ខេត្តកំពង់ឆ្នាំង ៖ ប្រជាពលរដ្ឋ២១គ្រួសាររស់នៅឃុំដារ និងឃុំច្រណូក ស្រុកកំពង់លែង បានសម្តែងការព្រួយបារម្ភអំពីដីស្រែរបស់ពួកគាត់នៅចំណុចគោកព្រះដែលធ្លាប់អាស្រ័យផលជារៀងរាល់ឆ្នាំ ស្រាប់តែឆ្នាំនេះត្រូវបានអាជ្ញាធរ និងមន្ត្រីជំនាញហាមឃាត់ដោយប្រាប់ថា ជាដីតំបន់៣ ប៉ុន្តែពួកគាតថា…
ខេត្តកំពង់ឆ្នាំង ៖ ប្រជាពលរដ្ឋ២១គ្រួសាររស់នៅឃុំដារ និងឃុំច្រណូក ស្រុកកំពង់លែង បានសម្តែងការព្រួយបារម្ភអំពីដីស្រែរបស់ពួកគាត់នៅចំណុចគោកព្រះដែលធ្លាប់អាស្រ័យផលជារៀងរាល់ឆ្នាំ ស្រាប់តែឆ្នាំនេះត្រូវបានអាជ្ញាធរ និងមន្ត្រីជំនាញហាមឃាត់ដោយប្រាប់ថា ជាដីតំបន់៣ ប៉ុន្តែពួកគាតថា បើជាដីតំបន់៣ ហេតុអីដីលោកស្នងការរងគេភ្ជួរបាន គាត់ភ្ជួរលើដីស្រែរបស់ពួកគាត់ធ្លាប់អាស្រ័យផលសោះបែរជាមិនបានទៅវិញ ។
ជួបជាមួយភ្នាក់ងារ កោះសន្តិភាព កាលពីព្រឹកថ្ងៃទី៣០ ខែមិថុនា ឆ្នាំ២០១៩ លោក ញ៉េស ខា តំណាងឲ្យប្រជាពលរដ្ឋ២១គ្រួសារ ដែលកំពុងតែជួបបញ្ហាភ្ជួរស្រែមិនបានឲ្យដឹងថា ៖ ដីស្រែពួកគាត់ទាំង២១គ្រួសារ មានប្រមាណជាង១០០ហិកតា ពួកគាត់បានអាស្រ័យផលតាំងពីឆ្នាំ២០០៨មកម្ល៉េះ គឺរហូតដល់បច្ចុប្បន្ន ដោយមិនដែលខកខាននោះទេ ដូចដែលឃើញនៅទីនេះស្រាប់គឺសុទ្ធតែដីស្រែដែលមានកញ្ច្រាំងស្រូវ ដែលគាត់ធ្វើកាលពីឆ្នាំកន្លងទៅនៅឡើយ ។
គាត់មិនដឹងថា មានរឿងអ្វីទេស្រាប់តែឆ្នាំនេះត្រូវបានអាជ្ញាធរហាមឃាត់មិនអនុញ្ញាតឲ្យភ្ជួរស្រែ លើដីធ្លាប់បង្កបង្កើនផលដូចដូចមុនទៀតឡើយហើយបើថា ជាដីតំបន់៣ចុះហេតុអីដីលោកស្នងការរងនគរបាលខេត្តកំពង់ឆ្នាំងគេភ្ជួរបាន ដូចអ្នកសារព័ត៌មានឃើញស្រាប់ នៅជាប់គ្នានេះគេកំពុងតែភ្ជួរ ចុះហេតុអីមកហាមតែពួកគាត់ហើយបើហាមសុំហាមទាំងអស់គ្នា កុំហាមតែប្រជាពលរដ្ឋ ចំណែកខាងមន្ត្រីរាជាការភ្ជួរបាន ។ សូមសំណូមពរដល់អភិបាលខេត្តកំពង់ឆ្នាំងមន្ទីរជំនាញ សូមមេត្តាឲ្យគាត់បានធ្វើស្រែលើដីស្រែដែលគាត់ធ្លាប់ធ្វើកន្លងមកផង ។
ទាក់ទងនឹងបញ្ហានេះលោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំងបានបញ្ជាក់ថា មិនមានមន្ត្រីជំនាញណាឬអាជ្ញាធរមូលដ្ឋានណាហាមឃាត់ពួកគាត់នោះទេឲ្យតែជាដីរបស់ពួកគាត់ធ្លាប់អាស្រ័យផលជារៀងរាល់ឆ្នាំការលើកឡើងខាងលើនេះគឺមិនត្រឹមត្រូវនោះទេ កុំតែទៅភ្ជួរលើដីព្រៃលិចទឹក ។
ដោយឡែក លោក សំ ចាន់ថន អភិបាលស្រុកកំពង់លែងបានឲ្យដឹងថា គ្មានការហាមឃាត់ការភ្ជួរស្រែនោះទេ ប៉ុន្តែឆ្នាំនេះចាំបាច់ត្រូវសុំច្បាប់ ។ ពួកគាត់ត្រូវធ្វើពាក្យស្នើសុំភ្ជួរស្រែហើយពេលបានច្បាប់សមត្ថកិច្ច និងមន្ត្រីជំនាញគេនឹងចុះទៅពិនិត្យដាក់ ជីភីអេស ដើម្បីឲ្យគាត់ភ្ជួរស្រែលើដីគាត់ធ្លាប់ធ្វើកន្លងមក ដើម្បីចៀសវាងការលួច ឈួសដីព្រៃលិចទឹក តែប៉ុណ្ណោះ ។
ជាក់ស្ដែងដីនៅចំណុចគោកព្រះនេះដែរកាលពីអំឡុងបុណ្យទន្លេក៏មានជនខិលខូចលួចទៅភ្ជួររានយកព្រៃលិចទឹកអស់ប៉ុន្មានហិកតា ។ ដីដែលលួចឈូសយកពេលនោះក៏មិនអនុញ្ញាត្តិអោយភ្ជួរដែរទុកអោយព្រៃដុះឡើងវិញសម្រាប់ត្រីពងកូន ។ ដោយឡែកដីលោក ស៊ុំ សុជាតិ ដែលជាស្នងការរងនគរបាលខេត្តកំពង់ឆ្នាំងហេតុអីគាត់ភ្ជួរបានមកពីគាត់បានសុំច្បាប់អនុញ្ញាត ៕
កែសម្រួលដោយ ៖ សំណាង
ចែករំលែកព័តមាននេះ