ខេត្តមណ្ឌលគិរី ៖ ឯកឧត្តម ថង សាវុន អភិបាលខេត្តមណ្ឌលគិរី កាលពីរសៀលថ្ងៃទី១២ ខែឧសភា ឆ្នាំ២០២៦ បានចុះពិនិត្យដោយផ្ទាល់នូវសកម្មភាពអន្តរាគមន៍ជួសជុល…
ខេត្តមណ្ឌលគិរី ៖ ឯកឧត្តម ថង សាវុន អភិបាលខេត្តមណ្ឌលគិរី កាលពីរសៀលថ្ងៃទី១២ ខែឧសភា ឆ្នាំ២០២៦ បានចុះពិនិត្យដោយផ្ទាល់នូវសកម្មភាពអន្តរាគមន៍ជួសជុល និងកែលម្អផ្លូវខេត្តលេខ៣៧៦៣ ស្ថិតក្នុងសង្កាត់មនោរម្យ ក្រុងសែនមនោរម្យ ដើម្បីឆ្លើយតបទៅនឹងសំណូមពរចាំបាច់របស់ប្រជាពលរដ្ឋក្នុងមូលដ្ឋាននាពេលកន្លងមក ។
នៅក្នុងឱកាសនោះ ឯកឧត្តមអភិបាលខេត្តបានបញ្ជាក់ថា ការកែលម្អហេដ្ឋារចនាសម្ព័ន្ធផ្លូវនេះ គឺមានសារសំខាន់ណាស់ ក្នុងការជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ជាពិសេស គឺជួយឱ្យការដឹកជញ្ជូនកសិផលផ្សេងៗទៅកាន់ទីផ្សារបានកាន់តែងាយស្រួល និងរហ័សជាងមុន។
លើសពីនេះ ផ្លូវដែលជួសជុលរួចនឹងផ្តល់ភាពងាយស្រួលដល់សិស្សានុសិស្ស ក្នុងការធ្វើដំណើរទៅកាន់សាលារៀន ។ ស្ត្រីមានផ្ទៃពោះ និងអ្នកជំងឺ ងាយស្រួលក្នុងការធ្វើដំណើរទៅកាន់មន្ទីរពេទ្យ ឬមណ្ឌលសុខភាពបានទាន់ពេលវេលា។
ឯកឧត្តម ថង សាវុន ក៏បានបង្ហើបឱ្យដឹងផងដែរ អំពីផែនការទៅថ្ងៃអនាគតថា រដ្ឋបាលខេត្តមានគម្រោងនឹងប្រែក្លាយផ្លូវទាំងនេះ ទៅជាផ្លូវបេតុងឱ្យបានរឹងមាំ ដើម្បីបម្រើផលប្រយោជន៍យូរអង្វែងជូនដល់ប្រជាពលរដ្ឋក្នុងខេត្តមណ្ឌលគិរី ។
ក្នុងឱកាសចុះពិនិត្យដោយផ្ទាល់នោះ ឯកឧត្តម ថង សាវុន បានផ្តល់ការណែនាំ និងជម្រុញយ៉ាងម៉ឺងម៉ាត់ដល់មន្ត្រីជំនាញនៃមន្ទីរសាធារណការ និងដឹកជញ្ជូនខេត្ត ត្រូវយកចិត្តទុកដាក់ពន្លឿនការងារជួសជុល កែលម្អផ្លូវមួយខ្សែនេះឱ្យបានល្អស្អាត និងត្រឹមត្រូវតាមបច្ចេកទេស ដើម្បីបង្កលក្ខណៈងាយស្រួលដល់ការធ្វើដំណើររបស់បងប្អូនប្រជាពលរដ្ឋ ជាពិសេស ប្អូនៗសិស្សានុសិស្សដែលត្រូវធ្វើដំណើរទៅសាលារៀនជារៀងរាល់ថ្ងៃ។
ជាមួយគ្នានេះ ឯកឧត្តមអភិបាលខេត្ត ក៏បានដាក់ចេញនូវវិធានការដល់មន្ត្រីជំនាញ ត្រូវបង្កើនការត្រួតពិនិត្យឱ្យបានតឹងរឹង ចំពោះរថយន្តខ្នាតធំដែលដឹកទំនិញលើសទម្ងន់កំណត់ ។ ឯកឧត្តមបានបញ្ជាក់ថា មន្ត្រីជំនាញត្រូវធ្វើការអប់រំ និងអនុវត្តការផាកពិន័យតាមច្បាប់ជាធរមាន ចំពោះម្ចាស់រថយន្តទាំងឡាយណាដែលបង្កឱ្យខូចខាតផ្លូវថ្នល់ ព្រោះផ្លូវនេះមានសារសំខាន់ខ្លាំងណាស់សម្រាប់សេដ្ឋកិច្ច និងការរស់នៅរបស់ពលរដ្ឋមូលដ្ឋាន ដូច្នេះ យើងមិនត្រូវបណ្តោយឱ្យបុគ្គលមួយចំនួនមកបំផ្លាញទ្រព្យសម្បត្តិរួមនោះទេ។
យោងតាមរបាយការណ៍របស់លោក រស់ គីមធន ប្រធានមន្ទីរសាធារណការ និងដឹកជញ្ជូនខេត្ត បានឱ្យដឹងថា កំណាត់ផ្លូវដែលកំពុងជួសជុលនេះ មានប្រវែងសរុប ១ ០៨៣ ម៉ែត្រ ដោយតភ្ជាប់ពីចំណុចមុខមន្ទីរវប្បធម៍ខេត្ត រហូតដល់ចំណុចផ្លូវកែងបំបែកចូលទឹកជ្រោះដំណាក់ស្តេច ។
លោកបានបញ្ជាក់ថា សកម្មភាពការងារដែលក្រុមការងារកំពុងអនុវត្តយ៉ាងសកម្មរួមមាន ការប៉ះសំបុកមាន់ និងសម្អាតចិញ្ចើមផ្លូវឱ្យមានសណ្តាប់ធ្នាប់។ការឈូសឆាយ បង្ក្រាបដីនិងសម្រួលកម្រិតផ្ទៃផ្លូវឱ្យស្មើល្អ។
ការចាក់ដី ថ្មបំពេញ ត្រង់ចំណុចដែលរងការបាក់ស្រុត ឬក្រឡុកជង្ហុកធ្ងន់ធ្ងរ ដែលបង្កឡើងដោយយានយន្តដឹកជញ្ជូនធុនធ្ងន់។ការស្រោចកៅស៊ូ (DBST) នឹងត្រូវអនុវត្តបន្ទាប់ពីការសម្រួលផ្ទៃផ្លូវរួចរាល់ ដើម្បីធានាបាននូវភាពរឹងមាំ និងការប្រើប្រាស់បានយូរអង្វែង ៕
ចែករំលែកព័តមាននេះ