ខេត្តកណ្តាល ៖ មិនធម្មតាមែន! ជនសង្ស័យ២នាក់ប្តីប្រពន្ធ បានជិះម៉ូតូឌុបគ្នាធ្វើសកម្មភាពឆក់ទូរសព្ទដៃពីសិស្សសាលា រហូតជនរងគ្រោះបើកម៉ូតូដេញតាមបំបុកដួល ស្រាប់តែជនសង្ស័យជាប្តីនោះ វាយមកលើសិស្សសាលាជាជនរងគ្រោះជាច្រើនដៃថែមទៀត ត្រូវសមត្ថកិច្ចឃាត់ខ្លួនបាន ។…
ខេត្តកណ្តាល ៖ មិនធម្មតាមែន! ជនសង្ស័យ២នាក់ប្តីប្រពន្ធ បានជិះម៉ូតូឌុបគ្នាធ្វើសកម្មភាពឆក់ទូរសព្ទដៃពីសិស្សសាលា រហូតជនរងគ្រោះបើកម៉ូតូដេញតាមបំបុកដួល ស្រាប់តែជនសង្ស័យជាប្តីនោះ វាយមកលើសិស្សសាលាជាជនរងគ្រោះជាច្រើនដៃថែមទៀត ត្រូវសមត្ថកិច្ចឃាត់ខ្លួនបាន ។
ហេតុការណ៍នេះបានកើតឡើងកាលពីវេលាម៉ោង ១៩និង៤០នាទីយប់ថ្ងៃទី១៧ ខែមិថុនា ឆ្នាំ២០២៥ ស្ថិតនៅចំណុចមុខសាលាបឋមសិក្សា ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ។
លោកវរសេនីយ៍ឯក យី វណ្ណដា អធិការដ្ឋាននគរបាលក្រុងតាខ្មៅបានឲ្យដឹងថា ជនសង្ស័យ០២នាក់ប្តីប្រពន្ធ ៖
១-ឈ្មោះ ប៉ាល់ វាសនា ភេទប្រុស អាយុ១៨ឆ្នាំ មុខរបរ បើកបររថយន្តដឹកដី មានទីលំនៅភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល ។
២-ឈ្មោះ អឿន ចាន់មិនា ភេទស្រី អាយុ១៦ឆ្នាំ មុខរបរ នៅផ្ទះមានទីលំនៅភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល ។
ចំណែកជនរងគ្រោះមានឈ្មោះ អ៊ុច សិរីនិសា ភេទស្រី អាយុ១៥ឆ្នាំ មានទីលំនៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរសិស្ស របួសស្នាមរលាត់ក្រោមក្បាលជង្គង់ខាងស្តាំមួយកន្លែងនិងកំភួនជើងខាងស្តាំ។
ក្នុងនោះសមត្ថកិច្ចបានធ្វើការដកហូត វត្ថុតាងរួមមាន ៖
១-ម៉ូតូមួយគ្រឿងម៉ាកHonda C125សេរី២០២៤ ពណ៌ខៀវ ស្លាកលេខភ្នំពេញ១KZ៥៤៨១(របស់ជនសង្ស័យ)។
២-ទូរសព្ទ័មួយគ្រឿងម៉ាក Tech spark ពណ៌ស (របស់ជនសង្ស័យ)។
៣-ទូរសព្ទ័មួយគ្រឿងម៉ាកiphone 12pro mex ពណ៌ស (របស់ជនរងគ្រោះ)
លោកវរសេនីយ៍ឯក យី វណ្ណដា បានបន្តថាឲ្យដឹងថា កាលពីថ្ងៃទី១៧ ខែមិថុនា ឆ្នាំ២០២៥ វេលាម៉ោង ១៩ និង ៤០នាទីយប់ ជនរងគ្រោះបានជិះម៉ូតូចេញពីសាលារៀន ដើម្បីត្រឡប់ទៅផ្ទះវិញដោយបានទុកទូរសព្ទក្នុងឃ្លុបម៉ូតូ លុះជិះដល់មុខសាលាបឋមសិក្សាព្រែកសំរោង ក៏ស្រាប់តែមានជនសង្ស័យ ២នាក់ប្តីប្រពន្ធជិះម៉ូតូមួយគ្រឿងម៉ាកHonda C125ពណ៌ខៀវ ស្លាកលេខភ្នំពេញ 1KZ-5481 ដោយប្តីជាអ្នកឌុប ហើយប្រពន្ធអង្គុយខាងក្រោយ ពេលនោះជនសង្ស័យជាប្តី បានធ្វើសកម្មភាពឆក់ទូរសព្ទ័របស់ជនរងគ្រោះហើយបើករត់គេចខ្លួន ។ ចំណែក ជនរងគ្រោះបានបើកម៉ូតូដេញតាមរហូតដល់រង្វង់មូលវត្តព្រែកសំរោង ក៏បានបុកជាមួយម៉ូតូជនសង្ស័យបណ្តាលឲ្យដួល ហើយជនរងគ្រោះបានស្ទុះទៅចាប់ក្របួចកអាវជនសង្ស័យជាបុរស ហើយជនសង្ស័យជាបុរសបានវាយជនរងគ្រោះជាច្រើនដៃ ស្របពេលដែលកម្លាំងនគរបាលក្រុងតាខ្មៅដែលប្រចាំការនៅរង្វង់មូលវត្តព្រែកសំរោង និងប្រជាពលរដ្ឋបានជួយឃាត់ខ្លួនជនសង្ស័យទាំងពីរនាក់បញ្ជូនមកអធិការដ្ឋានដើម្បីចាត់ការតាមនីតិវិធីតែម្តង។
តាមការសាកសួរជនសង្ស័យទាំង២នាក់ ប្តីប្រពន្ធបានឆ្លើយថាពួកគាត់ពិតជាបាននាំគ្នាធ្វើសកម្មភាពលួចទូរសព្ទ័ក្នុងឃ្លាំងរបស់ជនរងគ្រោះ ប្រាកដមែន ។
បច្ចុប្បន្នជនសង្ស័យកំពុងឃាត់ខ្លួនជាបណ្តោះអាសន្ននៅអធិការដ្ឋានដើម្បីកសាងសំណុំរឿងចាត់ការតាមនីតិវិធីច្បាប់ ៕
ចែករំលែកព័តមាននេះ