សហរដ្ឋអាមេរិក-ចិន ៖ ប្រទេសចិនកាលពីថ្ងៃទី២៧ មិថុនា បានឆ្លើយតបចំពោះការគំរាមចុងក្រោយទាំងឡាយ របស់សហរដ្ឋអាមេរិកយកពន្ធគយបន្ថែម លើបណ្ដាផលិតផលចិន ដោយស្នើដល់ភាគីអាមេរិកឲ្យយកត្រចៀកស្ដាប់ សំឡេងរបស់សហគមន៍អន្តរជាតិ ដែលប្រឆាំងនឹងលទ្ធិឯកតោនិយម…
សហរដ្ឋអាមេរិក-ចិន ៖ ប្រទេសចិនកាលពីថ្ងៃទី២៧ មិថុនា បានឆ្លើយតបចំពោះការគំរាមចុងក្រោយទាំងឡាយ របស់សហរដ្ឋអាមេរិកយកពន្ធគយបន្ថែម លើបណ្ដាផលិតផលចិន ដោយស្នើដល់ភាគីអាមេរិកឲ្យយកត្រចៀកស្ដាប់ សំឡេងរបស់សហគមន៍អន្តរជាតិ ដែលប្រឆាំងនឹងលទ្ធិឯកតោនិយម លទ្ធិគាំពារនិយមនិងការសម្លុតគំរាម។
អ្នកនាំពាក្យក្រសួងការបរទេសចិនលោក GENG SHUANG ថ្លែងបែបនេះ ក្នុងឱកាសនៃសន្និសីទសារព័ត៌មានមួយនៅក្រុងប៉េកាំង។ យោងតាមព័ត៌មានមួយចំនួនថា ក្នុងបទសម្ភាសន៍មួយកាលពីថ្ងៃទី២៦ មិថុនា ប្រធានាធិបតីអាមេរិកលោក ដូណាល់ ត្រាំ បានគូសបញ្ជាក់ថា សហរដ្ឋអាមេរិក និងចិនបានផ្លាស់ប្ដូរទស្សនៈគ្នាលើចំណុចនានាស្ដីពីបណ្ដាបញ្ហាសេដ្ឋកិច្ច និងពាណិជ្ជកម្ម រយៈពេលប៉ុន្មានថ្ងៃចុងក្រោយនេះ ។
តាមលោក ត្រាំ ថាភាគីទាំង២អាចឈានដល់កិច្ចព្រមព្រៀងមួយ នាឱកាសនៃកិច្ចប្រជុំកំពូលរបស់ G20 នៅទីក្រុងអូសាកា ជប៉ុន បើមិនដូច្នេះទេសហរដ្ឋអាមេរិកនឹងដាក់ពន្ធគយបន្ថែមចំពោះចិន ។
អ្នកនាំពាក្យក្រសួងការបរទេសចិននិយាយថា ចិនប្រកាន់ជានិច្ចនូវជំហរដែលថា ជម្លោះពាណិជ្ជកម្មរវាងប្រទេសទាំង២ត្រូវដោះស្រាយតាមរយៈការចរចា និងការពិគ្រោះគ្នាហើយទន្ទឹមនឹងនេះ ចិននឹងការពារដោយម៉ឺងម៉ាត់បណ្ដាសិទ្ធិនឹងផលប្រយោជន៍ស្របច្បាប់របស់ខ្លួន ។ ប្រជាជនចិននឹងមិនភ័យខ្លាចចំពោះការគំរាមកំហែងរបស់សហរដ្ឋអាមេរិក ទាក់ទិននឹងការយកពន្ធបន្ថែម ហើយដាច់ខាតមិនចុះញ៉មចំពោះការគាបសង្កត់ឡើយ ។
លោក GENG SHUANG បន្តថា ខ្ញុំចង់គូសបញ្ជាក់ជាថ្មីម្ដងទៀតចំពោះភាគីអាមេរិកថា សង្គ្រាមពាណិជ្ជកម្ម និងការបង្កើនពន្ធបន្ថែមក៏បំផ្លាញបណ្ដាអ្នកដទៃ ហើយវាក៏ប៉ះពាល់ដល់ខ្លួនឯងដែរ និងថាអំពើបែបនោះនឹងនាំឲ្យមានភាពទ័លច្រកក្នុងការដោះស្រាយបណ្ដាបញ្ហា។
លោកស្នើដល់សហរដ្ឋអាមេរិកឲ្យស្ដាប់សំឡេងប្រឆាំងចំពោះសង្គ្រាមពាណិជ្ចកម្ម និងការបង្កើនពន្ធបន្ថែមនៅខាងក្នុងប្រទេសខ្លួន និងស្ដាប់សំឡេងប្រឆាំងរបស់សហគមន៍អន្តរជាតិ ចំពោះលទ្ធិឯកតោនិយម គាំពារនិយមនិងការសម្លុតគំរាម។
លោកគូសបញ្ជាក់ថា ចិនសង្ឃឹមថាភាគីអាមេរិកអាចបោះជំហានមួយ ក្នុងទិសដៅកាត់បន្ថយការព្រួយបារម្ភរបស់ម្ខាងៗ ហើយសម្រេចបានលទ្ធផលឈ្នះឈ្នះឈរលើមូលដ្ឋាននៃការគោរពគ្នាទៅវិញទៅមក ស្មើភាពនិងចំណេញដូចគ្នា។ ទាំងនោះគឺក្នុងផលប្រយោជន៍របស់ប្រទេសទាំង២និងប្រជាជនទាំង២ ៕
កែសម្រួលដោយ ៖ សំណាង
ចែករំលែកព័តមាននេះ