ខេត្តមណ្ឌលគិរី ៖ ដើម្បីឆ្លើយតបទៅនឹងតម្រូវការចាំបាច់របស់ប្រជាពលរដ្ឋ និងលើកកម្ពស់សោភ័ណភាពក្រុង អាជ្ញាធរសង្កាត់ស្ពានមានជ័យ បានសម្រេចស្ថាបនាផ្លូវបេតុងអាមេថ្មីមួយខ្សែរួចរាល់ជាស្ថាពរ និងបានដាក់ឱ្យប្រើប្រាស់ជាផ្លូវការ ដើម្បីសម្រួលដល់ការធ្វើចរាចរណ៍ជូនប្រជាពលរដ្ឋ ក៏ដូចជាសិស្សានុសិស្សក្នុងភូមិចំការតែ ក្រុងសែនមនោរម្យ។
លោក គុជ ម៉េងធូ ចៅសង្កាត់ស្ពានមានជ័យ បានមានប្រសាសន៍ឱ្យដឹងថា ផ្លូវមួយខ្សែនេះពីមុនមានសភាពលំបាកខ្លាំងក្នុងការធ្វើដំណើរ ជាពិសេសនៅរដូវវស្សា។ លោកបានបញ្ជាក់ពីមូលហេតុថា ដោយសារកត្តាភូមិសាស្ត្រផ្លូវមានសភាពចំណោតខ្លាំង និងមានអូរហូរឆ្លងកាត់ រួមផ្សំនឹងអាកាសធាតុនៅក្នុងខេត្តមណ្ឌលគិរីមានភ្លៀងធ្លាក់ច្រើន បានធ្វើឱ្យទឹកហូរច្រោះដីផ្លូវក្លាយជាជង្ហុកធំៗ បង្កជាផលវិបាកយ៉ាងខ្លាំងដល់ការធ្វើដំណើររបស់បងប្អូនប្រជាពលរដ្ឋ អស់រយៈពេលជាច្រើនឆ្នាំមកហើយ។
ដោយមើលឃើញពីទុក្ខលំបាកនេះ រដ្ឋបាលសង្កាត់បានសម្រេចលើកយកគម្រោងស្ថាបនាផ្លូវនេះ ជាអាទិភាពក្នុងផែនការអភិវឌ្ឍន៍ឆ្នាំ២០២៥។ ដំណើរការសាងសង់បានចាប់ផ្ដើមនៅចុងឆ្នាំ២០២៥ និងបានបញ្ចប់ជាស្ថាពរនៅដើមឆ្នាំ២០២៦នេះ ដែលមានប្រវែង៤៣០ម៉ែត្រ ទទឹង៥ម៉ែត្រ កម្រាស់១៥សង្ទីម៉ែត្រ ។
សមិទ្ធផលថ្មីនេះ មិនត្រឹមតែជួយសម្រួលដល់ការដឹកជញ្ជូនកសិផល និងការធ្វើដំណើរទូទៅប៉ុណ្ណោះទេ ប៉ុន្តែថែមទាំងជាចំណងដៃដ៏សំខាន់សម្រាប់ក្មួយៗសិស្សានុសិស្ស ដែលត្រូវធ្វើដំណើរឆ្លងកាត់ទៅសាលារៀនជារៀងរាល់ថ្ងៃ ប្រកបដោយសុវត្ថិភាព និងភាពងាយស្រួល។ក្រៅពីផ្លូវមួយខ្សែខាងលើនេះ រដ្ឋបាលសង្កាត់ស្ពានមានជ័យ បានស្ថាបនាផ្លូវបេតុងមួយខ្សែទៀត នៅភូមិអូរស្ពាន ដែលមានប្រវែង២៦៣ម៉ែត្រ ទទឹង៦ម៉ែត្រ កម្រាស់១៥សង្ទីម៉ែត្រ ផងដែរ ។
ជាមួយគ្នានេះ លោកចៅសង្កាត់ក៏បានអំពាវនាវដល់បងប្អូនប្រជាពលរដ្ឋដែលរស់នៅសងខាងផ្លូវ និងអ្នកប្រើប្រាស់ផ្លូវទាំងអស់ មេត្តាចូលរួមថែរក្សាសមិទ្ធផលនេះឱ្យបានល្អ កុំដឹកជញ្ជូនលើសទម្ងន់កំណត់ និងការចូលរួមសម្អាតបរិស្ថានជុំវិញផ្លូវ ដើម្បីធានាឱ្យផ្លូវបេតុងនេះមានគុណភាពរឹងមាំ និងអាចប្រើប្រាស់បានយូរអង្វែងសម្រាប់ជាប្រយោជន៍រួមក្នុងសហគមន៍។
គួរបញ្ជាក់ថា ការអភិវឌ្ឍហេដ្ឋារចនាសម្ព័ន្ធក្នុងសង្កាត់ស្ពានមានជ័យ ជាពិសេសនៅក្នុងក្រុងសែនមនោរម្យ កំពុងមានសន្ទុះរីកចម្រើនជាបន្តបន្ទាប់ ស្របតាមគោលនយោបាយអភិវឌ្ឍន៍របស់រាជរដ្ឋាភិបាល ក៏ដូចជារដ្ឋបាលខេត្តមណ្ឌលគិរី ដើម្បីប្រែក្លាយតំបន់នេះឱ្យកាន់តែមានភាពទាក់ទាញសម្រាប់វិស័យទេសចរណ៍ និងលើកកម្ពស់កម្រិតជីវភាពរបស់ប្រជាពលរដ្ឋក្នុងមូលដ្ឋាន៕
ចែករំលែកព័តមាននេះ