ព្រះគ្រូចៅអធិការវត្តក្នុងខេត្តសៀមរាប និងរដ្ឋកាលីហ្វ័រញ៉ា ចុះសួរសុខទុក្ខនិងនាំអំណោយជូនវីរៈកងទ័ពក្នុងខេត្តឧត្តរមានជ័យ
- សៀមរាប
ខេត្តសៀមរាប ៖ នៅរសៀលថ្ងៃទី ០៥ ខែ មករា ឆ្នាំ២០២៦នេះ ព្រះវិចិត្រវង្សា ហែម គឹមសាន…
ខេត្តសៀមរាប ៖ នៅរសៀលថ្ងៃទី ០៥ ខែ មករា ឆ្នាំ២០២៦នេះ ព្រះវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក សង្កាត់គោកចក ក្រុង/ខេត្តសៀមរាប និង ព្រះមហាចារ សំ សារ៉ូន ព្រះគ្រូចៅអធិ ការខ្មែរខេមរៈពុទ្ធិការាម(វត្តវេឡូរ៍)រដ្ឋកាលីហ្វ័រញ៉ាសហរដ្ឋអាមេរិកបានដឹកនាំពុទ្ធបរិស័ទ ចុះសួរសុខទុក្ខ និងនាំយកនូវគ្រឿងឧបភោគ បរិ ភោគសម្ភារៈប្រើប្រាស់មួយចំនួនអាវរងារ២៥០ អាវ,ភេសជ្ជៈនិងបច្ច័យមួយចំនួនផ្តល់ជូនដល់បងប្អូនវីរៈកងទ័ពឈរជើងនៅជួរមុខ ចំនួនបីកន្លែងក្នុងភូមិសាស្ត្រខេត្តឧត្តរមានជ័យ ។
ក្នុងនោះដែរ ព្រះវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក និងព្រះមហាចារ សំ សារ៉ូន ព្រះគ្រូចៅ អធិការខ្មែរខេមរៈពុទ្ធិការាម(វត្តវេឡូរ៍)រដ្ឋកាលីហ្វ័រញ៉ា សហរដ្ឋអាមេរិក មានព្រះថេរដីកា អរគុណដល់បងប្អូនវីរៈកងទ័ពជួរមុខដែលបានខិតខំប្រឹងប្រែងការពារបូរណភាពទឹកដី និងរក្សាសន្តិសុខជូនជាតិមាតុភូមិ ។ ព្រះអង្គបានមានព្រះទ័យស្រណោះបងប្អូនវីរៈកងទ័ពដែលត្រូវប្រឈមនឹងការលំបាកសព្វបែបយ៉ាង និងឆ្ងាយពីកូន ប្រពន្ធ គ្រួសារសាច់ញាតិ និង ឪពុកម្តាយ ហាលភ្លៀងហាលខ្យល់ ដេីម្បី ទឹកដីខ្មែរ និង ប្រជារាស្ត្រខ្មែរបានសុខសាន្ត ។
ព្រះអង្គមានថេរដីកាបន្តថា ការការពារខ្លួន និងការពារទ្រព្យសម្បត្តិ ទឹកដី ព្រមទាំងអាយុជីវិត គឺយេីងត្រូវតែការពារក្នុងករណីមានគេមកបំពាន់ ឬមកឆក់ប្លន់ ។ ព្រះអង្គបន្ថែមទៀតថា ការការពារទឹកដីនេះ ជាការបំពេញកតញ្ញូដ៏ប្រសេីរណាស់ ហេីយផលនៃកតញ្ញូនេះនឹងនាំឱ្យកងកម្លាំងប្រកបតែនឹងសុខចម្រេីនជានិច្ច។ ព្រះអង្គបានបួងសួងដល់វត្ថុស័ក្តសិទ្ធិទាំងអស់នៅលើលោក សូមជួយថែរក្សាកងកម្លាំងប្រដាប់អាវុធទាំងអស់ឲ្យទទួលបានជោគជ័យលើសត្រូវដែលឈ្លានពាន យកទឹកដីរបស់យើង និង ដើម្បីថែរក្សាការពារសុខសន្តិភាព ។
ក្នុងនោះដែរតំណាងវីរៈកងទ័ព ក៏បានធ្វើការថ្លែងអំណរគុណ ដល់ព្រះគ្រូចៅអធិការទាំងពីរ និង ព្រះសង្ឃ បងប្អូនពុទ្ធបរិស័ទ ដែលបាននាំយកអំណោយជាគ្រឿងឧបភោគ បរិភោគ និង សម្ភារៈប្រើប្រាស រួមទាំងថវិកា ក្នុងការទ្រទ្រង់ដល់កងកម្លាំងជួរមុខ ដែលបានកំពុងការពារអធិបតេយ្យភាព បូរណភាព ទឹកដី ដើម្បីសុខសន្តិភាពស្ថិរភាព ជូនជាតិមាតុភូមិ ។
លោកបានបន្តថា ទោះបីមានភាពលំបាកយ៉ាងណាក៏ដោយ យុទ្ធមិត្តយើងប្រគៀកស្មាគ្នាការពារ បូរណភាពទឹកដី មិនឱ្យខ្លាំងសត្រូវឈ្លានពានបានឡើយ ៕
ចែករំលែកព័តមាននេះ