រាជធានីភ្នំពេញ ៖ ក្រោយពីដួលសន្លប់អស់មួយខ្យល់ធំ កីឡាប្រដាល់សាកលចាប់ផ្ដើមលេចមុខជាថ្មីវិញហើយនៅលើសង្វៀនទូរទស្សន៍ ដោយគេឃើញសង្វៀនទូរទស្សន៍អាស៊ីអាគ្នេយ៍ ជាអ្នកបើកឆាកផ្គូផ្គងឱ្យប្រកួតឡើងវិញប៉ុន្តែមិនទាន់បានច្រើននៅឡើយទេបើធៀបនឹងប្រដាល់សេរី។ មានការកត់សម្គាល់កាន់តែខ្លាំងថា ប្រដាល់សាកលចាប់ផ្ដើមលេចមុខបន្តិចវិញហើយ បន្ទាប់ពីស្ងប់ស្ងាត់ លែងមានសង្វៀនឱ្យអ្នកប្រដាល់សាកលឡើងវ៉ៃមួយរយៈ ។
ក្រៅពីខាងសហព័ន្ធជាអ្នករៀបចំប្រកួតជ្រើសរើសជើងឯករៀងរាល់មួយឆ្នាំម្ដងគឺមិនមានស្ថាប័ន ណារៀបចំទេ ។ បណ្ដាសង្វៀនទូរទស្សន៍ទាំងឡាយបានត្រឹមតែបើកប្រដាល់ដូចលឹបលប៉ុណ្ណោះធ្វើឱ្យអ្នកប្រដាល់សាកលហើមស្រកៗ រកតែទីផ្សារមិនចង់បាន ។ មន្ត្រីអ្នករៀបចំបានអះអាងថា ដំណើរការបើកប្រដាល់សាកលជាថ្មី គឺដើម្បីជួយជំរុញដល់សហព័ន្ធ និងកីឡាករផ្នែកប្រដាល់សាកលអោយមានចរន្តតាមប៉ុស្តិ៍ទូរទស្សន៍ឡើងវិញ បន្ទាប់ពីវិស័យមួយនេះ មិនសូវទទួលបានការចាប់អារម្មណ៍ពីមហាជន។
ការត្រឡប់មកវិញនេះ ក៏ដើម្បីលាងជម្រះមន្ទិលថា បណ្ដាប៉ុស្តិ៍ទាំងនោះបានត្រឹមតែបើកសង្វៀនតាមៗគ្នាតែមួយប្រាវប៉ុណ្ណោះ ប៉ុន្តែបើកមិនបានប៉ុន្មានផង ក៏បិទស្របគ្នា ហើយខ្វះឆន្ទៈធ្វើឱ្យរស់ឡើងវិញ ។ នោះក៏ជាការលុបបំបាត់ ចំពោះការលើកឡើងដែលចោទថា គ្រូបង្វឹកផ្នែកប្រដាល់សាកល និងមន្ត្រីប្រចាំសហព័ន្ធជាច្រើន បិទចោលការប្រដាល់ព្រមគ្នា ហើយមិនបើកវិញ គឺពាក់ព័ន្ធនឹងឆន្ទៈរបស់អ្នករៀបចំការប្រដាល់ ព្រោះការរៀបចំប្រដាល់សាកលទទួលផលចំណេញមិនច្រើនដូចប្រដាល់សេរី ។
មន្ត្រីដដែលបន្តថា ដោយគ្រូបង្វឹកកីឡាករប្រដាល់មួយចំនួន និយាយថា បើសង្វៀនទូរទស្សន៍នៅតែបន្តការប្រដាល់ខាងផ្នែកសាកល គឺទោះជាបើកមួយឆ្នាំទល់មួយឆ្នាំ ក៏មិនខ្វះអ្នកឡើងប្រកួត ទើបនាំអោយមានការឯកភាពគ្នាបើករេញជាថ្មី ហើយដាក់កំហិតអោយបណ្ដាក្លិបដែលទាមទារអោយមានការប្រកួតប្រដាល់សាកល ត្រូវតែសម្រាំងរកសិស្សល្អៗមកប្រកួតអោយទាន់ពេល បើអត់នឹងបិទតាមជាក់ស្ដែង។
លោក ញាណ សុធី អ្នករៀបចំការប្រកួត បានអះអាងថា សង្វៀនទូរទស្សន៍អាសុីអាគ្នេយ៍ សម្រេចដាក់គូប្រដាល់សាកលជាថ្មីវិញហើយ ដោយលោកសម្រេចដាក់យ៉ាងហោចមួយគូនៅរាល់សប្ដាហ៍ ហើយសប្ដាហ៍ខ្លះ ដែលខាងក្លិបប្រដាល់មានកីឡាករល្អៗគ្រប់គ្រាន់ លោកដាក់ដល់ទៅ៤សង្វៀន ឬយ៉ាងតិច២សង្វៀនតែម្ដង។ លោកថា សង្វៀនរបស់លោក ចង់តែដាក់ច្រើនគូ និងដាក់អោយបានទៀងទាត់ទេ ប៉ុន្តែ បណ្ដាលមកពីប្រដាល់សាកលពិបាកស្វែងរកកីឡាករ ទើបធ្វើអោយលោកពេលខ្លះឈឺក្បាល។
តាមបទពិសោធលោកថា ប្រដាល់សាកលអាចមានកីឡាករល្អៗ ដែលដាក់ប្រកួតល្អមើលតែក្នុងប៉ុន្មានសប្ដាហ៍ដំបូងប៉ុណ្ណោះ ប៉ុន្តែនៅក្នុងសប្ដាហ៍បន្តបន្ទាប់ គឺរមែងពិបាកស្វែងរកអ្នកប្រកួតវិលជុំ ទើបជារឿងពិបាក ។ លោកថា សម្រាប់ការបើករេញអោយកីឡាករប្រដាល់សាកលបង្ហាញចខ្លួនម្ដងនេះ គឺបានរៀបក្រឡាច្បាស់លាស់ ដោយលោកបានតម្រូវអោយក្លិបប្រដាល់ទាំងឡាយរៀបឈ្មោះអ្មកប្រដាល់ សាកលក្នុងចំនួនជាក់លាក់ ដើម្បីអាចអោយលោកដាក់ប្រកួតវិលជុំបាន។
លោក ញាណ សុធី ថា ខ្លួនបានសម្រេចចិត្តរៀបចំឱ្យមានរូបរាងប្រដាល់សាកលឡើងវិញ តែក៏ត្រូវធានាចំពោះម្ចាស់ស្ពុនស័រថាគូប្រកួតប្រដាល់សាកលមិនចេះតែដាក់ដោយឆិន ឆៃនោះដែរ ។ លោកសង្កត់ធ្ងន់ថា បើប្រដាល់ សាកលដំណើរការឡើងវិញមានការគាំទ្រ គឺលោកនឹងប្រឹងរៀបចំការប្រកួតឱ្យអស់ពីលទ្ធភាព៕ (កែសម្រួលដោយ ៖ បុប្ផា)
ចែករំលែកព័តមាននេះ