ខេត្តបន្ទាយមានជ័យ ៖ អ្នកផលិតមាតិកា៣រូប ដែលល្បីឈ្មោះមកពីសហរដ្ឋអាមេរិក បានមកដល់ភូមិព្រៃចាន់ កាលពីថ្ងៃទី១៦ ខែវិច្ឆិកា ឆ្នាំ២០២៥ ក្រោយពីទាហានថៃបានបាញ់រះបណ្ដាលឱ្យអ្នកភូមិព្រៃចាន់ស្លាប់ម្នាក់ និងរបួស៣នាក់…
ខេត្តបន្ទាយមានជ័យ ៖ អ្នកផលិតមាតិកា៣រូប ដែលល្បីឈ្មោះមកពីសហរដ្ឋអាមេរិក បានមកដល់ភូមិព្រៃចាន់ កាលពីថ្ងៃទី១៦ ខែវិច្ឆិកា ឆ្នាំ២០២៥ ក្រោយពីទាហានថៃបានបាញ់រះបណ្ដាលឱ្យអ្នកភូមិព្រៃចាន់ស្លាប់ម្នាក់ និងរបួស៣នាក់ ។
អ្នកផលិតមាតិកាល្បី៣រូបមកពីសហរដ្ឋអាមេរិកមាន ៖
១-លោក គ្រីស រ៉ូឌ្រីហ្គេស (Chris Rodriguez) ម្ចាស់ផេក Travelwithchris ។
២-លោក ជីណា ម៉ាក់ (China Mac) ម្ចាស់ផេក Youtube China Mac TV ។
៣-លោក ជេសស៊ី ថុមសុន ។
អ្នកផលិតមាតិកាទាំង៣នាក់ បានមកភូមិព្រៃចាន់ ដើម្បីផលិតមាតិកាដែលមានអ្នកតាមដានជាង២លាន៦សែននាក់ ក្រោយពេលទាហានសៀមបានបាញ់រះ កាលពីថ្ងៃទី១២ ខែវិច្ឆិកា ឆ្នាំ២០២៥ កន្លងទៅ បណ្តាលឱ្យស្លាប់អ្នកភូមិម្នាក់ និងរបួស៣នាក់ ។
ក្រោយពីបានផលិតមាតិកា ជុំវិញបាតុភាពទាហានថៃបាញ់ប្រហារលើអ្នកភូមិស្លូតត្រង់បណ្តាលស្លាប់ និងរបួសនៅភូមិព្រៃចាន់ ហើយក៏បានបន្តដំណើរទៅសួរសុខទុក្ខប្រជាពលរដ្ឋនៅតំបន់ភៀសសឹកនៅវត្តចាន់ស៊ីសាមគ្គីរតនារាមក្នុងស្រុកអូរជ្រៅ ។
គោលបំណង គឺដើម្បីផ្សព្វផ្សាយឱ្យពិភពលោកបានដឹង និងជួយរកយុត្តិធម៌ដល់កម្ពុជា ដែលទាហានថៃឈ្លានពានអធិបតេយ្យភាពកម្ពុជា និងរំលោភសិទ្ធិមនុស្សជាអន្តរជាតិដោយបើកការបាញ់រះមកលើពលរដ្ឋកម្ពុជាស្លូតត្រង់ ដែលជាអំពើអយុត្តិធម៌បំផុត ។
ពលរដ្ឋភៀសសឹកកើនដល់៨៥០គ្រួសារហើយអ្នកភូមិដែលភៀសសឹកបានកើនឡើងដល់៨៥០គ្រួសារហើយ មកពីភូមិព្រៃចាន់និងភូមិជោគជ័យ គិតត្រឹមថ្ងៃទី១៦ ខែវិច្ឆិកា ឆ្នាំ២០២៥មកស្នាក់នៅក្នុងវត្តចាន់ស៊ីសាមគ្គីរតនារាម ភូមិកូបកើត ឃុំកូប ស្រុកអូរជ្រៅ ។
លោក កែវ តារារស្មី អភិបាលស្រុកអូរជ្រៅថ្លែងថា រហូតមកដល់ពេលនេះ ប្រជាពលរដ្ឋដែលជម្លៀសចេញពីភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ចាប់ពីថ្ងៃទី១២ ដល់ទី១៦ ខែវិច្ឆិកា ឆ្នាំ២០២៥ មកស្នាក់នៅតំបន់សុវត្ថិភាពក្នុងវត្តចាន់ស៊ីសាមគ្គីរតនារាម មានចំនួន៨៥០គ្រួសារ ស្មើនឹង២៨៧៣នាក់ ។
លោក កែវ តារារស្មី បញ្ជាក់ថា ក្នុងរយៈពេល៥ថ្ងៃ ក្រោយពីទាហានបាញ់ប្រហារលើពលរដ្ឋខ្មែរស្លូតត្រង់ ប្រជាពលរដ្ឋខ្មែរបានភៀសមករកកន្លែងសុវត្ថិភាព ដែលអាជ្ញាធរត្រៀម៣កន្លែង ៖
១-វត្តពោធិសូរិយា
២-វត្តអូរជ្រៅ
៣-វត្តចាន់ស៊ីសាមគ្គីរតនាម ដែលមានពលរដ្ឋភៀសសឹកចំនួន ៨៥០គ្រួសារកំពុងស្នាក់នៅ ៕
ចែករំលែកព័តមាននេះ