លោកអ្នកបានជ្រាបរួចមកហើយ អំពីមូលហេតុ និងដំណាក់កាលនៃការធ្វើរោគវិនិច្ឆ័យលើការរលាកបាតភ្នែករបស់អ្នកជំងឺទឹកនោមផ្អែម ។ សម្រាប់លេខនេះ កោះសន្តិភាពសូមលើកយកវិធីសាស្ត្រព្យាបាល និងរបៀបការពារទប់ស្កាត់ការរលាកបាតភ្នែកចំពោះអ្នកជំងឺទឹកនោមផ្អែម ដោយមានការបកស្រាយពីលោកវេជ្ជបណ្ឌិត ងី ម៉េង ប្រធានកម្មវិធីជាតិសុខភាពភ្នែក ។ របៀបព្យាបាលនៃជំងឺរលាកបាតភ្នែកមានបីដំណាក់កាល ៖
១-មុនពេលធ្វើការវះកាត់ គ្រូពេទ្យនឹងពិចារណាទៅលើអាយុ និងប្រវត្តិនៃការព្យាបាលរបស់អ្នកជំងឺទឹកនោមផ្អែម និងសកម្មភាពរស់នៅប្រចាំថ្ងៃរបស់អ្នកជំងឺជាមុនសិន ។ វិធីព្យាបាលជំងឺដែលប្រសើរជាងគេ គឺការបាញ់កាំរស្មីឡាស៊ែចូលទៅក្នុងរេទីន ។ វិធីនេះគឺជាការប្រើប្រាស់កម្តៅដើម្បីទប់ស្កាត់ កុំឱ្យទឹកលឿងជ្រាបចេញពីសរសៃឈាមនៅពេលដែលបាតភ្នែកកំពុងហើម ។ ក្នុងករណីធ្ងន់ធ្ងរដូចជាមានដុះសរសៃឈាមថ្មីខុសប្រក្រតីឡើង គ្រូពេទ្យនឹងធ្វើការបាញ់កាំរស្មីឡាស៊ែ ដើម្បីទប់ស្កាត់ ការដុះលូតលាស់សរសៃឈាមទាំងនោះបន្តទៀត ហើយការបាញ់ឡាស៊ែនេះនឹងអាចជួយសម្រួលបាតភ្នែកដែលជាប់នឹងសាច់ដុំភ្នែកខាងក្នុងផងដែរ ។
ក្នុងដំណាក់កាលទី១ នេះ អ្នកជំងឺត្រូវព្យាបាលដោយការបាញ់កាំរស្មីឡាស៊ែឱ្យបានយ៉ាងតិចម្តង ព្រោះការបាញ់កាំរស្មីដំណាក់កាលទី១ នឹងជួយកាត់បន្ថយការរីកលូតលាស់របស់ជំងឺបាតភ្នែក ។ បើអ្នកជំងឺទទួលបានការព្យាបាលដោយការបាញ់កាំរស្មីឡាស៊ែតាំងពីដំបូងនោះ ឱកាសធ្វើឱ្យគំហើញរបស់អ្នកជំងឺ ក្នុងរយៈពេល៣ឆ្នាំដំបូង នឹងមានកម្រិតទាបជាងអ្នកមិនបានទទួលការព្យាបាល ។ សម្រាប់អ្នកជំងឺដែលគ្រូពេទ្យពិនិត្យឃើញថា បាតភ្នែកស្ថិតក្នុងដំណាក់កាលធ្ងន់ធ្ងរ ការព្យាបាលធ្វើឡើងគ្រាន់តែជួយទប់ស្កាត់ការបាត់បង់ការមើលឃើញរបស់អ្នកជំងឺ កុំឱ្យកាន់តែធ្ងន់ធ្ងរថែមប៉ុណ្ណោះ ដោយអ្នកជំងឺត្រូវតែធ្វើការបាញ់កាំរស្មីឡាស៊ែឱ្យបានយ៉ាងតិច៣ដង អាស្រ័យទៅលើស្ថានភាពជំងឺ ។ ការប្រើប្រាស់កាំរស្មីឡាស៊ែ មិនអាចធ្វើឡើងបានចំពោះអ្នកជំងឺមួយចំនួន ដូចជាអ្នកជំងឺដែលមានឈាមចេញពីទឹកចាហួយភ្នែកបានទេ ព្រោះថាកាំរស្មីមិនអាចរត់កាត់ភាពល្អក់នៃឈាមចូលក្នុងបាតភ្នែកបាន ។
គ្រូពេទ្យអាចធ្វើការលាងសម្អាតឈាមចេញមុននឹងបាញ់កាំរស្មីឡាស៊ែ ដើម្បីឱ្យកាំរស្មីឡាស៊ែអាចរត់ឆ្លងកាត់ចូលទៅដល់បាតភ្នែកបានល្អ ។ ចំពោះករណីខ្លះគ្រូពេទ្យត្រូវរង់ចាំមើលអាការៈជំងឺសិន ព្រោះឈាមអាចរលាយបាត់ទៅវិញដោយឯកឯង ។ ប្រសិនបើបាតភ្នែកហើបចេញនោះ ការវះកាត់ត្រូវតែធ្វើឡើងភ្លាមៗ ដើម្បីសង្គ្រោះពីពិការភាព ។
២-វិធីការពារជំងឺរលាកបាតភ្នែករបស់អ្នកជំងឺទឹកនោមផ្អែម ៖
ភាពជោគជ័យនៃការព្យាបាលជំងឺរលាកបាតភ្នែក ដែលបណ្តាលមកពីជំងឺទឹកនោមផ្អែមមិនអាស្រ័យទៅលើតែការធ្វើរោគវិនិច្ឆ័យនៅក្នុងដំណាក់កាលដំបូង ឬការតាមដានស្ថានភាពជំងឺរបស់គ្រូពេទ្យតែម៉្យាងនោះទេ គឺវាអាស្រ័យទៅលើការថែទាំសុខភាពរបស់អ្នកជំងឺផ្ទាល់ ដូចជាការគ្រប់គ្រងជាតិស្ករ សម្ពាធឈាម និងជាតិខ្លាញ់ក្នុងឈាមឱ្យបានល្អតាមវេជ្ជបញ្ជាផងដែរ ។ សម្រាប់អ្នកជំងឺរលាកបាតភ្នែកក្នុងដំណាក់កាលទី១គប្បីធ្វើលំហាត់ប្រាណឱ្យបានជាប្រចាំទៅតាមវ័យ និងតាមសភាពរាងកាយរបស់ខ្លួនជាការល្អបំផុត ។ ចំពោះអ្នកជំងឺដែលស្ថិតក្នុងដំណាក់កាលទី២វិញ គួរតែធ្វើលំហាត់ប្រាណឱ្យសមល្មមបានហើយ ត្រូវចៀសវាងលំហាត់ប្រាណណាដែលធ្វើឱ្យប៉ះពាល់ខ្លាំងដូចជា ការគ្រវីក្បាល ឬប្រើសាច់ដុំជាដើម ។
៣-ពិការភ្នែកដោយជំងឺទឹកនោមផ្អែមអាចព្យាបាលបាន ៖
ការត្រួតពិនិត្យមើល ការវិវឌ្ឍរបស់ជំងឺរលាកបាតភ្នែកក្នុងដំណាក់កាលទី១ ជាវិធីដែលល្អបំផុតក្នុងការការពារភាពពិការភ្នែក ។ ទោះបីជាគ្មានរោគសញ្ញាណាមួយបង្ហាញក៏ដោយ ក៏គួរតែទៅពិនិត្យភ្នែកឱ្យបានយ៉ាងតិចមួយលើកក្នុងមួយឆ្នាំ ហើយការពិនិត្យបង្ហាញថា មានរលាកបាតភ្នែក អ្នកជំងឺត្រូវតែបន្តទៅពិនិត្យភ្នែកឱ្យបានញឹកញាប់ ដើម្បីទប់ស្កាត់ភាពឈានទៅរកដំណាក់កាលធ្ងន់ធ្ងរ ៕
ចែករំលែកព័តមាននេះ