រាជធានីភ្នំពេញ ៖ បើទោះបីជាមិនបានចូលរួមដោយផ្ទាល់ ប៉ុន្តែព្រះនាងចេនណា បានសម្តែងការគាំទ្រពីចម្ងាយចំពោះព្រឹត្តការណ៍ការធ្វើដំណើរថ្មើជើង ដើម្បីបង្ហាញការរួមគ្នាជាធ្លុងមួយគាំទ្រដល់រាជរដ្ឋាភិបាល និងកងកម្លាំងជួរមុខកម្ពុជា ដែលបានធ្វើឡើងកាលពីថ្ងៃទី១៨ ខែមិថុនា ឆ្នាំ២០២៥…
រាជធានីភ្នំពេញ ៖ បើទោះបីជាមិនបានចូលរួមដោយផ្ទាល់ ប៉ុន្តែព្រះនាងចេនណា បានសម្តែងការគាំទ្រពីចម្ងាយចំពោះព្រឹត្តការណ៍ការធ្វើដំណើរថ្មើជើង ដើម្បីបង្ហាញការរួមគ្នាជាធ្លុងមួយគាំទ្រដល់រាជរដ្ឋាភិបាល និងកងកម្លាំងជួរមុខកម្ពុជា ដែលបានធ្វើឡើងកាលពីថ្ងៃទី១៨ ខែមិថុនា ឆ្នាំ២០២៥ ។
ក្នុងអំឡុងពេលកំពុងបំពេញការងារសិល្បៈនៅក្នុងប្រទេសចិន ព្រះនាង ចេនណា បានបង្ហោះសំណេរនៅលើបណ្តាញសង្គម ដោយបង្ហាញពីទឹកចិត្តពីការចូលរួមជាមួយបងប្អូនខ្មែរទាំងអស់ពីចម្ងាយក្នុងនាមជាពលរដ្ឋម្នាក់ និងជាសិល្បករមួយរូបក្នុងនាមជាខ្មែរតែមួយ ។ តាមរយៈសណេរ ព្រះនាង ចេនណា បានលើកឡើងថា ថ្វីដ្បិតតែពេលនេះ ខ្ញុំកំពុងបំពេញការងារសិល្បៈនៅប្រទេសចិនក៏ពិតមែន ប៉ុន្តែបេះដូង និងអារម្មណ៍ខ្ញុំស្ថិតជាប់នៅនឹងប្រទេសកម្ពុជាយើងជានិច្ច ។
ព្រះនាងបន្តថា ថ្ងៃនេះ ជាថ្ងៃដ៏មហោឡារិក នៃការបង្ហាញនូវស្មារតីខ្មែរតែមួយរស់ នៅក្រោមម្លប់សន្តិភាព រួមសាមគ្គីគ្នា គ្រប់វ័យ គ្រប់ភេទ គ្រប់តួនាទីឋានៈ ទាំងអ្នកនយោបាយក្តី ទាំងមន្ត្រីរាជការ ទាំងអាជីវករ សិស្សនិស្សិតបញ្ញាវ័ន្ត មហាជនគ្រប់ស្រទាប់ដោយភាតរៈ បេ្តជ្ញា ថែរក្សា ការពារ បូរណភាពទឹកដី មិនឱ្យបរទេសណាឈ្លានពាន ឬមើលងាយខ្មែរបានឡើយ ។
ព្រះនាងបញ្ជាក់ថា ក្នុងនាមខ្ញុំជាពលរដ្ឋម្នាក់ និងជាសិល្បករមួយរូប ខ្ញុំសូមចូលរួមជាបងប្អូនទាំងអស់គ្នាពីចម្ងាយ ក្នុងនាមជាខ្មែរតែមួយ🇰🇭 ។ ខ្ញុំ និងក្រុមគ្រួសារ សូមគោរពគាំទ្ររាល់ការសម្រេចចិត្តរបស់សម្ដេចតេជោហ៊ុន សែន បិតាសន្តិភាពនៃកម្ពុជា និងសម្ដេចបវរធិបតី ព្រមទាំងថ្នាក់ដឹកនាំដែលខិតខំប្រឹងប្រែង ការពារជាតិខ្មែរ ការពារទឹកដីខ្មែរ ការពារប្រជាជនខ្មែរដោយស្មារតីយកចិត្តទុកដាក់ខ្ពស់បំផុត ។
គួរបញ្ជាក់ថា ព្រឹត្តការនៃការធ្វើដំណើរថ្មើជើង ដើម្បីបង្ហាញការរួមគ្នាជាធ្លុងមួយ គាំទ្រដល់រាជរដ្ឋាភិបាល និងកងកម្លាំងជួរមុខកម្ពុជា ដែលបានធ្វើឡើងនាព្រឹកថ្ងៃទី១៨ ខែមិថុនា ឆ្នាំ២០២៥ បានក្លាយជាព្រឹត្តការណ៍ដ៏អស្ចារ្យមួយ ដែលមានប្រជាពលរដ្ឋចូលរួមជាច្រើនម៉ឺននាក់ ។
ក្នុងនោះដែរគេក៏ឃើញមានអ្នកសិល្បៈជាច្រើនបានចូលរួមផងដែរ ដោយម្នាក់ៗបានបង្ហាញនូវឆន្ទះស្នេហាជាតិ រួបរួមជាខ្មែរតែមួយ និងគាំទ្រទៅដល់រាជរដ្ឋាភិបាលកម្ពុជា និងលើកទឹកចិត្តទៅកាន់កងទ័ពជួរមុខទាំងអស់សម្រាប់ការពារបូរណភាពទឹកដីពីការឈ្លានពានពីប្រទេសជិតខាង ៕
ចែករំលែកព័តមាននេះ