ប្រទេសស៊ូដង់ ៖ យោងតាមទីភ្នាក់ងារព័ត៌មានផ្លូវការស៊ូដង់ថា មនុស្ស៧នាក់បានត្រូវស្លាប់កាលពីថ្ងៃទី៣០មិថុនានៅស៊ូដង់ ក្នុងឱកាសនៃបាតុកម្មធំ ដើម្បីទាមទារឲ្យពួកយោធាផ្ទេរអំណាចឲ្យជនស៊ីវិលវិញ។ បាតុកម្មនោះនៅតែធ្វើទោះបីមានការដាក់ពង្រាយកងកម្លាំងសន្តិសុខដ៏ច្រើនក៏ដោយ។
ការប្រមូលផ្ដុំគ្នាធ្វើបាតុកម្មកាលពីថ្ងៃទី៣០មិថុនាជាបាតុកម្មធំមួយ ចាប់តាំងពីពួកយោធាបំបែកកាលពីថ្ងៃទី៣មិថុនា ទីតាំងបោះជំរំធ្វើបាតុកម្មនៅមុខទីបញ្ជាការដ្ឋានយោធាក្នុងរដ្ឋធានីខាទុម ក្លាយជាសោកនាដកម្មមួយបណ្ដាលឲ្យមនុស្សស្លាប់ជាច្រើនសិបនាក់ និងនាំឲ្យមានការក្ដៅក្រហាយថ្កោលទោសជាអន្តរជាតិ។
ក្នុងបាតុកម្មនាថ្ងៃទី៣០មិថុនា ប៉ូលិសបានបាញ់ឧស្ម័នបង្ហូរទឹកភ្នែកលើពួកបាតុករច្រើនរយនាក់ ដែលលើកមកដល់ក្នុងចម្ងាយប្រមាណ៧០០ម៉ែត្រពីវិមានប្រធានាធិបតី។ បន្ទាប់មកពួកយោធានៃកងកម្លាំងប្រតិកម្មរហ័សប្រមាណជា២៥រថយន្ត ត្រូវបានលើកមកបន្ថែមកម្លាំង។
គឹវិមានប្រធានាធិបតីដែលជាទីតាំងរបស់ក្រុមប្រឹក្សាយោធាកំពុងកាន់អំណាច ក្រោយការទម្លាក់ប្រធានាធិបតី លោកអូម៉ាអែលបេសៀរ បន្ទាប់ពីបាតុកម្មច្រើនខែប្រឆាំងរូបលោក។ ពួកបាតុករបានបរិហារពីអំណាចផ្ដាច់ការយោធា៕ (កែសម្រួលដោយ ៖ បុប្ផា)
ចែករំលែកព័តមាននេះ