សហរដ្ឋអាមេរិក-អុីរ៉ង់ ៖ ក្រោយការបោះបង់ចោល នានាទីចុងក្រោយការវាយប្រហារអុីរ៉ង់ បន្ទាប់ពីប្រទេសនេះបាញ់ធ្លាក់យន្តហោះស៊ើបការណ៍គ្មានមនុស្សបើកមួយគ្រឿងរបស់ខ្លួន អាមេរិកបានបន្តសង្គ្រាមពាក្យសម្ដី កាលពីចុងសប្ដាហ៍ជាមួយអុីរ៉ង់ ដែលម្ខាង២សុទ្ធតែមិនចង់ឲ្យបាក់មុខមាត់ ក្នុងកណ្ដាប់ដៃដែករបស់រៀងៗខ្លូន។
ទីប្រឹក្សាសន្តិសុខជាតិអាមេរិកលោកJOHN BOLTON ដែលចង់ឲ្យមានការតបតខាងយោធាមួយ កាលពីថ្ងៃទី២៣មិថុនាបានព្រមានអុីរ៉ង់។ លោកពោលថាមិនថាអុីរ៉ង់ឬតួអង្គប្រទូស្តរ៉ាយណាមួយ មិនត្រូវយល់ច្រឡំពីការប្រុងប្រយ័ត្ននិងការអត់ធ្មត់ ជាមួយភាពទន់ខ្សោយឡើយ។ កងទ័ពរបស់យើងត្រៀមចេញទៅប្រយុទ្ធជានិច្ច។
កាលពីថ្ងៃទី២២មិថុនា លោកដូណាល់ត្រាំ ធ្លាប់ប្រកាសតាមTWITTERពីទណ្ឌកម្មចម្បងនានាប្រឆាំងអុីរ៉ង់ ចាប់ពីថ្ងៃទី២៤មិថុនាទៅ ដោយលោកអះអាងថា អុីរ៉ង់មិនត្រូវមានអាវុធនុយក្លេអ៊ែរឡើយ។ មុននេះបន្តិចលោកត្រាំដែលធ្វើសេចក្ដីថ្លែងការណ៍បែបអាជ្ញាសឹក ក៏បែរមកអំពាវនាវឲ្យមានការចរចា ដោយអះអាងថា ប្រសិនបើអុីរ៉ង់បោះបង់ចោលកម្មវិធីនុយក្លេអ៊ែររបស់ខ្លួន នោះគេនឹងក្លាយជាមិត្តដ៏ល្អរបស់យើង។
ចំណែករដ្ឋមន្ត្រីការបរទេសអាមេរិក លោកMIKE POMPEOវិញអះអាងថា ពេលរបបអីុរ៉ងសម្រេចបោះបង់ចោលអំពើហិង្សា ហើយឆ្លើយតបចំពោះសំណើការទូតរបស់យើងតាមផ្លូវការទូត នោះគេនឹងដឹងថាតើយើងចូលរួមបែបណា។ ចាប់ពីពេលនេះទៅយុទ្ធនាធ្វើឲ្យអុីរ៉ង់នៅឯកោខាងការទូតនិងការគាបសង្កត់ខាងសេដ្ឋកិច្ចប្រឆាំងរបបនោះនឹងបង្កើន។
កាលពីថ្ងៃទី២២មិថុនា បណ្ដាសារព័ត៌មានអាមេរិករាយការណ៍ថា លោកត្រាំបានអនុញ្ញាតឲ្យមានការសងសឹកជាសម្ងាត់ក្រោមរូបភាពនៃការវាយប្រហារខាងព័ត៌មានវិទ្យាប្រឆាំងបណ្ដា ប្រព័ន្ធការពារអុីរ៉ង់ ពិសេសលើបណ្ដាកុំព្យូរទ័ររបស់ផ្នែកការពារអុីរ៉ង់៕ (កែសម្រួលដោយ ៖ បុប្ផា)
ចែករំលែកព័តមាននេះ