ខេត្តព្រៃវែង ៖ ស្រះបុរាណមួយកន្លែង ដែលមានទំហំជាង១ហិកតា ស្ថិតនៅជាប់ជើងភ្នំឈើកាច់ ក្នុងឃុំជើងភ្នំ ស្រុកបាភ្នំ កំពុងត្រូវបានគេជីកយកអាចម៍ដីលក់យ៉ាងគគ្រឹកគគ្រេងជារៀងរាល់ថ្ងៃ ដោយគេអះអាងថាអាជ្ញាធរស្រុក ជាអ្នកឱ្យជីកដើម្បីស្តារស្រះ…
ខេត្តព្រៃវែង ៖ ស្រះបុរាណមួយកន្លែង ដែលមានទំហំជាង១ហិកតា ស្ថិតនៅជាប់ជើងភ្នំឈើកាច់ ក្នុងឃុំជើងភ្នំ ស្រុកបាភ្នំ កំពុងត្រូវបានគេជីកយកអាចម៍ដីលក់យ៉ាងគគ្រឹកគគ្រេងជារៀងរាល់ថ្ងៃ ដោយគេអះអាងថាអាជ្ញាធរស្រុក ជាអ្នកឱ្យជីកដើម្បីស្តារស្រះ ។ ប្រជាពលរដ្ឋក៏ដូចជាមន្ត្រីរាជការមួយចំនួននៅក្នុងស្រុកបាភ្នំ បានឱ្យដឹងថា គ្រឿងចក្រដែលកំពុងធ្វើសកម្មភាពជីកយកអាចម៍ដីនៅក្នុងស្រះបុរាណនេះ គឺជារបស់ឈ្មួញឈ្មោះ ហៃ ដែលជាឈ្មួញរកស៊ីដឹកដីលក់នៅក្នុងស្រុកបាភ្នំ ។
ចំណែកអាចម៍ដីដែលគេជីកស្តារស្រះនេះ គឺគេយកទៅធ្វើផ្លូវចំនួន៣ខ្សែនៅក្នុងឃុំចំនួន៣មាន ឃុំជើងភ្នំ ឃុំឈើកាច់ និងឃុំបឹងព្រះ ព្រមទាំងលក់ទៅឱ្យអ្នកស្រុកដែលត្រូវការចាក់ដីបំពេញដីភូមិរបស់ខ្លួនជាដើម ។ ចំណែកលុយដែលបានពីការលក់អាចម៍ដីស្តារស្រះនេះ គេចែកជា២ចំណែក គឺខាងឈ្មួញបាន៧០ភាគរយ និងអាជ្ញាធរស្រុកបាន៣០ភាគរយ ។
ពាក់ព័ន្ធទៅនឹងការធ្វើផ្លូវទាំង៣ខ្សែនៅក្នុងឃុំទាំង៣ខាងលើ ត្រូវបានក្រុមឈ្មួញដែលរកស៊ីដេញថ្លៃធ្វើផ្លូវ គម្រោងមូលនិធិឃុំ-សង្កាត់ បង្ហើបឱ្យដឹងថា ផ្លូវទាំង៣ខ្សែនេះពេលដាក់ដេញថ្លៃគឺក្រុមហ៊ុន ឃឹម ភឿន ជាអ្នកដេញបានក្នុងតម្លៃជាង៣០០លានរៀល ។ ប៉ុន្តែដោយក្រុមហ៊ុននេះមានតែឈ្មោះ អត់មានគ្រឿងចក្រធ្វើ ក៏បានលក់គម្រោងនេះបន្តមកឲ្យឈ្មួញឈ្មោះ ហៃ ជាអ្នកធ្វើផ្ទាល់ ។
រីឯការជួសជុលផ្លូវនេះ តាមគម្រោងគឺតម្រូវឱ្យឈូសឆាយត្រាសសេផ្លូវឱ្យស្អាត រួចចាក់ដីសកម្រាស់១ម៉ែត្រ ទើបចាក់ដីខ្សាច់ភ្នំពីលើ ហើយនៅអមសងខាងផ្លូវត្រូវដាំស្មៅផងដែរ ។ ប៉ុន្តែការធ្វើជាក់ស្តែង ផ្លូវទាំង៣ខ្សែនេះគេធ្វើមិនបានត្រឹមត្រូវតាមស្តង់ដារទេ ៖ ទី១-គឺអត់ចាក់ដីសទេ ត្រាសសេផ្លូវរួចចាក់ខ្សាច់យកតែម្តង ដែលធ្វើបែបនេះគេចំណេញថ្លៃដីសបានជាង៣ម៉ឺនដុល្លារ ។ ទី២-ខ្សាច់ភ្នំដែលគេយកមកចាក់នោះ គឺគេយកអាចម៍ដីស្តារស្រះដែលជាប្រភេទដីខ្មៅគ្មានគុណភាពមកចាក់ ដែលដីប្រភេទនេះមិនជាប់បានយូរទេ ។ ទី៣-គេពុំមានដាំស្មៅនៅតាមជើងទេរអមសងខាងផ្លូវឡើយ ។
សរុបមក ការធ្វើផ្លូវទាំង៣ខ្សែនេះ គេអាចចំ ណេញបានមិនក្រោម២០០លានរៀលនោះទេ តាមរយៈការកិបកេងទាំងបរិមាណនិងគុណភាព។ទោះជាយ៉ាងណាក៏ដោយ គេអាចធ្វើបែបនេះបាន ដោយសារតែមានការត្រូវរ៉ូវគ្នាជាប្រព័ន្ធជាមួយនឹងមន្ត្រីបច្ចេកទេស តាំងពីថ្នាក់ឃុំ ស្រុករហូតដល់ខេត្ត ។ ចំណែកការស្តារស្រះបុរាណឯណោះវិញ ត្រូវបានគេបង្ហើបឱ្យដឹងថា អាជ្ញាធរស្រុកបាភ្នំ បានធ្វើសំណើសុំទៅស្ថាប័នពាក់ព័ន្ធអស់ហើយ គឺទាំងមន្ទីររ៉ែនិងថាមពលខេត្ត មន្ទីរវប្បធម៌ខេត្ត រដ្ឋបាលខេត្ត និងក្រសួងវប្បធម៌ផងដែរ ដោយគោលបំណងនៃការស្នើសុំស្តារស្រះបុរាណនេះ គឺដើម្បីបានប្រភពទឹកប្រើប្រាស់ផង និងការពារស្រះបុរាណកុំឲ្យបាត់បង់ផងដែរ ។
ទោះជាយ៉ាងនេះក្តី ប្រភពពីមន្ត្រីជំនាញពាក់ព័ន្ធខ្លះបានលួចបង្ហើបថា នៅក្នុងលិខិតស្នើសុំនោះ អាជ្ញាធរស្រុកមិនបានបញ្ជាក់ពីទំហំស្រះជម្រៅនៃការជីក ជាពិសេសអាចម៍ដីដែលស្តារស្រះនោះយកទៅណា គឹមិនបានបញ្ជាក់ឱ្យច្បាស់ទេ ។ ដោយសារតែបែបនេះ ទើបរយៈពេលជិតកន្លះខែមកនេះ គ្រឿងចក្ររបស់ឈ្មួញឈ្មោះ ហៃ អាចជីកយកអាចម៍ដីពីក្នុងស្រះដឹកយកទៅចាក់ផ្លូវផង លក់ឱ្យអ្នកស្រុកផងយ៉ាងគគ្រឹកគគ្រេង និងប្រមូលកើបលុយបានរាប់រយលានរៀល ដោយមិនចាំបាច់បង់សួយសារអាករ ចូលមន្ទីររ៉ែនិងថាមពលខេត្តទេ គឺបង់ចូលតែហោប៉ៅបុគ្គលម្នាក់២នាក់ទៅជាការស្រេច ។
ជុំវិញការលើកឡើងខាងលើនេះ លោក ទេព ភារុន អភិបាលស្រុកបាភ្នំ បានឱ្យដឹងថា ការស្តារស្រះបុរាណខាងលើនេះ គឺអាជ្ញាធរស្រុកពិតជាអ្នកស្នើសុំមែន ហើយរឿងទំហំនិងជម្រៅនៃការជីកស្តារស្រះនោះ ក៏លោកទទួលស្គាល់ថាមិនបានកំណត់ដែរ ។ ប៉ុន្តែរឿងគេយកអាចម៍ដីទៅលក់ បានលុយចែកភាគរយជាមួយស្រុកនោះ លោកបដិសេធថាមិនពិតដូចការចោទប្រកាន់នោះទេ គឺអាជ្ញាធរស្រុកមិនដែលទទួលបានប្រយោជន៍អ្វីពីឈ្មួញនោះឡើយ ។ តាមកិច្ចសន្យារវាងអាជ្ញាធរស្រុក និងម្ចាស់គ្រឿងចក្រគឺគ្រាន់
តែតម្រូវឱ្យឈ្មួញជួយធ្វើផ្លូវ៣ខ្សែនៅជុំវិញស្រះនេះប៉ុណ្ណោះ ក្រៅពីនេះមិនបានពាក់ព័ន្ធអ្វីទាំងអស់ ៕
ចែករំលែកព័តមាននេះ