ប្រទេសអាហ្វហ្គានីស្ថាន ៖ ទូរទស្សន៍អាហ្វហ្គានីស្ថានTOLO TVរាយការណ៍ថា មនុស្ស៣៤នាក់ស្លាប់ហើយ៦៨នាក់ទៀតរងរបួស ក្នុងការវាយប្រហារភេរវកម្មបំផ្ទុះរថយន្តមួយកាលពីព្រឹកថ្ងៃទី១កក្កដា នៅក្រុងកាប៊ុលនាពេលម៉ោងមានមនុស្សច្រើនកុះករ។
តាមសាក្សីថាពួកអ្នកវាយប្រហារបានលុកចូល នាវេលាម៉ោង៩ព្រឹកម៉ោងក្នុងស្រុក ទៅក្នុងអគារកំពុងសាងសង់មួយ ហើយបានបាញ់តតាំងគ្នាជាមួយកងកម្លាំងសន្តិសុខ បន្ទាប់ពីបំផ្ទុះរថយន្តផ្ទុកគ្រឿងផ្ទុះមួយ។ លោកNUSTRAT RAHIMIអ្នកនាំពាក្យក្រសួងមហាផ្ទៃអាហ្វហ្គានីស្ថានគូសបញ្ជាក់ថា រថយន្តប្រើវាយប្រហារជារថយន្តកាំមីញ៉ុងផ្ទុកគ្រឿងផ្ទុះ សំដៅលើមជ្ឈមណ្ឌលភស្ដុភារនិងវិស្វកម្មរបស់ក្រសួងការពារជាតិដែលកំពុងសាងសង់។
សង្កាត់កើតមានការវាយប្រហារនោះ ដែលមានអគាររដ្ឋជាច្រើនព្រមទាំងស្ថានទូតនានា ពេលមានការវាយប្រហារត្រូវបានកងកម្លាំងសន្តិសុខឡោមព័ទ្ធ ដោយរារាំងអ្នកកាសែតមិនអាចចូលទៅបាន។ ការវាយប្រហារនោះត្រូវបានប្រកាសទទួលខុសត្រូវដោយពួកតាលីបង់។
អ្នកនាំពាក្យរបស់ពួកតាលីបង់លោកហ្សាប៊ីហុលឡាហ៍ម៉ាហ្សាហ៊ីដថ្លែងទៅកាន់សារព័ត៌មានថា ក្រុមយុទ្ធជនរបស់គេវាយប្រហារលើមូលដ្ឋានយោធាមួយនៅក្រុងកាប៊ុល ជាមួយការបំផ្ទុះរថយន្តកាំមីញ៉ុងផ្ទុកគ្រឿងផ្ទុះមួយ ដោយកម្ទេចអគារនោះព្រមទាំងនាំឲ្យមានការបាត់បង់ធ្ងន់ធ្ងរ៕ (កែសម្រួលដោយ ៖ បុប្ផា)
ចែករំលែកព័តមាននេះ