ខេត្តកំពត ៖ ជនសង្ស័យចំនួន១០នាក់សុទ្ធតែជាក្មេងស្ទាវដែលធ្វើសកម្មភាពស្ទាក់វាយ ប្លន់ម៉ូតូអ្នកដំណើរ ស្ថិតក្នុងភូមិសាស្ត្រឃុំបឹងទូក ស្រុកទឹកឈូ ខេត្តកំពត ត្រូវបានសមត្ថកិច្ចខេត្តកំពតកសាងសំណុំរឿងបញ្ជូនទៅកាន់សាលាដំបូងខេត្តនៅព្រឹកថ្ងៃទី២៦ ខែមិថុនានេះ ។
ទាក់ទិននឹងករណីខាងលើសមត្ថកិច្ចការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពតបានឱ្យដឹងថា ជនសង្ស័យដែលត្រូវបញ្ជូនទៅកាន់សាលាដំបូងខេត្តព្រឹកនេះ គឺជាប់ពាក់ព័ន្ធនឹងករណីស្ទាក់វាយប្លន់ម៉ូតូម៉ាក C125 ផលិតឆ្នាំ២០១៩ មួយគ្រឿងរបស់ជនរងគ្រោះជិះគ្នាបីនាក់ ដែលកំពុងធ្វើដំណើរតាមដងផ្លូវជាតិលេខ៣ (កំពត-វាលរេញ) ចំណុចខាងលិចផ្លូវឡើងទៅរមណីយដ្ឋានឋានសួគ៌បូកគោ ស្ថិតក្នុងភូមិរលួស ឃុំបឹងទូក ស្រុកទឹកឈូ ខេត្តកំពត កាលពីថ្ងៃទី២៣ ខែមិថុនា ឆ្នាំ២០១៩ វេលាម៉ោង១១និង៣០នាទីព្រឹក ដោយសកម្មខាងលើ ។
ក្រុមជនសង្ស័យបានជិះម៉ូតូកៀរ រួចធាក់ផ្តួលម៉ូតូជនរងគ្រោះឱ្យដួល រួចយកដំបងដំថ្មវាយទៅលើជនរងគ្រោះ ហើយប្លន់ម៉ូតូជិះឆ្ពោះទៅទិសខាងលិច ហើយក្រោយពីមានបណ្តឹងរបស់ម្ចាស់ម៉ូតូទើបកម្លាំងសមត្ថកិច្ចសហការគ្នា ឃាត់ខ្លួនជនសង្ស័យបាននៅម្តុំស្ពានកំពង់ស្មាច់ ឃុំទឹកល្អក់ ស្រុកព្រៃនប់ ខេត្តព្រះសីហនុ រួចនាំខ្លួនជនសង្ស័យមកកាន់ស្នងការដ្នាននគរបាលខេត្តកំពតតែម្តង ។
សមត្ថកិច្ចបានបន្តថា ការបង្ក្រាបជនសង្ស័យ១០នាក់នេះកម្លាំងស្នងការដ្ឋាននគរបាលខេត្តកំពតបានសហការជាមួយកម្លាំងអធិការដ្ឋាននគរបាលស្រុកទឹកឈូ និងអធិការដ្ឋាននគរបាលស្រុកព្រៃនប់ ខេត្តព្រះសីហនុ ដោយប្រតិបតិ្តការនេះកម្លាំងបានដកហូតម៉ូតូរបស់ជនសង្ស័យចំនួន៥គ្រឿង ដែលគេជិះឌុបគ្នាធ្វើសកម្មភាពផងដែរ ។
សមត្ថកិច្ចបានបញ្ជាក់ទៀតថា ក្រុមជនសង្ស័យទាំង១០នាក់ រួមមាន ១-ឈ្មោះ ឡុង បញ្ញា អាយុ១៦ឆ្នាំ រស់នៅភូមិទឹកថ្លា សង្កាត់ទឹកថ្លា រាជធានីភ្នំពេញ ២ -ឈ្មោះ វី សុខយី អាយុ១៦ឆ្នាំ រស់នៅភូមិកប់ស្រូវតូច សង្កាត់កូករកា រាជធានីភ្នំពេញ ៣ -ឈ្មោះ ឈួន សិលា ហៅឡា អាយុ១៦ឆ្នាំ រស់នៅផ្ទះជួល ភូមិក្រោលគោ ខណ្ឌឫស្សីកែវ ៤-ឈ្មោះ គឹម រិទ្ធី ហៅធី ភេទប្រុស អាយុ១៦ឆ្នាំ នៅសង្កាត់ក្រាំងធ្នង់ ខណ្ឌពោធិសែនជ័យ ៥-ឈ្មោះ សេង វីរៈ ហៅប៉ក់ អាយុ១៦ឆ្នាំ នៅភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ ៦-ឈ្មោះ សុផាត សុបញ្ញា ភេទប្រុស អាយុ១៦ឆ្នាំ នៅភូមិគីឡូម៉ែត្រ៧ សង្កាត់ច្រាំងចំរេះ ខណ្ឌឫស្សីកែវ ៧-ឈ្មោះ រីម ដារ៉ាចាន់ អាយុ១៧ឆ្នាំ នៅភូមិ៦ សង្កាត់ឃ្មួញ ខណ្ឌសែនសុខ ៨-ឈ្មោះ អ៊ុំ សែនឧត្តម អាយុ១៦ឆ្នាំ នៅភូមិគីឡូម៉ែត្រកេខ៧ សង្កាត់ច្រាំងចំរេះ ខណ្ឌឫស្សីកែវ ៩-ឈ្មោះ សាត ភារ៉ុង ភេទប្រុស អាយុ១៥ឆ្នាំ នៅភូមិឃ្មួញ ខណ្ឌសែនសុខ ១០-ឈ្មោះ នី ស្រីខួច ភេទស្រី អាយុ១៧ឆ្នាំ នៅតាស្គរ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។
ក្រោយពីសាកសួរជនសង្ស័យ រួមជាមួយវត្ថុតាងសមត្ថកិច្ចបានកសាងសំណុំរឿងបញ្ជូនទៅកាន់សាលាដំបូងខេត្តកំពត ដើម្បីចាត់ការតាមផ្លូវច្បាប់ ៕ កែសម្រួលដោយ ៖ សុឃាក់
ចែករំលែកព័តមាននេះ