ខេត្តកំពង់ស្ពឺ ៖ ជនជាតិចិនម្នាក់ត្រូវបានប្រជាពលរដ្ឋឃាត់ខ្លួនប្រគល់ឱ្យសមត្ថកិច្ច ខណៈដែលជិះរថយន្តតាក់សុីមកពីខេត្តព្រះសីហនុ ក្នុងគោលបំណងទៅរាជធានីភ្នំពេញ តាមផ្លូវល្បឿនលឿន ប៉ុន្តែមកដល់ចំណតកំពង់ស្ពឺខាងលិច បែរជាដកទូរស័ព្ទអ្នកបើកបររថយន្តតាក់សុី ថែមទាំងបញ្ជាឱ្យបត់តាមផ្លូវជាតិលេខ៤ ត្រឡប់ទៅទិសខាងលិចវិញ…
ខេត្តកំពង់ស្ពឺ ៖ ជនជាតិចិនម្នាក់ត្រូវបានប្រជាពលរដ្ឋឃាត់ខ្លួនប្រគល់ឱ្យសមត្ថកិច្ច ខណៈដែលជិះរថយន្តតាក់សុីមកពីខេត្តព្រះសីហនុ ក្នុងគោលបំណងទៅរាជធានីភ្នំពេញ តាមផ្លូវល្បឿនលឿន ប៉ុន្តែមកដល់ចំណតកំពង់ស្ពឺខាងលិច បែរជាដកទូរស័ព្ទអ្នកបើកបររថយន្តតាក់សុី ថែមទាំងបញ្ជាឱ្យបត់តាមផ្លូវជាតិលេខ៤ ត្រឡប់ទៅទិសខាងលិចវិញ ដើម្បីរកកន្លែងស្ងាត់ដើម្បីធ្វើសកម្មភាព សំណាងល្អអ្នកបើកបររថយន្តតាក់ស៊ី ធ្វើជាសុំទិញទឹកផឹក ឱកាសល្អស្រែកឱ្យប្រជាពលរដ្ឋ ជួយឃាត់ជនជាតិចិននោះបាន។
ការឃាត់ខ្លួនជនជាតិចិនគំរាមតៃកុងរថយន្តខាងលើនេះបានកាលពីម៉ោង១២និង១៧នាទីថ្ងៃត្រង់ថ្ងៃទី១៦ ខែមិថុនា ឆ្នាំ២០២៥ នៅក្នុងភូមិចំការចេក ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបាននិយាយឱ្យដឹងថា ជនសង្ស័យជាជនជាតិចិនដែលប្រជាពលរដ្ឋ និងតៃកុងរថយន្តតាក់សុីឃាត់ប្រគល់ឱ្យសមត្ថកិច្ចនេះ មានឈ្មោះLIU XIAOQIANG ភេទប្រុសអាយុ
៤៨ឆ្នាំ កាន់លិខិតឆ្លងដែនលេខ EN 2866817 ស្នាក់នៅក្នុងខេត្តព្រះសីហនុ។
ចំណែកម្ចាស់រថយន្តតាក់សុីដែលជាជនរងគ្រោះ ត្រូវបានជនជាតិចិនគំរាមកំហែងនោះ មានឈ្មោះ ហ៊ាន ធឹម ភេទប្រុស អាយុ៣៩ឆ្នាំ មុខរបររត់តាក់សុី ស្នាក់នៅរាជធានីភ្នំពេញ មានស្រុកកំណើតនៅក្នុងភូមិជើងទឹក ឃុំប្រាំយ៉ាម ស្រុកស្រីសន្ធរ ខេត្តកំពង់ចាម ។
នគរបាលស្រុកភ្នំស្រួចបាននិយាយឱ្យដឹងទៀតថា បើតាមការរៀបរាប់ពីជនរងគ្រោះ ម្ចាស់រថយន្តតាក់សុីថា កាលពីវេលាម៉ោងជាង១១ព្រឹកថ្ងៃទី១៦ ខែមិថុនា រូបគេរត់តាក់សុី ហើយ ជនបរទេស (ជនជាតិចិន) ម្នាក់បានហៅជិះរូបគេក៏ដឹក ដោយជនជាតិចិនមានឈ្មោះ LIU XIAOQIANG ភេទប្រុសអាយុ៤៨ឆ្នាំ លិខិតឆ្លងដែនលេខ EN 2866817 ចេញពីខេត្តព្រះសីហនុ ឆ្ពោះទៅអាកាសយានដ្ឋានអន្ដរជាតិភ្នំពេញ ដោយធ្វើដំណើរ តាមផ្លូវល្បឿនលឿន ។
អ្នកបើកបររថយន្តតាក់សុីបានបន្តថា លុះពេលធ្វើដំណើរ មកដល់ចន្លោះបង្គោលគីឡូម៉ែត្រលេខ១៦០ ជនជាតិចិនខាងលើបានដកយកទូរស័ព្ទពីរូបគាត់ ជនរងគ្រោះ(អ្នកបើករថយន្ត)ទុកស្រែកគំរាម និងសំឡុត លុះធ្វើដំណើរ រហូតដល់ច្រកកំពង់ស្ពឺលិច លើផ្លូវល្បឿនលឿន ជនជាតិចិនរូបនោះបានបញ្ជាឲ្យខ្លួន( ជនរងគ្រោះ) បើករថយន្តចេញ បត់មកទិសខាងលិចវិញតាមផ្លូវជាតិលេខ៤ ដើម្បីរកកន្លែងស្ងាត់ធ្វើសកម្មភាពអ្វីមួយ ធ្វើដំណើរទាំងមានការភិតភ័យនិងក្តីបារម្ភ លុះដល់បង្គោលគីឡូម៉ែត្រលេខ(៩០-ទៅលេខ៩១)ក្នុងភូមិចំការចេក ឃុំយាយម៉ៅពេជ្រនិល ស្រុកភ្នំស្រួច(មានកន្លែងលក់ដូរ) ជនរងគ្រោះ បានប្រើល្បិចឈប់រថយន្តប្រាប់ជនបរទេស(ជនជាតិចិន)ថាឈប់ចុះទិញទឹកផឹកសិន ដោយឃើញឱកាសល្អ តៃកុងរថយន្តក៏ ប្រាប់អ្នកលក់ដូរ និង ប្រជាពលរដ្ឋដែលរស់នៅទីនោះដើម្បីឱ្យ ជួយអន្តរាគមន៍ បានប្រតាយប្រតប់ឃាត់ជនសង្ស័យជនបរទេស (ជនជាតិចិន)រូបនោះបាន និងរាយការណ៍ទៅនគរបាលប៉ុស្តិ៍ឃុំយាយម៉ៅពេជ្រនិល មកទទួលយកតែម្តង។
ក្រោយពីទទួលបានជនជាតិចិនដែលជាជនសង្ស័យ និងបានរាយការបន្តទៅកាន់ការិយាល័យព្រហ្មទណ្ឌកម្រិតធ្ងន់ សហការជាមួយនគរបាលស្រុកភ្នំស្រួច បានឃាត់ខ្លួនជនសង្ស័យ និងដកហូតម្ស៉ៅក្រាមសង្ស័យជាគ្រឿងញៀន ច្រកក្នុងថង់ផ្លាស្ទិក ចំនួនមួយថង់តូចផងដែរ។
បច្ចុប្បន្នជនសង្ស័យជាជនជាតិចិនត្រូវ បានបញ្ជូនទៅកាន់ការិយាល័យនគរបាលជំនាញព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តកំពង់ស្ពឺ ដើម្បីកសាងសំណុំរឿងចាត់ការបន្តតាមផ្លូវច្បាប់ ៕
ចែករំលែកព័តមាននេះ