ខេត្តកំពង់ស្ពឺ ៖ អភិបាលខេត្ត ឯកឧត្តម ជាម ច័ន្ទសោភ័ណ បានថ្លែងថា រដ្ឋបាលខេត្ត បានទទួលបណ្តឹងច្រើនពាក់ព័ន្ធនឹងករណីវិវាទដីធ្លី ហើយបណ្តឹងខ្លះមានភាពចាក់ស្រេះ…
ខេត្តកំពង់ស្ពឺ ៖ អភិបាលខេត្ត ឯកឧត្តម ជាម ច័ន្ទសោភ័ណ បានថ្លែងថា រដ្ឋបាលខេត្ត បានទទួលបណ្តឹងច្រើនពាក់ព័ន្ធនឹងករណីវិវាទដីធ្លី ហើយបណ្តឹងខ្លះមានភាពចាក់ស្រេះ ដែលកំពុងបង្កភាពស្មុគស្មាញដល់ក្រុមការងារដោះស្រាយ ។ ករណីនេះ ឯកឧត្តមបានបន្ទោសថា បណ្តាលមកពីអាជ្ញាធរភូមិ ឃុំ-សង្កាត់ មួយចំនួនចេះតែនាំគ្នាចុះហត្ថលេខាដោយមិនបានពិនិត្យឱ្យបានល្អិតល្អន់ និងដើរតួនាទីហួសពីបន្ទាត់ក្រហមនៃច្បាប់ដែលបានអនុញ្ញាត ។
ឯកឧត្តម ជាម ច័ន្ទសោភ័ណ បានលើកឡើងដូចនេះ ក្នុងសិក្ខាសាលាបណ្ដុះបណ្ដាលស្ដីពីការងារពាក់ព័ន្ធនឹងវិស័យដីធ្លីដល់អាជ្ញាធរមូលដ្ឋានក្នុងខេត្ត កាលពីថ្ងៃទី១៧ ខែមិថុនា ឆ្នាំ២០២៥ កន្លងទៅ ។ ឯកឧត្តមបានលើកឡើងថា កន្លងមកសង្កេតឃើញថា បញ្ហាដីធ្លីកើតមានច្រើន ពិសេសនៅតាមបណ្តាមូលដ្ឋាន ។ មេភូមិមិនសូវប៉ុន្មានទេ តែចំពោះមេឃុំ ចៅសង្កាត់មួយចំនួន បានចេញការបញ្ជាក់លើឯកសារដីធ្លីពីការលក់-ទិញ ផ្ទេរកម្មសិទ្ធិ ហើយការបញ្ជាក់ខ្លះលើដីសាធារណៈរបស់រដ្ឋថែមទៀត ។ ក្នុងនោះ ឯកឧត្តមក៏បានទទួលបានឯកសារ និងបណ្តឹងច្រើនលើករណីនេះ តែឯកឧត្តមសុំមិនបរិយាយនោះទេ ។
ឯកឧត្តមអភិបាលខេត្តបានបញ្ជាក់ថា សិក្ខាសាលាដែលរៀបចំឡើងនេះ គឺក្នុងគោលបំណងចូលរួមចំណែកពង្រីកចំណេះដឹងនិងសមត្ថភាពដល់អាជ្ញាធរពាក់ព័ន្ធ ជាពិសេសមេភូមិ មេឃុំ ចៅសង្កាត់ ក្នុងមូលដ្ឋានខេត្តកំពង់ស្ពឺ អំពីការងារពាក់ព័ន្ធនឹងវិស័យដីធ្លី ដោយផ្តោតទៅលើប្រធានបទចំនួន៣សំខាន់ៗគឺ កិច្ចការរដ្ឋបាលពាក់ព័ន្ធនឹងអាជ្ញាធរមូលដ្ឋាន កិច្ចការពាក់ព័ន្ធនឹងវិស័យដីធ្លី និងការទទួលខុសត្រូវតាមផ្លូវច្បាប់របស់មន្ត្រីអាជ្ញាធរមូលដ្ឋាននៅថ្នាក់ភូមិ ឃុំ សង្កាត់។
ចំពោះប្រធានបទទី១ និងទី២ គឺជាការផ្តល់ចំណេះដឹងនិងធាតុចូលបន្ថែមជូនចំពោះអាជ្ញាធរឃុំ សង្កាត់ និងភូមិ ដើម្បីប្រសិទ្ធភាពនៃការងារ ។ ឯប្រធានបទទី៣ បញ្ជាក់ប្រាប់ទៅអាជ្ញាធរឃុំ សង្កាត់ និងភូមិថា ទង្វើអសកម្ម ការធ្វេសប្រហែស និងទង្វើខុសច្បាប់អាចបណ្តាលឱ្យមានទណ្ឌកម្ម និងការទទួលខុសត្រូវច្រើនប្រភេទ ដូចជាព្រហ្មទណ្ឌ រដ្ឋប្បវេណី រដ្ឋបាល និងជាពិសេសការទទួលខុសត្រូវចំពោះមុខច្បាប់ ។ ឯកឧត្តមបន្តថា បញ្ហាដីធ្លីជាបញ្ហាធំមួយដែលបាននិងកំពុងកើតមានឡើងទូទាំងប្រទេស។ យ៉ាងណាមិញ ក្នុងក្របខណ្ឌខេត្តកំពង់ស្ពឺ ក៏បាននិងកំពុងជួបប្រទះផងដែរ ជាពិសេសពាក់ព័ន្ធនឹងការរំលោភកាន់កាប់ដី ដែលជាទ្រព្យសម្បត្តិរបស់រដ្ឋ ។
ដើម្បីបញ្ចប់ការបង្កើតឱ្យមានបញ្ហានេះបន្ថែម មេភូមិ មេឃុំ ចៅសង្កាត់ ត្រូវតែយកចិត្តទុកដាក់និងដឹងពីតួនាទីខ្លួន កុំធ្វើលើបន្ទាត់ព្រំដែន ហើយកុំចេះតែបញ្ជាក់ឱ្យតែសុំ ។ ពេលខ្លះ ការបញ្ជាក់នោះបានបង្ហាញឱ្យឃើញថាមេឃុំ ចៅសង្កាត់ បានដើរតួនាទីបញ្ជាក់ជំនួសអភិបាលខេត្ត អភិបាលក្រុង ស្រុក និងជួនកាលបញ្ជាក់ជំនួសមន្ទីរអង្គភាពជំនាញទៅទៀត ។ ដូច្នេះភូមិ មេឃុំ ចៅសង្កាត់ ត្រូវតែមើល និងពិនិត្យឱ្យហ្មត់ចត់លើបញ្ហានេះ ៕
ចែករំលែកព័តមាននេះ