ខេត្តកណ្តាល ៖ ជនសង្ស័យម្នាក់ ជាចោរលួចទាក់ឆ្កែក្នុងវត្ត និងសត្វមាន់យ៉ាងសកម្មពេលរាត្រី រួមទាំងប្រើប្រាស់ដោយខុសច្បាប់នូវសារធាតុញៀនទៀត ត្រូវសមត្ថកិច្ចធ្វើការស្រាវជ្រាវរយៈពេល២ថ្ងៃទើបបង្ក្រាបបាន ។ ការបង្ក្រាបនេះបានធ្វើឡើងកាលពីវេលាម៉ោង ០៤…
ខេត្តកណ្តាល ៖ ជនសង្ស័យម្នាក់ ជាចោរលួចទាក់ឆ្កែក្នុងវត្ត និងសត្វមាន់យ៉ាងសកម្មពេលរាត្រី រួមទាំងប្រើប្រាស់ដោយខុសច្បាប់នូវសារធាតុញៀនទៀត ត្រូវសមត្ថកិច្ចធ្វើការស្រាវជ្រាវរយៈពេល២ថ្ងៃទើបបង្ក្រាបបាន ។
ការបង្ក្រាបនេះបានធ្វើឡើងកាលពីវេលាម៉ោង ០៤ និង ៣០នាទីល្ងាចថ្ងៃទី១៨ ខែមិថុនា ឆ្នាំ២០២៥ នៅចំណុចក្នុងវត្ដបល្ល័ង្កផ្កាឈូក ស្ថិតក្នុងភូមិទំនប់សាប ឃុំលំហាច ស្រុកអង្គស្នួល ខេត្ដកណ្ដាល ។
សមត្ថកិច្ចស្រុកអង្គស្នួលបានឲ្យដឹងថា ជនសង្ស័យដែលសមត្ថកិច្ចឃាត់ខ្លួនបាន មានឈ្មោះ ឈុំ ឈឿន ភេទប្រុស អាយុ ៤២ឆ្នាំ មុខរបរមិនពិតប្រាកដ មានទីលំនៅបច្ចុប្បន្នភូមិព្រៃទទឹង ឃុំលំហាច ស្រុកអង្គស្នួល ខេត្តកណ្ដាល ។
ក្នុងនោះវត្ថុតាងចាប់យករួមមាន ៖ ធ្នាក់សម្រាប់ទាក់សត្វឆ្កែធ្វើពីដើមឬស្សី ចំនួន០១ដើម និងម៉ូតូ០១គ្រឿង ម៉ាកHonda supercub 90cc សេរីចាស់ ពណ៌ទឹកសមុទ្រ គ្មានផ្លាកលេខ។
លោកបានបន្តឲ្យដឹងទៀតថាមុនពេលកើតហេតុ ព្រះចៅអធិការវត្តបល្ល័ង្កផ្កាកឈូក មានសង្ឃដីកាថា កាលពីវេលាម៉ោង ០៩ និង ១៥នាទីយប់ថ្ងៃទី១៦ ខែមិថុនា ឆ្នាំ២០២៥ មានជនសង្ស័យម្នាក់បានជិះម៉ូតូម៉ាកហុងដាគុកជ្រុង០១គ្រឿង មិនចាំផ្លាកលេខ មកឈប់ក្នុងបរិវេនក្បែរវត្ត ហើយចុះពីលើម៉ូតូ យកធ្នាក់មកទាក់សត្វឆ្កែកំពុងដេកបានចំនួន០១ក្បាល ។ ក្រោយពីទាក់សត្វឆ្កែបានហើយ ជនសង្ស័យ ក៏បានបន្តទៅលួចចាប់យកសត្វមាន់ដែលកំពុងដេកនៅក្នុងតូបលក់ចាប់ហួយក្បែផ្លូវចូលវត្តអស់ប្រហែល០៤ក្បាល ហើយក៏ជិះម៉ូតូគេចខ្លួនចេញអស់បាត់ទៅ។
ក្រោយពីទទួលសេចក្តីរាយការណ៍ភ្លាមៗ កម្លាំងនគរបាលប៉ុស្តិ៍រដ្ឋបាលលំហាច សហការគ្នាជាមួយកម្លាំងជំនាញស្រុកអង្គស្នួល ចុះដល់កន្លែងកើតហេតុ និងទទួលពាក្យបណ្ដឹងហើយបន្តធ្វើការស្រាវជ្រាវ ។ រហូតលុះមកថ្ងៃទី១៨ ខែមិថុនា ឆ្នាំ២០២៥ វេលាម៉ោង៤ និង៣០នាទីល្ងាច ក៏កម្លាំងសមត្ថកិច្ចផ្នែកជំនាញ និងប៉ុស្តិ៍ធ្វើការកំណត់មុខសញ្ញារហូតឃាត់ខ្លួនជនសង្ស័យម្នាក់ និងវត្ថុតាង បញ្ចូនខ្លួនមកកាន់អធិការដ្ឋាននគរបាលស្រុកអង្គស្នួលដើម្បីសួរនាំ ។
នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានយកធ្នាក់យកទាក់ឆ្កែ និងលួចសត្វមាន់ក្នុងបរិវេនវត្តបល្ល័ង្កផ្កាកឈូក ពិតប្រាកដមែនដោយយកទៅលក់បានលុយប្រាំម៉ឺនរៀល ហើយលុយនោះយកទៅទិញគ្រឿងញៀនជក់ជាមួយបក្ខពួកនៅក្នុងភូមិអស់បាត់ទៅ ។ ហើយជនសង្ស័យខាងលើបានបន្តសារភាពទៀតថាខ្លួនចេះប្រើប្រាស់គ្រឿងញៀនរយ:ពេល២ឆ្នាំមកហើយ ។
បច្ចុប្បន្នជនសង្ស័យរួមជាមួយវត្ថុតាង ត្រូវបានកម្លាំងសមត្ថកិច្ចជំនាញនគរបាលស្រុកអង្គស្នួល កំពុងកសាងសំណុំបញ្ចូនខ្លួនទៅតុលាការចាត់ការតាមនីតិវិធីផ្លូវច្បាប់ ៕
ចែករំលែកព័តមាននេះ