ខេត្តកំពង់ស្ពឺ ៖ បុរសចំណាស់ម្នាក់បានស្លាប់ភ្លាមៗនៅកន្លែងកើតហេតុ បុរសអ្នករួមដំណើរម្នាក់ទៀតបានរងរបួសធ្ងន់ធ្ងរត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យបង្អែកត្រពាំងក្រឡឹង ខណៈដែលម៉ូតូរ៉ឺម៉កបុកជាមួយរថយន្តតូរីស ហើយខ្ទាតមនុស្សចូលក្រោមរថយន្តកុងតឺន័រមួយគ្រឿងទៀតបើកបញ្ច្រាសទិសតែម្តង។
ហេតុការណ៍គ្រោះថ្នាក់ចរាចរណ៍ខាងលើបានកើតឡើងកាលពីវេលាម៉ោង០២និង៣០នាទីរសៀលថ្ងៃទី៥ ខែមករា ឆ្នាំ២០២៦ នៅតាមបណ្តោយផ្លូវជាតិលេខ៤ ចន្លោះបង្គោលគីឡូម៉ែត្រលេខ៧៩ ទៅលេខ៨០ ស្ថិតនៅក្នុងភូមិកុមារពេទ្យ ឃុំអូរ ស្រុកភ្នំស្រួច ខេត្តកំពង់ស្ពឺ។
ភាគីខាងម៉ូតូសណ្តោងរ៉ឺម៉កមួយគ្រឿងខាងលើ ពណ៌ខ្មៅ គ្មានផ្លាកលេខ បើកបរដោយឈ្មោះ ទុយ សារិ ភេទប្រុស អាយុ៥៩ឆ្នាំ បានស្លាប់ និងអ្នករួមដំណើរម្នាក់ឈ្មោះ បិន ហាន ភេទប្រុស អាយុ៤៧ឆ្នាំ បានរងរបួសធ្ងន់ ។ ជនរងគ្រោះទាំង២នាក់រស់នៅក្នុងភូមិសំរោងធំ ឃុំសំរោង ស្រុកកៀនស្វាយ ខេត្តកណ្តាល ។
ចំណែករថយន្តប្រភេទទួរីស ម៉ាកសាំងយ៉ុង ពណ៌ខៀវ ពាក់ផ្លាកលេខព្រះសីហនុ2A-7984 អ្នកបើកបរមិនស្គាល់អត្តសញ្ញាណ(បានរត់គេចខ្លួនពីកន្លែងកើតហេតុបាត់ ។
រីឯរថយន្តកុងតឺន័រ ម៉ាកNISSAN DIESEL ពណ៌ស ពាក់ផ្លាកលេខព្រះសីហនុ3A-0323 សណ្តោងសឺមីរ៉ឺម៉ក ពាក់ផ្លាកលេខភ្នំពេញ4A-7746 អ្នកបើកបរមិនស្គាល់អត្តសញ្ញាណ(បានរត់គេចខ្លួនពីកន្លែងកើតហេតុបាត់) ។
នគរបាលស្រុកភ្នំស្រួចបាននិយាយឱ្យដឹងថា នៅមុនពេលកើតហេតុមានម៉ូតូសណ្តោងរ៉ឺម៉កមួយគ្រឿង ជិះគ្នា២នាក់ បានធ្វើដំណើរតាមបណ្តោយផ្លូវជាតិលេខ៤ ពីទិសខាងលិចទៅទិសខាងកើត លុះពេលធ្វើដំណើរមកដល់ចំណុចកើតហេតុខាងលើ បានបុកជាមួយរថយន្តមួយគ្រឿងប្រភេទទួរីសដែលកំពុងបើកបរបញ្ច្រាសទិសគ្នា រួចហើយក៏បានខ្ទាតអ្នកបើករ៉ឺម៉កម៉ូតូ ចូលក្រោមរថយន្តមួយគ្រឿងទៀតប្រភេទរថយន្តកុងតឺន័រ ដែលកំពុងបើកបរពីទិសខាងកើតទៅទិសខាងលិច បណ្តាលឲ្យស្លាប់បុរសម្នាក់បើកបររ៉ឺម៉កម៉ូតូ នៅកន្លែងកើតហេតុភ្លាមៗ ចំណែកអ្នករួមដំណើរ រងរបួសធ្ងន់ធ្ងរ ត្រូវបានដឹកបញ្ជូនទៅសង្គ្រោះនៅមន្ទីរពេទ្យបង្អែកត្រពាំងក្រឡឹង។ ដោយឡែក អ្នកបើកបររថយន្តទាំង២នាក់ បានរត់គេចខ្លួនបាត់ ។
នគរបាលស្រុកភ្នំស្រួចបានបន្តឱ្យដឹងថា ក្រោយកើតហេតុនគរបាលជំនាញបានចុះធ្វើការវាស់វែងនៅកន្លែងកើតហេតុ សពដឹកយកទៅតម្កល់នៅមន្ទីរពេទ្យបង្អែកខេត្តកំពង់ស្ពឺ រង់ចាំសាច់ញាតិមកទទួលយកទៅធ្វើបុណ្យតាមប្រពៃណី។
នគរបាលស្រុកភ្នំស្រួចបានបញ្ជាក់ឱ្យដឹងថាចំពោះវត្ថុតាងទាំង០៣គ្រឿងនគរបាលជំនាញអូសយកទៅរក្សាទុកនៅអធិការដ្ឋាននគរបាលស្រុកភ្នំស្រួចបណ្តោះអាសន្ន រង់ចាំកសាងសំណុំរឿង ដើម្បីបញ្ជូនចាត់ការបន្តតាមផ្លូវច្បាប់ ៕
ចែករំលែកព័តមាននេះ