ខេត្តព្រៃវែង ៖ ឪពុកម្តាយកម្មករសំណងចំនួន២នាក់នៅខេត្តព្រៃវែង បាននាំគ្នាជួលតាអាចារ្យ និងសង់រោងបុណ្យរួចជាស្រេច ដើម្បីចាំទទួលសពកូនរងគ្រោះជាប់នៅក្រោមគំនរអគារ ដែលបាក់រលំកាលពីប៉ុន្មានថ្ងៃមុននៅខេត្តព្រះសីហនុ ដោយម្នាក់ៗគិតថា ជនរងគ្រោះមិនអាចនៅមានជីវិតនោះទេ ព្រោះជាប់នៅក្រោមគំនរថ្ម២-៣ថ្ងៃទៅហើយ។…
ខេត្តព្រៃវែង ៖ ឪពុកម្តាយកម្មករសំណងចំនួន២នាក់នៅខេត្តព្រៃវែង បាននាំគ្នាជួលតាអាចារ្យ និងសង់រោងបុណ្យរួចជាស្រេច ដើម្បីចាំទទួលសពកូនរងគ្រោះជាប់នៅក្រោមគំនរអគារ ដែលបាក់រលំកាលពីប៉ុន្មានថ្ងៃមុននៅខេត្តព្រះសីហនុ ដោយម្នាក់ៗគិតថា ជនរងគ្រោះមិនអាចនៅមានជីវិតនោះទេ ព្រោះជាប់នៅក្រោមគំនរថ្ម២-៣ថ្ងៃទៅហើយ។
ប៉ុន្តែនៅទីបំផុត ពិធីបុណ្យសពក៏ប្រែជាខកខាន ហើយរោងបុណ្យសពទាំង២ក៏ត្រូវរុះចោលវិញ ជំនួសដោយសំឡេងសើចក្អាកក្អាយលាយឡំនឹងក្តីរំភើបឥតឧប្បមា រហូតអួលដើម.កនិយាយមិនចេញ ដោយសារតែម្ចាស់ដើមបុណ្យបានទទួលដំណឹងថា កូនប្រុសរបស់ខ្លួននៅមានជីវិត មិនទាន់ស្លាប់ទេ។
កម្មករដែលរងគ្រោះជាប់នៅក្រោមគំនរបាក់បែកនៃសំណង់អគារ៧ជាន់ដែលរលំនោះ ត្រូវបានក្រុមអ្នករុករកប្រទះឃើញនៅរសៀលថ្ងៃទី២៤ មិថុនា និងបាននាំយកទៅកាន់មន្ទីរពេទ្យខេត្តភ្លាមៗដើម្បីជួយសង្គ្រោះ។ ហើយព័ត៌មាននេះ បានបញ្ជូនទៅប្រាប់ក្រុមគ្រួសារសាច់ញាតិរបស់ជនរងគ្រោះទាំង២នៅល្ងាចថ្ងៃដដែល ខណៈពេលដែលឪពុកម្តាយជនរងគ្រោះ កំពុងរៀបចំធ្វើបុណ្យចាំទទួលសពកូនទៅហើយ ធ្វើឱ្យទាំងឪពុកម្តាយ និងសាច់ញាតិជនរងគ្រោះទាំងអស់ ម្នាក់ៗត្រេកអររំភើបរហូតថ្លែងមិនចេញ។
រោងបុណ្យសពដែលធ្វើខកទាំង២នេះ ត្រូវបានសង់ឡើងនៅនឹងផ្ទះជនរងគ្រោះទាំង២ ដែលទី១ ស្ថិតនៅក្នុងភូមិក្រូច ឃុំកន្សោមអក ស្រុកកំពុងត្របែក ធ្វើឡើងដើម្បីចាំទទួលសពជនរងគ្រោះឈ្មោះ រស់ ស៊ីថា ហើយត្រូវរំសាយទៅវិញនៅល្ងាចថ្ងៃទី២៤ មិថុនា និងរោងទី២ គឺស្ថិតនៅក្នុងភូមិត្រពាំងស្រែ ឃុំស្តៅកោង ស្រុកបាភ្នំ ធ្វើឡើងចាំទទួលសពជនរងគ្រោះឈ្មោះ កាក់ គា អាយុ១៨ឆ្នាំ និងត្រូវរំសាយទៅវិញនៅល្ងាចថ្ងៃជាមួយគ្នានោះដែរ។
គួរបញ្ជាក់ផងដែរថា ក្រោយពីទទួលបានដំណឹងថា កូនប្រុសនៅមានជីវិត ពេលនេះឪពុកម្តាយ និងបងប្អូនសាច់ញាតិរបស់ជនរងគ្រោះទាំង២បាននាំគ្នាធ្វើដំណើរទៅកាន់ខេត្តព្រះសីហនុហើយ ដើម្បីទៅមើលថែជនរងគ្រោះដែលកំពុងសំរាកព្យាបាលនៅក្នុងមន្ទីរពេទ្យខេត្ត៕ (កែសម្រួលដោយ ៖ បុប្ផា)
ចែករំលែកព័តមាននេះ