកម្ពុជា-ថៃ ។ រាជរដ្ឋាភិបាលបានបង្ហាញថា បើភាគីទាហានថៃបើកច្រកទ្វារព្រំដែនទាំងអស់ឱ្យមានប្រក្រតីឡើងវិញនោះ មិនមានរនាំងហាមបន្លែ-ផ្លែឈើពីថៃនោះទេ ។
ក្រសួងកសិកម្ម រុក្ខាប្រមាញ់ និងនេសាទ បានប្រកាសថា កម្ពុជាមានសមត្ថភាពផលិតគ្រប់គ្រាន់ ដើម្បីធានាដល់តម្រូវការសន្តិសុខស្បៀង ហើយរាល់ការនាំចូលបន្លែ ផ្លែឈើសុទ្ធតែអាចជំនួសបានទាំងស្រុងដោយផលិតផលក្នុងស្រុក ។ នេះបើតាមអ្នកនាំពាក្យក្រសួងកសិកម្ម ។
ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានលើកឡើង នៅលើបណ្តាញសង្គម នៅរសៀលថ្ងៃទី១៧ ខែមិថុនា ឆ្នាំ២០២៥ យ៉ាងដូច្នេះថា «ស្របពេលដែលមានការបិទការនាំចូលបន្លែ ផ្លែឈើពីប្រទេសថៃ ក្រសួងកសិកម្មសូមបញ្ជាក់ថា កម្ពុជាមានសមត្ថភាពផលិតគ្រប់គ្រាន់ ដើម្បីធានាដល់តម្រូវការសន្តិសុខស្បៀង ហើយរាល់ការនាំចូលបន្លែ ផ្លែឈើ និងធាតុចូលកសិកម្មនានា សុទ្ធតែអាចជំនួសបានទាំងស្រុងដោយផលិតកម្មក្នុងស្រុក និងប្រភពនាំចូលដទៃទៀតបាន» ។
ជាមួយគ្នានោះដែរ អ្នកនាំពាក្យបានអះអាងថា ក្រសួងបានត្រៀមលក្ខណៈរួចជាស្រេច ដើម្បី ធានានិរន្តភាពនៃដំណើរការផលិតកម្មកសិកម្ម និងរក្សាឱ្យបាននូវស្ថិរភាព នៃខ្សែច្រវាក់ផ្គត់ផ្គង់នៅក្នុងប្រទេស ។
សូមជម្រាបថា ការលើកឡើងរបស់អ្នកនាំពាក្យក្រសួងកសិកម្ម បន្ទាប់ពីរាជរដ្ឋាភិបាលបានសម្រេចបិទច្រកព្រំដែនចំនួន៧ជាមួយថៃ ដោយមិនអនុញ្ញាតឲ្យដឹកបន្លែ និងផ្លែឈើចូលកម្ពុជានោះទេ ល្គិកណាករណីទាហានថៃបើកច្រកទ្វារព្រំដែនដូចធម្មតាវិញ ៕
ចែករំលែកព័តមាននេះ