ទីក្រុងវ៉ាស៊ីនតោន៖ លោកត្រាំដឹងថាអគ្គមគ្គុទ្ទេសក៍អ៊ីរ៉ង់កំពុងសម្ងំលាក់ខ្លួននៅទីណា។ បើចង់ចាត់ការគាត់ងាយស្រួលដូចបកចេក។ ប៉ុន្តែសម្រាប់ពេលនេះ ទុកឱ្យគាត់រស់នៅមួយសំណើសិនចុះ។ ទន្ទឹមនឹងនោះ លោកអំពាវនាវឱ្យមេដឹកនាំរូបនេះចុះចាញ់ដោយឥតលក្ខខណ្ឌ។ ការថ្លែងដូច្នេះស្របពេលដែលមានដំណឹងថាសង្គ្រាមអ៊ីរ៉ង់ និងអ៊ីស្រាអែលប្រហែលជាមិនសាមញ្ញពេកទេ។ ប្រភពខ្លះថាអ៊ីស្រាអែលមិនត្រឹមតែចង់វាយទីតាំងនុយក្លេអ៊ែររបស់អ៊ីរ៉ង់ទេ ថែមទាំងចង់ផ្ដួលរំលំរបបដឹកនាំនៅអ៊ីរ៉ង់តែម្ដង។
ប្រទេសខ្លះក៏កំពុងខ្វាយខ្វល់អំពីបញ្ហានេះផងដែរ។ ប្រមុខដឹកនាំបារាំង លោកម៉ាក្រុង ថ្លែងថាលោកមិនគាំទ្រការផ្លាស់ប្ដូររបបដឹកនាំនៅអ៊ីរ៉ង់ដោយអំពើហិង្សាទេ។ លោកថាយើងមិនគាំទ្រជាដាច់ខាតការប្រើប្រាស់កម្លាំងយោធាដើម្បីដូររបបនៅអ៊ីរ៉ង់។ ប្រភពខ្លះថាអ៊ីស្រាអែលកំពុងរៀបផែនការធ្វើឃាតអគ្គមគ្គុទ្ទេសក៍អ៊ីរ៉ង់ព្រោះគាត់បង្កបញ្ហាច្រើនណាស់រហូតដល់ចង់ផលិតអាវុធនុយក្លេអ៊ែរ។ ប៉ុន្តែផែនការនេះត្រូវលោកត្រាំជំទាស់។ ជាការពិត ត្រាំមិនចង់ឃើញអ៊ីរ៉ង់ផលិតនុយក្លេអ៊ែរមែន។ ប៉ុន្តែគាត់ក៏មិនចង់សម្លាប់មេដឹកនាំប្រទេសណាមួយនោះដែរ។
ថ្ងៃនេះ លោកត្រាំបង្ហោះសារនៅលើបណ្ដាញសង្គមថា «អ៊ីរ៉ង់ត្រូវតែចុះចាញ់សង្គ្រាមដោយឥតលក្ខខណ្ឌ»។ យើងដឹងច្បាស់ណាស់ថាមេដឹកនាំប្រទេសនេះ (អាយ៉ាតូឡា អាលី ខាមេនី) កំពុងលាក់ខ្លួននៅទីណា។ ត្រាំចង់មានន័យថាចង់ធ្វើឃាតពេលណាបានពេលហ្នឹង។ ប៉ុន្តែកុំភ័យ, សម្រាប់ពេលនេះ លោកទុកឱ្យគាត់រស់នៅបានមួយខ្យល់សិនចុះ។ ជាថ្មីម្ដងទៀត ត្រាំព្រមានថាអ៊ីរ៉ង់កុំវាយប្រហារជនស៊ីវិលអាមេរិក ឬទាហានអាមេរិក (នៅមជ្ឈិមបូព៌ា)។ ការអត់ធ្មត់របស់យើងកាន់តែនៅសល់តិចទៅៗហើយ។
លោកត្រាំប្រើសម្ដីខ្លាំងដាក់រដ្ឋាភិបាលអ៊ីរ៉ង់បន្ទាប់ពីសង្គ្រាមផ្ទុះឡើងឈានចូលដល់ថ្ងៃទី៦។ លោកត្រាំអំពាវនាវឱ្យប្រជាជនអ៊ីរ៉ង់ជាង៩លាននាក់នៅរដ្ឋធានីតេអេរ៉ង់សូមជម្លៀសខ្លួនចេញជាបន្ទាន់។ អាមេរិកបានបញ្ជូនយន្តហោះចម្បាំងបន្ថែមទៀតទៅមជ្ឈិមបូព៌ាដើម្បីការពារផលប្រយោជន៍របស់ខ្លួននៅទីនោះ។ ស្ថានទូតអាមេរិកប្រចាំទីក្រុងយេរូសាឡឹមនឹងបន្តបិទទ្វាររហូតដល់ថ្ងៃសុក្រសប្ដាហ៍នេះ។
តាមមើលទៅត្រាំក៏មិនចង់ទុកមេដឹកនាំអ៊ីរ៉ង់ឱ្យនៅរស់ប៉ុន្មានដែរ។ ប៉ុន្តែគាត់បារម្ភថាការធ្វើដូច្នេះអាចនឹងដុតបញ្ឆេះសង្គ្រាមកាន់តែខ្លាំង ហើយធ្វើតំបន់មជ្ឈិមបូព៌ាក្រឡាប់ចាក់។ អ៊ីស្រាអែលបានយកផែនការធ្វើឃាតលោកអាយ៉ាតូឡា អាលី ខាមេនីទៅឱ្យទីក្រុងវ៉ាស៊ីនតោនមើល។ ប៉ុន្តែលោកត្រាំច្រានចោលសំណើនេះ។ អ៊ីស្រាអែលអះអាងថាការវាយប្រហាររយៈពេល៦ថ្ងៃធ្វើឱ្យកម្មវិធីនុយក្លេអ៊ែររបស់អ៊ីរ៉ង់រងគ្រោះយ៉ាងដំណំ។ អ៊ីស្រាអែលថាបើមានជំនួយពីអាមេរិកថែមទៀតរឹតតែប្រសើរ។
ប៉ុន្តែអ៊ីស្រាអែលវាយបានតែទីតាំងខាងក្រៅប៉ុណ្ណោះ ចំណែកទីតាំងស្រាវជ្រាវនុយក្លេអ៊ែររបស់អ៊ីរ៉ង់សាងសង់នៅក្រោមដីជ្រៅៗមិនទាន់អាចទៅរួចទេ។ ដូច្នេះ បើអាមេរិកជួយអាវុធដែលអាចត្រាយទម្លុះផ្លូវចូលទៅកម្ទេចរូងក្រោមដីបានរឹតតែប្រសើរ។ ប៉ុន្តែលោកត្រាំមិនចង់លេងផ្លូវហ្នឹងទេ។ បើសិនអាមេរិកចូលខ្លួនពាក់ព័ន្ធដោយផ្ទាល់នៅក្នុងសង្គ្រាមនេះអាចប៉ះពាល់កម្មវិធីនយោបាយរបស់គាត់ខ្លាំងមែនទែនព្រោះគាត់តាំងខ្លួនជាអ្នករំលត់ភ្លើងសង្គ្រាម និងស្វែងរកសន្តិភាពជូនពិភពលោក។
ឥឡូវនេះ ដោះតែបញ្ហាអ៊ុយក្រែនមិនទាន់ចប់ផង មកចូលបញ្ហានៅអ៊ីរ៉ង់មួយទៀត។ ប្រភពខ្លះថាលោកត្រាំមានកំហឹងយ៉ាងខ្លាំងដែលអ៊ីរ៉ង់មិនព្រមចរចាគ្នាដើម្បីឱ្យមានកិច្ចព្រមព្រៀងនុយក្លេអ៊ែរ។ គម្រោងចរចាគ្នានៅប្រទេសអូម៉ង់កាលពីថ្ងៃអាទិត្យត្រូវអ៊ីរ៉ង់លុបចោល។ អ៊ីរ៉ង់ថាអាមេរិកជាអ្នកផ្ដល់សញ្ញាភ្លើងខៀវឱ្យអ៊ីស្រាអែលទើបបានជាអ៊ីស្រាអែលហ៊ានវាយប្រហារខ្លាំងដល់ថ្នាក់នេះ។ ដូច្នេះអ៊ីរ៉ង់យល់ថាបើទុកជាចរចាគ្នាក៏គ្មានបានប្រយោជន៍អ្វីដែរ។ ឥឡូវនេះ ត្រាំថាគាត់ក៏គ្មានអារម្មណ៍ចរចាគ្នាតទៅទៀតដែរ។ ត្រាំកំពុងប្រើយុទ្ធសាស្ត្រ «ដំបង និងការ៉ុត»។ បន្ទាប់ពីប្រើធម៌ត្រជាក់តាមរយៈការចរចាគ្នាទៅលែងរួច គាត់ក៏ងាកមកប្រើវិធីសម្លុតវិញម្ដង។ ត្រាំទាមទារឱ្យអ៊ីរ៉ង់ចុះចាញ់ និងបោះបង់ចោលកម្មវិធីនុយក្លេអ៊ែរដើម្បីជាថ្នូរនឹងសន្តិភាព៕
ចែករំលែកព័តមាននេះ