រាជធានីភ្នំពេញ ៖ ជនសង្ស័យម្នាក់ត្រូវបានកម្លាំងនគរបាលព្រហ្មទណ្ឌខណ្ឌទួលគោកស្រាវជ្រាវឃាត់ខ្លួនបន្ទាប់ពីធ្វើសកម្មភាពលួចរថយន្តម៉ាក BYD ស៊េរី 2025មួយគ្រឿងរបស់មន្ត្រីអង្គភាពប្រឆាំងពុករលួយ (ACU) គេចខ្លួនបានប្រមាណជាង២ម៉ោង។ ជនសង្ស័យឈ្មោះ អ៊ុង…
រាជធានីភ្នំពេញ ៖ ជនសង្ស័យម្នាក់ត្រូវបានកម្លាំងនគរបាលព្រហ្មទណ្ឌខណ្ឌទួលគោកស្រាវជ្រាវឃាត់ខ្លួនបន្ទាប់ពីធ្វើសកម្មភាពលួចរថយន្តម៉ាក BYD ស៊េរី 2025មួយគ្រឿងរបស់មន្ត្រីអង្គភាពប្រឆាំងពុករលួយ (ACU) គេចខ្លួនបានប្រមាណជាង២ម៉ោង។
ជនសង្ស័យឈ្មោះ អ៊ុង ដារ៉ាឆៃកុង ភេទប្រុស អាយុ២៧ឆ្នាំ មុខរបរ និងស្នាក់នៅពុំពិតប្រាកដ មានសារធាតុញៀន។
ចំណែកជនរងគ្រោះ ជា ម្ចាស់រថយន្ត ឈ្មោះ ង៉ែត សារិន ភេទប្រុស អាយុ៤៥ឆ្នាំ ជនជាតិខ្មែរ មុខរបរ មន្ត្រីអង្គភាពប្រឆាំងពុករលួយ (ACU) ស្នាក់នៅផ្ទះ លេខ១២P ផ្លូវលេខ២៧១ស្ទួន ក្រុមទី៣ ភូមិ១ សង្កាត់បឹងសាឡាង ខណ្ឌទួលគោក រាជធានីភ្នំពេញ ។
តាមនគរបាលខណ្ឌទួកគោកបានឲ្យដឹងថា ជនសង្ស័យរូបនោះត្រូវបានកម្លាំងផ្នែកជំនាញ នៃអធិការដ្ឋាននគរបាលខណ្ឌទួលគោក បានធ្វើការស្រាវជ្រាវឃាត់ខ្លួននៅថ្ងៃទី១១ ខែមីនា ឆ្នាំ២០២៦ វេលាម៉ោងប្រហែល២០និង៣០នាទីនៅចំណុចលើដងផ្លូវលេខ៣៨៥ក្រុមទី៤ ភូមិ២ សង្កាត់បឹងសាឡាង ខណ្ឌទួលគោកពីបទលួច លួចរថយន្ត០១គ្រឿងម៉ាក BYD ស៊េរី 2025 ពណ៌ខ្មៅ។
តាមព័ត៌មានបានឲ្យដឹងទៀតថា នៅវេលាម៉ោងប្រមាណ៦និង២០នាទីល្ងាច ថ្ងៃទី១១ ខែមីនា ឆ្នាំ២០២៦ជនសង្ស័យបានចូលធ្វើសកម្មភាពលួចយករថយន្តរបស់ជនរងគ្រោះខាងលើនៅចំណុចមុខដីឡូត៍លេខ១៦ ផ្លូវលេខ២៧១ស្ទួន ក្រុមទី៣ ភូមិ១ សង្កាត់បឹងសាឡាង ខណ្ឌទួលគោក រាជធានីភ្នំពេញរួចគេច ។ ភ្លាមៗកម្លាំងនគរបាបព្រហ្មទណ្ឌខណ្ឌទួលគោកនិងនគរបាលប៉ុស្តិ៍បឹងសាឡាងក៏បានធ្វើការស្រាវជ្រាវហើយឈានទៅឃាត់ខ្លួនបានជនសង្ស័យនិងដកហូតបានរថយន្ត០១គ្រឿងម៉ាក BYD ស៊េរី 2025 ពណ៌ខ្មៅ ពាក់ផ្លាកលេខ ភ្នំពេញ CH-1139 ជារបស់ជនរងគ្រោះរួចបានធ្វើការប្រគល់ជូនជនរងគ្រោះវិញតាមការស្នើសុំ ។
បច្ចុប្បន្ន ជនសង្ស័យខាងលើ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌ ទួលគោក ដើម្បីសាកសួរនិងចាត់ការតាមនីតិវិធី៕
ចែករំលែកព័តមាននេះ