រាជធានីភ្នំពេញ ៖ ជាការឆ្លើយតបនឹងសមាគមន៍រោងចក្រកាត់ដេរនៅកម្ពុជា (GMAC) អគ្គស្នងការរងនៃអគ្គស្នងការនគរបាលជាតិលោកនាយឧត្តមសេនីយ៍ ហឹម យ៉ាន បានអះអាងថា ការដឹកជញ្ជូនទំនិញមានភាពយឺតយ៉ាវ មិនមែនដោយសាររឹតបន្ដឹងច្បាប់ចរាចរណ៍ផ្លូវគោកនោះទេ…
រាជធានីភ្នំពេញ ៖ ជាការឆ្លើយតបនឹងសមាគមន៍រោងចក្រកាត់ដេរនៅកម្ពុជា (GMAC) អគ្គស្នងការរងនៃអគ្គស្នងការនគរបាលជាតិលោកនាយឧត្តមសេនីយ៍ ហឹម យ៉ាន បានអះអាងថា ការដឹកជញ្ជូនទំនិញមានភាពយឺតយ៉ាវ មិនមែនដោយសាររឹតបន្ដឹងច្បាប់ចរាចរណ៍ផ្លូវគោកនោះទេ គឺដោយសារអ្នកបើកបរឲ្យក្រុមហ៊ុនដឹកជញ្ជូនមួយចំនួនមិនគោរពច្បាប់ចរាចរណ៍ និងមិនសហការជាមួយអាជ្ញាធរមានសមត្ថកិច្ច ។
ក្នុងសន្និសីទសារព័ត៌មានស្តីពីស្ថានភាពនៃការអនុវត្តយន្តការចុះត្រួតពិនិត្យលក្ខណៈបច្ចេកទេសយានយន្ត និងបណ្ណបើកបររបស់អ្នកបើកបររថយន្តដឹកទំនិញចេញចូលកំពង់ផែព្រះសីហនុ និងកំពង់ផែភ្នំពេញ នៅថ្ងៃទី២ ខែកក្កដានេះ លោក ហឹម យ៉ាន បានបញ្ជាក់យ៉ាងដូច្នេះថា «កិច្ចការនេះមិនមែនយឺតយាវដោយសារតែការឹតបន្ដឹងច្បាប់នេះទេ ។ យឺតយ៉ាវដោយសារតែក្រុមហ៊ុនដឹកជញ្ជូនទំនិញម្ចាស់យានយន្ដនឹង គឺថា មិនគោរពច្បាប់ចរាចរណ៍ មិនមែនមកពីសមត្ថកិច្ចទេ ឡានដែលគោរពពិនិត្យតែ២នាទី ត្រូវឆ្លងផុតពីការត្រួតពិនិត្យហើយ» ។ លោកសំណូមពរដល់ក្រុមហ៊ុនដឹកជញ្ជូនទំនិញទាំងអស់ ត្រូវគោរពច្បាប់ចរាចរណ៍ ធានាលក្ខណៈបច្ចេកទេសយានយន្តឲ្យបានត្រឹមត្រូវ តាមច្បាប់កំណត់ និងមានឯកសារគ្រប់គ្រាន់ត្រឹមត្រូវតាមច្បាប់កំណត់ ។
សូមរំលឹកថា GMAC កាលពីថ្មីៗកន្លងមកនេះបានស្នើសុំរាជរដ្ឋាភិបាលឲ្យមានដំណោះស្រាយបណ្តោះអាសន្នមួយជាមួយសមាគមអ្នកដឹកជញ្ជូនកម្ពុជា (CAMTA) ពាក់ព័ន្ធ និងការពង្រឹងការអនុវត្តន៍ច្បាប់ចរាចរណ៍របស់គណៈកម្មការជាតិសុវត្ថិភាពចរាចរណ៍ផ្លូវគោក ពីព្រោះសមាជិករបស់ GMAC បាននឹងកំពុងក្លាយទៅជាជនរងគ្រោះ នៅក្នុងបញ្ហានេះដោយមិនដឹងខ្លួន ។ វត្ថុធាតុដើមនាំចូល និងផលិតផលសម្រេចនាំចេញជាច្រើនរបស់សមាជិក GMAC ត្រូវបានកកស្ទះ ដែលនឹងអាចបង្កឲ្យមានការខាតបង់ផ្នែកហិរញ្ញវត្ថុក៏ដូចជា ទំនុកចិត្តពីសំណាក់អ្នកបញ្ជាទិញលើភាពអាចទុកចិត្តបានស្តីពីប្រសិទ្ធិភាពនៃការផ្គត់ផ្គង់ទំនិញបានទាន់ពេលវេលា ។
បន្ថែមពីនេះ GMAC អំពាវនាវឲ្យក្រុមហ៊ុនផ្តល់សេវាដឹកជញ្ជូនទំនិញធុនធ្ងន់ទាំងអស់ព្យាយាមគោរពអនុវត្តច្បាប់ស្តីពីចរាចរណ៍ផ្លូវគោកឲ្យបានពេញលេញ ដើម្បីធានានូវសុវត្ថិភាពលើផ្លូវសាធារណៈ និងធានាបាននូវនិរន្តរភាពនៃការផ្តល់សេវាឯកជនដល់អតិថិជនរបស់ខ្លួន ។ នៅថ្ងៃទី២ កក្កដានេះ សមាគមរោងចក្រកាត់ដេរនៅកម្ពុជា សូមសម្តែងការគាំទ្រចំពោះលិខិតលេខ៣៧៥/១៩ គ.ស.ភ ចុះថ្ងៃទី២៨ ខែមិថុនា ឆ្នាំ២០១៩ របស់កំពង់ផែស្វ័យតភ្នំពេញស្នើសុំលោកទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹក ជញ្ជូនឲ្យមានវិធានការដំណោះស្រាយបណ្តោះអាសន្ន ចំពោះការរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក ។
បន្ថែមលើសំណើរបស់កំពង់ផែស្វយ័តភ្នំពេញនោះសមាគមស្នើសុំរាជរដ្ឋាភិបាលកម្ពុជាឲ្យមានដំណោះស្រាយបណ្តោះអាសន្នមួយជាមួយសមាគមដឹកជញ្ជូនកម្ពុជាពាក់ព័ន្ធការពង្រឹងការអនុវត្តច្បាប់ចរាចរណ៍របស់គណៈកម្មការ ជាតិសុវត្ថិភាពចរាចរណ៍ផ្លូវគោក ពីព្រោះសមាជិករបស់សមាគមបាន និងកំពុងក្លាយជាជនរងគ្រោះនៅក្នុងបញ្ហានេះដោយមិនដឹងខ្លួន ។ តែយ៉ាងណាសមាគមរោងចក្រកាត់ដេរនៅកម្ពុជា សូមគាំទ្រ១០០% លើការអនុវត្តច្បាប់របស់គណៈកម្មការជាតិសុវត្ថិភាពចរាចរណ៍ផ្លូវគោក ក្នុងគោលបំណងទប់ស្កាត់ និងកាត់បន្ថយគ្រោះថ្នាក់ចរាចរណ៍ឲ្យបានដល់កម្រិតអតិបរមា ។
សមាគមរោងចក្រកាត់ដេរនៅកម្ពុជាក៏បានអំពាវនាវដល់បណ្តាម្ចាស់ក្រុមហ៊ុនដឹកជញ្ជូនម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ ជាពិសេសក្រុមហ៊ុនដឹកជញ្ជូនទាំងអស់ដែលបាននិងកំពុងផ្តល់សេវាដឹកជញ្ជូនដល់រោងចក្រកាត់ដេរសម្លៀកបំពាក់ ផលិតស្បែកជើង និងកាបូប (Travel Goods) ឲ្យបង្កើនការយកចិត្តទុកដាក់ និងអនុវត្តឲ្យបានខ្ជាប់ខ្ជួនជាអតិបរមានូវរាល់បទដ្ឋានបច្ចេកទេស និងលក្ខខណ្ឌតម្រូវដូចដែលមានចែងនៅក្នុងបទប្បញ្ញត្តិច្បាប់ស្តីពីចរាចរណ៍ផ្លូវគោក ដើម្បីធានានូវសុវត្ថិភាពលើផ្លូវសាធារណៈ និងធានានូវនិរន្តរភាពនៃការផ្តល់សេវាដល់អតិថិជន ។
សូមរំលឹកថា ក្នុងប្រតិបត្តិការចុះត្រួតពិនិត្យ លក្ខណៈបច្ចេកទេសយានយន្ត និងប័ណ្ណបើកបរ នៅកំពង់ផែភ្នំពេញ និងកំពង់ផែព្រះសីហនុ ក្នុងរយៈពេល១៥ថ្ងៃ ក្រុមការងារត្រួតពិនិត្យរឹតបន្តឹង ការអនុវត្តច្បាប់ចរាចរណ៍បានចុះត្រួតពិនិត្យរថយន្ដធុនធំ ១៩៥៩គ្រឿង នៅចំណុចកំពង់ផែស្វយ័តភ្នំពេញ និងកំពង់ផែនស្វយ័តព្រះសីហនុ ក្នុងនោះ រកឃើញរថយន្ដខុសបច្ចេកទេស ចំនួន២២៤គ្រឿង ៕ កែសម្រួលដោយ ៖ សុឃាក់
ចែករំលែកព័តមាននេះ