រាជធានីភ្នំពេញ ៖ ព្រះអគ្គិបានឆាបឆេះទូចំហុយកម្ដៅសាច់ប៉ាតេនៅក្នុងសិប្បកម្មផលិតសាច់ប៉ាតេនិងប្រហិតខ្នាតតូចគ្មានស្លាកយីហោមួយកន្លែង ដែលបង្កឡើងដោយការធ្លាយទុយោហ្គាស់ទូចំហុយនោះ ។ នៅពេលមានការឆាបឆេះភ្លាម ម្ចាស់សិប្បកម្មនិងកម្មករ បាននាំគ្នាយកបំពង់ពន្លត់អគ្គិភ័យបាញ់ពន្លត់ ប៉ុន្តែភ្លើងអត់រលត់នោះឡើយ រហូតរថយន្តពន្លត់អគ្គិភ័យ២គ្រឿងទៅដល់បាញ់ទឹកពន្លត់អស់១រថយន្ត ទើបភ្លើងរលត់ទៅវិញទាំងស្រុង ។
ហេតុការណ៍ខាងលើនោះបានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង១២ថ្ងៃត្រង់ថ្ងៃទី១២ ខែមីនា ឆ្នាំ២០២៦ នៅតាមបណ្ដោយផ្លូវ៣០ម៉ែត្រ ស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា នៅវេលាម៉ោងខាងលើ ខណៈពេលកំពុងដំណើរការកម្ដៅសាច់ប៉ាតេសុខៗក៏ស្រាប់តែធ្លាយទុយោហ្គាស់ទូចំហុយសាច់ប៉ាតនោះ បង្កឲ្យមានការឆាបឆេះសន្ធោសន្ធៅ និងភ្ញាក់ផ្អើលដល់អ្នកជិតខាង ។ ភ្លាមៗនោះកម្មករនៅក្នុងសិប្បកម្មខាងលើនោះ ក៏បានបាននាំគ្នាយកបំពង់ពន្លត់អគ្គិភ័យបាញ់ពន្លត់ ប៉ុន្តែភ្លើងកំពុងឆេះខ្លាំងមិនអាចពន្លត់រលត់បានឡើយ ទើបរាយការណ៍ទៅកាន់អាជ្ញាធរដើម្បីសុំជំនួយ ។
សមត្ថកិច្ចបានបញ្ជាក់ប្រាប់ឲ្យដឹងបន្ថែមទៀតថា ក្រោយពេលទទួលបានដំណឹងនោះហើយ អាជ្ញាធរនិងសមត្ថកិច្ចខណ្ឌពោធិ៍សែនជ័យ បានបានរាយការណ៍បន្តទៅកាន់ក្រុមអ្នកពន្លត់អគ្គិភ័យឲ្យជួយអន្តរាគមន៍ពន្លត់ភ្លើង ។ បន្ទាប់មកក៏មានរថយន្តពន្លត់អគ្គិភ័យការិយាល័យនគរបាលបង្ការពន្លត់អគ្គិភ័យនិងសង្គ្រោះនៃស្នងការដ្ឋាននគរបាលរាជធានីភ្នំពេញទៅដល់ចំនួន២គ្រឿង ។ ពេលនោះបាញ់ទឹកពន្លត់អស់១រថយន្ត ទើបភ្លើងរលត់ទៅវិញទាំងស្រុង មិនឆេះរាលដាលទៅកន្លែងផ្សេងនិងបណ្ដាលឲ្យមាននរណាម្នាក់រងរបួសឡើយ ៕
ចែករំលែកព័តមាននេះ