អ្នកគាំទ្រដល់ថ្នាក់ហើបគូទពីកៅអី ព្រោះស្នៀតប្លែកចម្លែកៗរបស់បង្គោលខៀវ

ថ្ងៃទី ៣០ ខែ មិថុនា ឆ្នាំ ២០១៩

ម៉ោង ០៩:០២

រាជធានីភ្នំពេញ ៖ នៅទីបំផុត ការប្រកួតកាលពីថ្ងៃសៅរ៍ ទី២៩ មិថុនា នៅលើសង្វ្រៀនប៉ុស្តិ៍លេខ៥ កីឡាករបង្គោលខៀវ បានសម្រេចគោលដៅគួរឱ្យសរសើរ ក្នុងពេលដែលការប្រកួតថ្ងៃនោះ មិនមែនការប្រកួតដណ្តើមពានរង្វាន់ដូចសប្តាហ៍កន្លងទៅ ព្រោះត្រូវទុកមួយសប្ដាហ៍ ឱ្យអ្នកដែលមានឈ្មោះឡើងដល់វគ្គផ្តាច់ព្រ័ត្រ មានពេលហ្វឹកហាត់ ដណ្តើមយកពានជើងឯក ក្នុងរដូលកាលទី៥ ប្រភេទទម្ងន់៥៤គីឡូក្រាម។

ហើយការប្រកួតផ្ដាច់ព្រ័ត្រ នឹងលេចឡើងនៅថ្ងៃទី៦ កក្កដា ឆ្នាំ២០១៩ខាងមុខ។

កីឡាករបង្គោល ខៀវ សល់ ស្រស់ មកពីក្លិបសែនសុខគុនខ្មែរ ត្រូវគេឱ្យប៉ះប្រកួតជាមួយកីឡាករ សេក សារ៉ាន់ មកពីក្លិបអង្គរមានជ័យខេត្តសៀមរាប។ ១គូនេះ គ្រាន់តែជាគូបើកឆាកដំបូង ប៉ុន្តែទំហំនៃការបញ្ចេញយុទ្ធគុនមហាសម្បូរក្បាច់វាយដាក់គ្នាធ្វើឲ្យអ្នកមើលនឹកស្មានមិនដល់ថា ពួកគេធ្វើឲ្យកន្ត្រាក់យ៉ាងចម្លែកដល់ថ្នាក់ហើបគូទពីកៅអី។

រយៈពេល៥ទឹកឃើញថា សល់ ស្រស់ មានតែមជាង សារ៉ាន់ មួយទឹកៗវាយស៊ីពិន្ទុជាប់ដោយមានស្នៀតប្លែកៗសឹងថា សារ៉ាន់ ភ្ញាក់ផ្អើលរហូតទប់មិនចង់ជាប់ពីមួយទឹកទៅមួយទឹក ឯកម្លាំងវិញក៏ថមថយជាលំដាប់។ នៅទីបំផុត ក្រោយបញ្ចប់ការប្រកួតផ្លូវការកីឡាករ សល់ ស្រស់ ត្រូវប្រកាសឲ្យទទួលជ័យជំនះ ស្របពេលដែលសារ៉ាន់ ក៏ដឹងថា ខ្លួនពិតជាចាញ់នាឱកាសចេញលទ្ធផល។ (កែសម្រួលដោយ ៖ បុប្ផា)