រាជធានីភ្នំពេញ ៖ អ្នកនាំពាក្យប្រធានព្រឹទ្ធសភា កម្ពុជាបានអះអាងថា គ្មានសម័យកាលណាដែលថៃកោតខ្លាចញញើតខ្មែរ ជាងសម័យតេជោ ហ៊ុន សែន និងសម្តេចធិបតី ហ៊ុន…
រាជធានីភ្នំពេញ ៖ អ្នកនាំពាក្យប្រធានព្រឹទ្ធសភា កម្ពុជាបានអះអាងថា គ្មានសម័យកាលណាដែលថៃកោតខ្លាចញញើតខ្មែរ ជាងសម័យតេជោ ហ៊ុន សែន និងសម្តេចធិបតី ហ៊ុន ម៉ាណែតនោះទេ ។
ការលើកឡើងរបស់ឯកឧត្តម ជា ធីរិទ្ធ អ្នកនាំពាក្យព្រឹទ្ធសភាបន្ទាប់ពីមានមតិនិយាយអំពីសម្តេចតេជោ និងលោក ថាក់ ស៊ិនស៊ីណាវ៉ាត់ត្រា ជាបងប្អូនធម៌នឹងគ្នា ហើយមិនអាចដោះស្រាយបញ្ហាព្រំដែនចេញបាននោះទេ ខណៈបញ្ហាព្រំដែនកម្ពុជា-ថៃកំពុងឡើងកម្តៅជាខ្លាំង និងស្របពេលមានការផ្សព្វផ្សាយសំឡេងសន្ទនារវាងសម្តេចតេជោ និងលោកស្រី ផែថងថាន ស៊ីណាវ៉ាត់ត្រា នាយករដ្ឋមន្ត្រីថៃ កាលពីថ្ងៃ១៨ មិថុនា ។
ក្នុងសំឡេងសន្ទនានោះ លោកស្រី ផែថងថាន បានស្នើឲ្យសម្តេចតេជោ បើកច្រកព្រំដែនដើម្បីនាំចូលបន្លែផ្លែឈើពីថៃ ប៉ុន្តែត្រូវបានសម្តេចបដិសេធដោយឲ្យភាគីថៃជាអ្នកបិទមុន ត្រូវតែជាអ្នកបើកមុន ។
អ្នកនាំពាក្យប្រធានព្រឹទ្ធសភា បានលើកឡើង នាថ្ងៃ១៨ មិថុនា ថា តាំងពីមានជម្លោះព្រំដែនជាមួយថៃ ខ្លួនលោកផ្ទាល់តែងតែឮសម្តេចតេជោ មានប្រសាសន៍ថា រឿងបងប្អូនធម៌ជារឿងដាក់ដោយឡែកមួយផ្សេងទៀត ប៉ុន្តែរឿងទឹកដីជារឿងជាតិ ដោយមិនអាចយកមកលាយឡំជាមួយរឿងទឹកដី ដើម្បីឲ្យគេប្រមាថ និងឈ្លានពានបានទេ ។
ឯកឧត្តមបានគូសបញ្ជាក់ថា៖ «ខ្ញុំហ៊ាននិយាយថា គ្មានសម័យកាលណា ដែលថៃញញើតខ្មែរជាងសម័យតេជោ និងធិបតីនោះទេ ។ បើអានប្រវត្តិសាស្ត្រ មេដឹកនាំខ្មែរខ្លះកាលពីអតីតកាល ធ្លាប់ត្រូវបានសៀមប្រើប្រាស់» ៕
ចែករំលែកព័តមាននេះ