ម្រះជាគ្រឿងផ្សំរសជាតិដ៏មានតម្លៃបំផុតដែលធម្មជាតិបានផ្តល់ឱ្យមនុស្ស ។ វាជាប្រភេទបន្លែដែលផ្តល់នូវសុខភាពដល់មនុស្សយើង ។ ក្រៅពីការទទួលទានយ៉ាងទូលំទូលាយក្នុងនាមជាបន្លែ វាក៏មានកេរ្តិ៍ឈ្មោះល្បីរន្ទឺផងដែរតាំងពីបុរាណកាលមក ក្នុងនាមជាឱសថព្យាបាលរោគជាពិសេសជួយបញ្ចុះសារធាតុស្ករក្នុងឈាមនិងធ្វើឱ្យមានតុល្យភាពស្ករក្នុងរាងកាយ ។ បើទោះមានរសជាតិល្វីងខ្លាំងដែលធ្វើឱ្យមនុស្សខ្លះពិបាកលេប តែវាពិតជាអាចកែលម្អដល់សុខភាពរបស់អ្នកបាន ។ ក្នុងម្រះមួយផ្លែត្រូវគេរកឃើញមានវីតាមីន និងសារធាតុរ៉ែសំខាន់ៗដូចជា វីតាមីន A, B1, B12 និងវីតាមីនC សារធាតុរ៉ែមាន ដែក កាល់ស្យូម ផូស្វ័រ ទង់ដែង ព្រមទាំងប៉ូតាស្យូម ។
លទ្ធផលនៃការពិសោធន៍តាមបែបវិទ្យាសាស្ត្រ២លើកចុងក្រោយបានបង្ហាញថា ផ្លែម្រះមានប្រសិទ្ធភាពបញ្ចុះកម្រិតស្ករក្នុងឈាម (hypoglycemic Action) កាត់បន្ថយបាននូវហានិភ័យកើតមានជំងឺទឹកនោមផ្អែមប្រភេទ២ ។ វាផ្ទុកសមាធាតុសកម្មដែលមានកម្លាំងប្រឆាំងនឹងជំងឺទឹកនោមផ្អែមយ៉ាងហោចណាស់៣ប្រភេទគឺ polypeptides-p សណ្ឋានដូចជា អាំងស៊ុយលីន, Vicine និង Charantin មានប្រសិទ្ធភាពទប់កម្រិតស្ករក្នុងឈាមមិនឱ្យឡើង ។
polypeptides-p ,Vicine និងCharantin រួមផ្សំបញ្ចូលគ្នាគឺមានប្រសិទ្ធភាពធ្វើឱ្យកម្រិតស្ករក្នុងឈាម និងក្នុងទឹកនោមថយចុះមិនចាញ់ថ្នាំពេទ្យឡើយ ។ លើសពីនេះទៀត វាមិនបានធ្វើឱ្យកើនកម្រិតអាំងស៊ុយលីនក្នុងឈាមនោះទេ ។ ឯប្រូតេអុីនដែលមានឈ្មោះ AMPK មានសកម្មភាពកាន់តែក្លៀវក្លាឡើង ។ AMPK ជាប្រូតេអុីនដែលគេដឹងយ៉ាងច្បាស់ថា ជួយគ្រប់គ្រងស្ថិរភាពការរំលាយអាហារផ្តល់នូវថាមពល និងទប់ទល់ការឡើងជាតិស្ករ ។
លទ្ធផលនៃការពិសោធន៍រយៈពេល៤សប្តាហ៍ចុះផ្សាយក្នុងព្រឹត្តិបត្រJournal of Ethnopharmacologyកាលពីខែមករា ឆ្នាំ២០១១ បង្ហាញថា អ្នកជំងឺទឹកនោមផ្អែមប្រភេទ២ដែលផឹកទឹកម្រះស្រស់ចំណុះ២០០០មិល្លីក្រាមរាល់ថ្ងៃ ធ្វើឱ្យកម្រិតស្ករក្នុងឈាមថយចុះ ខណៈអ្នកលើសស្ករផឹកត្រឹម១០០០មិល្លីក្រាម ។
ឯការសិក្សាមួយទៀតចេញផ្សាយក្នុងខែមីនា ឆ្នាំ២០០៨បង្ហាញថា ម្រះស្រស់ពី៤-៥ផ្លែ(ប្រហែលជា១គីឡូក្រាម)កិនឱ្យម៉ដ្តរួចពូតច្រោះយកទឹកទទួលទានរៀងរាល់ព្រឹកមុនអាហារពេលព្រឹកនឹងជួយឱ្យកម្រិតស្ករក្នុងឈាមនិងក្នុងទឹកនោមថយចុះមកនៅធម្មតាវិញ ។
ប្រសិនបើអ្នកកំពុងស្ថិតនៅក្នុងការព្យាបាលដោយប្រើថ្នាំពេទ្យទទួលទានទឹកម្រះរឹតតែជួយឱ្យជាតិស្ករចុះថយយ៉ាងឆាប់រហ័សហួសពីការស្មាន ។ ចូរពិនិត្យមើលកម្រិតស្ករក្នុងឈាមរបស់អ្នកដោយប្រុងប្រយ័ត្នក្រោយការប្រើប្រាស់ទឹកម្រះពី៧ទៅ១៤ថ្ងៃ ៕
ចែករំលែកព័តមាននេះ