ខេត្តសៀមរាប ៖ លោក អាំង សុភា ចៅក្រម​ស៊ើបសួរ និង​ជា​អនុប្រធាន​នៃ​សាលាដំបូង​ខេត្ត​បាន​សម្រេច​ឃុំខ្លួន​ជនសង្ស័យ​ម្នាក់​ឈ្មោះ ហុង ភា ភេទ​ប្រុស អាយុ​៣០​ឆ្នាំ បច្ចុប្បន្ន រស់នៅ​ភូមិ​បន្ទាត់​បោះ ឃុំ​ដាន​រុន ស្រុក​សូទ្រនិគម ខេត្តសៀមរាប និង​ជា​ម្ចាស់​ហ្វេ​ស​ប៊ុ​ក​ឈ្មោះ «​ខ្មែរ ខ្មែរ​» ដែល​បាន​បង្ហោះ​ឆបោក និង​កៀរគរ​ថវិកា​ពី​សប្បុរ​ជន​ដាក់គុក​បណ្តោះអាសន្ន តាម​មាត្រា 377 និង 378 នៃ​ក្រមព្រហ្មទណ្ឌ ។

បើ​តាម​ប្រភព​ពី​សមត្ថកិច្ច​ជំនាញ​បាន​ប្រាប់ នៅ​ថ្ងៃ​ទី​១០ ខែកក្កដា ឆ្នាំ​២០២៥ នេះ​ថា ដោយ​បានការ​យកចិត្តទុកដាក់ និង​ដឹកនាំ​បញ្ជា​ដោយ​ផ្ទាល់​ដោយ​លោក​ឧត្តមសេនីយ៍ទោ ហួត សុធី ស្នងការ​នៃ​ស្នងការដ្ឋាន​នគរបាល​ខេត្តសៀមរាប និង​មានការ​សម្របសម្រួល​នីតិវិធី​ពី​លោក មាស ច័ន្ទ​ពិសិដ្ឋ ព្រះរាជអាជ្ញា​នៃ​អយ្យការ​អម​សាលាដំបូង​ខេត្តសៀមរាប នៅ​ល្ងាច​ថ្ងៃ​ទី​៨ ខែកក្កដា ឆ្នាំ​២០២៥ កម្លាំង​ការិយាល័យ​ប្រឆាំង​បទល្មើស​បច្ចេកវិទ្យា និង​កម្លាំង​នៃ​អធិការដ្ឋាន​នគរបាល​ស្រុក​សូទ្រនិគម បាន​ចូលរួម​សហការ​ជាមួយ​កម្លាំង​នាយកដ្ឋាន​ប្រឆាំង​បទល្មើស​បច្ចេកវិទ្យា បាន​ធ្វើការ​ស្រាវជ្រាវ​រហូត​ឈាន​ដល់​ការ​ឃាត់ខ្លួន​ជនសង្ស័យ​ម្នាក់​ឈ្មោះ ហុង ភា ភេទ​ប្រុស អាយុ​៣០​ឆ្នាំ បច្ចុប្បន្ន រស់នៅ​ភូមិ​បន្ទាត់​បោះ ឃុំ​ដាន​រុន ស្រុក​សូទ្រនិគម ខេត្តសៀមរាប ក្នុង​ករណី​ឆបោក តាម​រយៈ​បណ្តាញ​សង្គម ដែល​បាន​បង្កើត​គណនី​ហ្វេ​ស​ប៊ុ​កមួយ​មាន ឈ្មោះ «​ខ្មែរ ខ្មែរ​» (​ប្រើប្រាស់​បច្ចុប្បន្ន​) និង​គណនី​ហ្វេ​ស​ប៊ុ​ក​ចំនួន​០៤​ទៀត ដែល​មានឈ្មោះ ហុង ភា​, ម៉េ​សៀមរាប​, Ah Su, ម៉ែ សៀមរាប​ផង​ដែរ ។

ក្នុង​ប្រតិបត្តិការ​ឃាត់ខ្លួន​បាន​ជន​ឆបោក​នៅ​ក្រៅ​ផ្ទះ​នេះ ធ្វើ​ឡើង​នៅ​ថ្ងៃ​ទី​៨ ខែកក្កដា ឆ្នាំ​២០២៥ វេលា​ម៉ោង​៩​យប់ ក្នុងភូមិ​សាស្ត្រ ស្រុក​សូទ្រនិគម ខេត្តសៀមរាប និង​ក្រោម​ការ​បញ្ជា​ផ្ទាល់​ពី​នាយ​ឧត្តមសេនីយ៍ ស ថេ​ត អគ្គស្នងការ​នគរបាល​ជាតិ​ផង​ដែរ ។

ដោយ​ក្នុង​អំឡុង​ឆ្នាំ​២០២៥ នេះ ជនសង្ស័យ​ខាងលើ បាន​ប្រើប្រាស់​គណនី​ហ្វេ​ស​ប៊ុ​ក ឈ្មោះ «​ខ្មែរ ខ្មែរ​» បង្ហោះ​នូវ​រូបភាព​កុមារ​កំព្រា​ជន​ពិការ ដ៏​គួរ​ឱ្យ​សោក​ស​ង្រែ​ង ដែល​កំពុង​ត្រូវការ​ថវិកា​មួយ​ចំនួន ដើម្បី​ជំនួយ​ពី​សប្បុរសជន​មក​សង្គ្រោះ​បន្ទាន់ និង​រូបភាព​សុំ​ជំនួយ​សម្រាប់​កងទ័ព​ជាដើម ដែល​បង្កើត​ឡើង​ដោយ​បច្ចេកវិទ្យា​បញ្ញា​សិប្បនិម្មិត AI ក្នុង​គោលដៅ​ឆបោក​ប្រាក់​ពី​ប្រជាពលរដ្ឋ​ស្លូតត្រង់ ដែល​មានចិត្ត​អាណិតអាសូរ​ពិតប្រាកដ​តាម​រយៈ​ការ​បរិច្ចាគ​ថវិកា តាម QR Code ធនា​គារ អេ​ស៊ី​លី​ដា ឈ្មោះ HONG PHEA (0972388041) និង​ធនាគារ ABA ឈ្មោះ PHEA HONG (005881511) ដែល​ជា​គណនី​ធនាគារ​របស់​ឈ្មោះ ហុង ភា សម្រាប់​ទទួល​ប្រាក់​ដែល​បាន​មក​ពី​ការ​ឧបត្ថម្ភ​នានា​ជា​ច្រើន​ផង​ដែរ ។

តាម​ចម្លើយ​សារភាព​នៅ​ចំពោះ​មុខ​សមត្ថកិច្ច ជនសង្ស័យ​ខាងលើ បាន​បញ្ជាក់​ប្រាប់​ថា កន្លង​មក ខ្លួន​បាន​ទទួល​ប្រាក់​ពី​ការ​បង្ហោះ​ឆបោក​លើ​បណ្តាញ​ទំនាក់ទំនង​សង្គម​ហ្វេ​ស​ប៊ុ​ក សរុប​ជា​ប្រាក់​ប្រហែលជា​២​លាន​រៀល ហើយ​ទឹកប្រាក់​នោះ​ខ្លួន​បាន​យក​ទៅ​ប្រើប្រាស់ ដើម្បី​ដោះស្រាយ​ជីវភាព​

។

បច្ចុប្បន្ន លោក អាំង សុភា ចៅក្រម​ស៊ើបសួរ និង​ជា​អនុប្រធាន​នៃ​សាលាដំបូង​ខេត្តសៀមរាប បាន​សម្រេច​ឱ្យ​កម្លាំង​ការិយាល័យ​ជំនាញ​នៃ​ស្នងការដ្ឋាន​នគរបាល​ខេត្ត សៀមរាប​ដឹក​យក​ទៅ​ឃុំខ្លួន​ជនសង្ស័យ​ម្នាក់​ឈ្មោះ ហុង ភា ភេទ​ប្រុស អាយុ​៣០​ឆ្នាំ ដាក់​ពន្ធនាគារ​បណ្តោះអាសន្ន នៅ​ក្នុងភូមិ​សាស្ត្រ​សង្កាត់​ជ្រាវ ក្រុង​សៀមរាប ខេត្តសៀមរាប ។

សូម​បញ្ជាក់​ផង​ដែរ​ថា ដោយសារ​មាន​បច្ចេកវិទ្យា AI កាន់តែ​មាន​ភាព​រីក​ចម្រើន ការ​បង្កើត​រូបភាព​សិប្បនិម្មិត​នានា​កាន់តែ​មាន​ភាព​ស្រ​ដៀង​ទៅ​នឹង​រូបភាព​ពិត​ប្រាកដជា​ខ្លាំង ដែល​ធ្វើ​ឱ្យ​សាធា​រណជន​ទូទៅ​កាន់តែ​មាន​ផល​ពិបាក​ក្នុង​ការ​បែក​ចែក​រវាង​រូបភាព​ពិតប្រាកដ និង​រូបភាព​សិប្ប
និម្មិត ដូច្នេះ ត្រូវ​បាន​ជនខិលខូច​ឆ្លៀតឱកាស ប្រើប្រាស់​នូវ​រូបភាព​សិប្បនិម្មិត​ទាំងនោះ ធ្វើការ​ផ្សព្វ​ផ្សាយ​តាម​រយៈ​បណ្តាញ​ទំនាក់ទំនង​សង្គម ដើម្បី​ស្នើ​សុំ​ការ​បរិច្ចាគ​ថវិកា​ជំនួយ​សប្បុរស​ទៅ​ឱ្យ​ពួក​គេ ។

អគ្គស្នងការដ្ឋាន​នគរបាល​ជាតិ សូម​អំពាវនាវ​ដល់​ប្រជាពលរដ្ឋ ក៏​ដូច​ជា​អ្នក​និយម​ប្រើប្រាស់​បណ្តាញ​សង្គម មេត្តា​ពិចារណា​ឱ្យ​ច្បាស់លាស់ មុន​នឹង​ធ្វើការ​ផ្ទេរ​ប្រាក់​ទៅ​កាន់​នរណា​ម្នាក់ ចៀស​វាង​នូវ​ការ​ខាតបង់​ផលប្រយោជន៍​ផ្ទាល់ខ្លួន​ជាយថាហេតុ និង​រួម​គ្នា​លុប​បំបាត់​ព័ត៌មាន​ក្លែងក្លាយ​តាម​បណ្តាញ​សង្គម ដោយ​ការ​មិន​ចែករំលែក​ព័ត៌មាន​ក្លែងក្លាយ​ដល់​អ្នក​ដទៃ ៕