រាជធានីភ្នំពេញ ៖ កាលពីថ្ងៃទី១២ មករា ក្រុមសហជីពចំនួន៨ បានចេញលិខិតចំហមួយគឺសម្ព័ន្ធសហជីព C.CAWDU សហព័ន្ធសហជីព NIFTUC សម្ព័ន្ធសហជីព CATU សហជីពសេរីកម្មករ FTUWKC សហព័ន្ធសហជីព CUMW សហព័ន្ធសហជីពមិត្តភាពកម្មករ WFUF សហព័ន្ធសហជីពយុវជនឯករាជ្យ IDYTU
រាជធានីភ្នំពេញ ៖ កាលពីថ្ងៃទី១២ មករា ក្រុមសហជីពចំនួន៨ បានចេញលិខិតចំហមួយគឺសម្ព័ន្ធសហជីព C.CAWDU សហព័ន្ធសហជីព NIFTUC សម្ព័ន្ធសហជីព CATU សហជីពសេរីកម្មករ FTUWKC សហព័ន្ធសហជីព CUMW សហព័ន្ធសហជីពមិត្តភាពកម្មករ WFUF សហព័ន្ធសហជីពយុវជនឯករាជ្យ IDYTU និងសម្ព័ន្ធសហជីពជាតិ NTUC ដោយបានប្រកាសពីជំហររបស់ខ្លួនថា ក្រោយពេលមានការបង្ក្រាបពីសំណាក់កងកម្លាំងសមត្ថកិច្ចរដ្ឋាភិបាលមាន នគរបាល ទាហាន និងកងរាជអាវុធហត្ថ មកលើកម្មករនិយោជិត ដែលបណ្តាលឱ្យបាត់បង់ជីវិត៤នាក់ រងរបួសជាង៤០នាក់ និងវាយធ្វើបាប ចាប់ឃុំខ្លួនបណ្តោះអាសន្នចំនួន២៣នាក់រួចមក ធ្វើឱ្យមានអារម្មណ៍ហួសចិត្ត មិនគួរឱ្យជឿ និងសោកស្តាយយ៉ាងក្រៃលែង ។
លិខិតចំហដដែលបន្តថា នៅថ្ងៃទី៤ មករា រាជរដ្ឋាភិបាលកម្ពុជាបានចេញនូវគោលការណ៍ហាមប្រាមយ៉ាងតឹងរុឹងបំផុត និងមិនអនុញ្ញាតឱ្យមានការជួបប្រជុំគ្នារហូតដល់ស្ថានការណ៍ធូរស្រាលឡើងវិញ ។ ដោយយោងលើហេតុការណ៍បាញ់ ការចាប់ខ្លួន និងបង្កហិង្សា យោងលើជំហររបស់និយោជកថា បើកម្មករចូលធ្វើការវិញទើបមានការចរចា និងយោងតាមការហាមប្រាមរបស់រដ្ឋាភិបាល ទើបនៅថ្ងៃទី៥ មករា ២០១៤ យើងខ្ញុំបានប្រជុំគ្នាសម្រេចឱ្យកម្មករនិយោជិតផ្អាកការតវ៉ាជាបណ្តោះអាសន្នដើម្បីបញ្ចៀសអំពើហិង្សា ហើយឱ្យកម្មករចូលធ្វើការងារវិញ កាលពីថ្ងៃចន្ទ ទី៦ មករា តទៅ ដោយរង់ចាំការចរចាឡើងវិញទៅលើប្រាក់ឈ្នួល និងអត្ថប្រយោជន៍ផ្សេងៗរបស់កម្មករនិយោជិត ។ នៅពេលកម្មករចូលធ្វើការងារហើយ យើងនៅមើលឃើញមានកងកម្លាំង និងអាជ្ញាធរតាមមូលដ្ឋានបានធ្វើទុក្ខបុកម្នេញ តាមស្រាវជ្រាវ សាកសួរតំណាងសហជីព និងតំណាងសំខាន់ៗនៅតាមមូលដ្ឋាន និងមាននិយោជកមួយចំនួននៅតែមិនទាន់អនុញ្ញាតឱ្យកម្មករនិយោជិតមួយចំនួនចូលធ្វើការងារនៅឡើយ និយោជកខ្លះបានរកលេសបញ្ឈប់ពីការងារដោយមិនសមហេតុផលទៀតផង ។ ដោយសារបញ្ហាធ្ងន់ធ្ងរមិនទាន់ដោះស្រាយចប់ និងរកយុត្តិធម៌ជូនជនរងគ្រោះ ជាពិសេសកម្មករដែលមិនទាន់បានទទួលការឆ្លើយតបសមរម្យលើប្រាក់ឈ្នួលនោះ ទើបកម្មករនិយោជិតតំណាងសហព័ន្ធសហជីពស្នើឱ្យមានការឆ្លើយតបឱ្យបានរហ័សពីសំណាក់និយោជក និងរដ្ឋាភិបាល ។
ជាមួយគ្នានេះ សហជីពអន្តរជាតិ អង្គការជាតិ អង្គការអន្តរជាតិ អង្គការ ILO និងស្ថានទូតប្រទេសមួយចំនួនក៏បានសម្តែងការសោកស្តាយចំពោះអំពើឃោរឃៅរបស់កងកម្លាំងប្រដាប់អាវុធរបស់រដ្ឋាភិបាលដែលបានធ្វើឱ្យអន្តរាយយ៉ាងធ្ងន់ធ្ងរដល់កម្មករ ទាំងទ្រព្យសម្បត្តិ រាងកាយ និងសិទ្ធិសេរីភាព ហើយបានជំរុញឱ្យរដ្ឋាភិបាល ក្រុមហ៊ុន អ្នកផលិត និងអ្នកបញ្ជាទិញ ត្រូវដោះស្រាយរឿងនេះឱ្យបានឆាប់ និងដោយស្មោះត្រង់ទៀតផង ។ នៅថ្ងៃទី៧ មករា មានអ្នកបញ្ជាទិញធំៗជាង៧០% ទៅ៨០% ដែលកុម្មង់ទំនិញពីប្រទេសកម្ពុជាដូចជា H&M, GAP, INDETEX, Adidas, PUMA, LIVI និង Columbia បានចេញលិខិតមករដ្ឋាភិបាល និយោជក និងសហជីព សម្តែងការសោកស្តាយចំពោះអំពើហិង្សាដែលបណ្តាលឱ្យមានការចាប់ខ្លួន អំពើហិង្សា ស្លាប់ និងរងរបួសកម្មករនិយោជិតជាច្រើននាក់ ហើយពួកគេបានស្នើឱ្យមានការចរចាគ្នាមួយដោយស្មោះត្រង់ជាបន្ទាន់ និងបង្កើតឱ្យមានយន្តការដោះស្រាយឱ្យបានល្អនៅថ្ងៃអនាគតទៀតផង ។ លិខិតចំហដដែលនេះបានស្នើថា នៅក្នុងស្ថានភាពនេះ សហជីពអំពាវនាវឱ្យរាជរដ្ឋាភិបាល និងក្រុមហ៊ុនត្រូវ ៖
១-រាជរដ្ឋាភិបាល និងក្រុមហ៊ុន ត្រូវរៀបចំឱ្យមានការចរចាបន្តទៀត ដោយភាពស្មោះត្រង់ និងយ៉ាងលឿនបំផុតតាមដែលអាចធ្វើទៅបានដើម្បីដំឡើងប្រាក់ឈ្នួល និងអត្ថប្រយោជន៍ផ្សេងៗជូនកម្មករនិយោជិត ។
២-ស្នើដល់រាជរដ្ឋាភិបាលត្រូវ ៖
-បង្កើតគណៈកម្មាធិការឯករាជ្យមួយ បើកការសើុបអង្កេតដល់កងកម្លាំង និងអ្នកបញ្ជា ដែលបានបាញ់សម្លាប់លើកម្មករមកផ្តន្ទាទោសតាមច្បាប់ និងសងការខូចខាត ព្រមទាំងសងជំងឺចិត្តទៅដល់ក្រុមគ្រួសារពួកគេ ។
-ដោះលែងកម្មករ និងសកម្មជនសិទ្ធិមនុស្សទាំង២៣នាក់ឱ្យមានសេរីភាពវិញដោយគ្មានលក្ខខណ្ឌ ។
-ព្យាបាល និងសងជំងឺចិត្ត ព្រមទាំងសងការខូចខាតផ្សេងៗទៅដល់អ្នករងរបួសជាង៤០នាក់។
-ស្នើឱ្យអាជ្ញាធរគ្រប់ខេត្ត-ក្រុង បញ្ឈប់ការគំរាមកំហែងគ្រប់រូបភាពទាំងអស់មកលើតំណាងសហជីព និងសកម្មជនសហជីពនៅតាមមូលដ្ឋានផ្សេងៗ ។
៣-និយោជកត្រូវដកពាក្យបណ្តឹង និងបញ្ឈប់ការត្រៀមប្តឹង ហើយនឹងទទួលយកថ្នាក់ដឹកនាំសហជីព សកម្មជន កម្មករនិយោជិតទាំងអស់ដែលបានបញ្ឈប់ឱ្យចូលធ្វើការងារវិញ និងមិនត្រូវរើសអើង គុំកួន ឬចាប់កំហុសពួកគេឡើយ ។
ក្នុងករណីពុំមានការដោះស្រាយណាមួយឱ្យបានសមរម្យ យើងខ្ញុំនឹងបន្តតវ៉ាផ្សេងៗនៅថ្ងៃខាងមុខដ៏ខ្លីជាពុំខាន ។ សូមតំណាងរដ្ឋាភិបាល និងក្រុមហ៊ុនពិចារណាលើជំហររបស់សហជីពនេះឱ្យបានលឿន និងហ្មត់ចត់បំផុត ។ សូមឱ្យបងប្អូនកម្មករនិយោជិត រក្សាភាពស្ងាត់ស្ងៀម រង់ចាំការចរចាដោះស្រាយរបស់យើងខ្ញុំ ៕
ចែករំលែកព័តមាននេះ