ទីក្រុងកៀវ៖ លោកហ្សេឡិនស្គីបានធ្វើដំណើរនិវត្តចូលមាតុភូមិវិញហើយបន្ទាប់ពីលោកចូលរួមកិច្ចប្រជុំកំពូលជី៧ក្នុងនាមជាភ្ញៀវកិត្តិយស។ លោកទទួលបានការសន្យាផ្ដល់កញ្ចប់ជំនួយថ្មីពីប្រទេសកាណាដាក្នុងនាមជាម្ចាស់ផ្ទះរៀបចំកិច្ចប្រជុំ។ ប៉ុន្តែលោកត្អូញត្អែរថានយោបាយការទូតកំពុងមានវិបត្តិដោយសារបាត់បង់ឱកាសដើម្បីនិយាយបញ្ចុះបញ្ចូលឱ្យលោកត្រាំផ្ដល់អាវុធបន្ថែមទៀត។
ក្រុមប្រទេសជី៧មិនអាចមូលមតិគ្នាជាឯកច្ឆន្ទដើម្បីដាក់ចេញនូវដំណោះស្រាយថ្មីនោះទេដោយសារលោកត្រាំលម្អៀងទៅរកលោកពូទីន។ លោកបានវិលត្រឡប់ទៅវ៉ាស៊ីនតោនវិញទាំងប្រញាប់ប្រញាល់នៅពេលមិនទាន់ប្រជុំចប់សព្វគ្រប់នៅឡើយផងដើម្បីតាមដានបញ្ហាក្ដៅនៅអ៊ីរ៉ង់។ មន្ត្រីរដ្ឋាភិបាលកាណាដាម្នាក់ប្រាប់ថាក្រុមជី៧បានព្រាងសេចក្ដីថ្លែងការណ៍រួមពាក់ព័ន្ធនឹងសង្គ្រាមអ៊ុយក្រែន។ ប៉ុន្តែអាមេរិកជំទាស់មិនឱ្យចេញសេចក្ដីថ្លែងការណ៍នោះបានឡើយ។ ដូច្នេះក៏អាក់ខានទៅវិញ។
ប៉ុន្តែលោកស្រីអេមីលី វីលាម (Emily Williams) ដែលជាប្រធានផ្នែកទំនាក់ទំនងកាណាដាបញ្ជាក់ថាគ្មានករណីនេះកើតឡើងទេព្រោះជី៧មិនបានរៀបចំសេចក្ដីថ្លែងការណ៍អ្វីទាំងអស់។ នាយករដ្ឋមន្ត្រីកាណាដា លោកម៉ាក ខានី ប្រកាសថារដ្ឋាភិបាលរបស់លោកសន្យាផ្ដល់ជំនួយយោធាគិតជាទឹកប្រាក់២ពាន់លានកាណាដា ឬស្មើនឹង១,៤៧ពាន់លានដុល្លារសម្រាប់អ៊ុយក្រែន។ កាណាដាក៏បានប្រកាសដាក់ទណ្ឌកម្មផ្នែកហិរញ្ញវត្ថុទៅលើប្រទេសរុស្ស៊ីផងដែរ។
លោកហ្សេឡិនស្គីបង្ហោះសារនៅលើតេឡេក្រាមថាលោកបានជំរុញឱ្យថ្នាក់ដឹកនាំជី៧និយាយបញ្ចុះបញ្ចូលលោកត្រាំដើម្បីប្រើប្រាស់ឥទ្ធិពលរបស់គាត់ជាមេដឹកនាំប្រទេសមហាអំណាចបិទបញ្ចប់សង្គ្រាមអ៊ុយក្រែន។ កាណាដាជាអ្នកគាំទ្រផ្នែកការទូតចំពោះអ៊ុយក្រែន។ ប៉ុន្តែអ្នកដែលជំហរធំជាងគេនៅក្នុងជំនួយអាវុធយុទ្ធភ័ណ្ឌគឺអាមេរិក។ ហ្សេឡិនស្គីសង្ឃឹមថាគាត់នឹងមានឱកាសពិភាក្សាគ្នាជាមួយលោកត្រាំអំពីការទិញអាវុធបន្ថែមទៀត។
យោងតាមមន្ត្រីរដ្ឋាភិបាលអឺរ៉ុបម្នាក់ ថ្នាក់ដឹកនាំជី៧បានជម្រាបប្រាប់លោកត្រាំថាពួកគេប្រកាន់ជំហរម៉ឺងម៉ាត់ចំពោះរុស្ស៊ី។ លោកត្រាំក៏ចាប់អារម្មណ៍នឹងជំហរនេះផងដែរ។ គ្រាន់តែថាលោកមិនចង់ដាក់ទណ្ឌកម្មទេ (ចង់មានន័យថាប្រទេសផ្សេងចង់ដាក់ទណ្ឌកម្មរុស្ស៊ីក៏ដាក់ចុះ ប៉ុន្តែអាមេរិកមិនដាក់ទេ)។ អ្នកការទូតអឺរ៉ុបបីនាក់ប្រាប់ថាលោកត្រាំចង់ដាក់សម្ពាធលើលោកពូទីន។ ប៉ុន្តែលោកមិនទាន់សម្រេចចិត្តចាត់វិធានការជាក់ស្ដែងទេ៕
ចែករំលែកព័តមាននេះ