ចោរ២នាក់ បានធ្វើសកម្មភាពកាត់សោហាងលក់ម្ហូបជប៉ុន រួចចូលលួចសម្ភារ: និងលុយសរុបគិតជាសាច់ប្រាក់ប្រមាណ៥ពាន់ដុល្លារ រួចរត់គេចខ្លួនបាត់ ។ ហេតុការណ៍នេះ បានកើតឡើង កាលពីវេលាម៉ោង០៣និង២០នាទីទៀបភ្លឺ ឈានចូលថ្ងៃទី០៩…
ចោរ២នាក់ បានធ្វើសកម្មភាពកាត់សោហាងលក់ម្ហូបជប៉ុន រួចចូលលួចសម្ភារ: និងលុយសរុបគិតជាសាច់ប្រាក់ប្រមាណ៥ពាន់ដុល្លារ រួចរត់គេចខ្លួនបាត់ ។
ហេតុការណ៍នេះ បានកើតឡើង កាលពីវេលាម៉ោង០៣និង២០នាទីទៀបភ្លឺ ឈានចូលថ្ងៃទី០៩ ខែកក្កដា ឆ្នាំ២០២៥ នៅចំណុចហាងយីហោ Metal Rice Bowl Teppanyaki (លក់ម្ហូបបែបជប៉ុន) តាមបណ្តោយផ្លូវលេខ១២៣ ភូមិ៤ សង្កាត់ទួលទំពូងទី១ ខណ្ឌចំការមន រាជធានីភ្នំពេញ ។
យោងតាមការបញ្ជាក់ពីស្ត្រី ជាតំណាងម្ចាស់ហាងជនជាតិបរទេស បានប្រាប់អោយដឹងថា ពេលព្រឹកឡើង រូបគាត់ បានមកបើកទ្វារ ដើម្បីបើកហាងលក់ដូរ ខណៈដើរមកដល់ខាងមុខទ្វារ ក៏ស្រាប់តែឃើញសោដែលខ្លួនបានចាក់នោះបានដាច់ ទើបមានការភ្ញាក់ផ្អើលឡើង ហើយរត់ទៅមើលសម្ភារៈខាងក្នុងហាងបានបាត់អស់ និងសាច់ប្រាក់សុទ្ធមួយចំនួន ។ ខណៈនោះដែរ ជនរងគ្រោះ បើកមើលកាំមេរ៉ាសុវត្ថិភាព ប្រទះឃើញជនសង្ស័យ០២នាក់ បានធ្វើសកម្មភាពកាត់សោចូលលួចក្នុងហាង និងលួចយកសម្ភារៈ ។
ប្រភពដដែលបន្តថា សម្ភារៈដែលបាត់បង់រួមមាន ៖ កំព្យូទ័រ, អាយផេត, ទូរស័ព្ទម៉ាក Iphone, ម៉ាស៊ីនគិតលុយ, ស្រា និងសាច់ប្រាក់មួយចំនួន ដោយគិតជាទឹកប្រាក់សរុប អស់ប្រហែល ៥ពាន់ដុល្លារ ។ ចំណែកជនសង្ស័យទាំង០២នាក់ខាងលើ រត់គេចខ្លួនបាត់ស្រមោល ។
ក្រោយកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នរគបាលទួលទំពូងទី១ ដើម្បីធ្វើការស្រាវរកមុខសញ្ញាយកមកដាក់ទោសតាមផ្លូវច្បាប់ ៕
ចែករំលែកព័តមាននេះ