ខេត្តក្រចេះ ៖ មន្ទីរសុខាភិបាលខេត្តក្រចេះនៅតែព្រួយបារម្ភពីស្ថានភាពជំងឺគ្រុនឈាម ដោយសាតែសព្វថ្ងៃនេះ ចំនួនអ្នកឈឺដោយជំងឺគ្រុនឈាមនៅមិនទាន់មានថមថយ គឺកើនឡើងដល់ទៅជាង៦០០នាក់នៅឡើយ ចំណែកឯចំនួនអ្នកជំងឺគ្រុនឈាមដែលបានស្លាប់ ក៏ត្រូវបានក្រុមមន្ត្រីនៃមន្ទីរសុខាភិបាលអះអាងថា មិនមានតួលេខកើនឡើងទៀតនោះទេ គឺមានត្រឹមតែ៣នាក់…
ខេត្តក្រចេះ ៖ មន្ទីរសុខាភិបាលខេត្តក្រចេះនៅតែព្រួយបារម្ភពីស្ថានភាពជំងឺគ្រុនឈាម ដោយសាតែសព្វថ្ងៃនេះ ចំនួនអ្នកឈឺដោយជំងឺគ្រុនឈាមនៅមិនទាន់មានថមថយ គឺកើនឡើងដល់ទៅជាង៦០០នាក់នៅឡើយ ចំណែកឯចំនួនអ្នកជំងឺគ្រុនឈាមដែលបានស្លាប់ ក៏ត្រូវបានក្រុមមន្ត្រីនៃមន្ទីរសុខាភិបាលអះអាងថា មិនមានតួលេខកើនឡើងទៀតនោះទេ គឺមានត្រឹមតែ៣នាក់ ក្នុងនោះមនុស្សជំទង់១នាក់ និងកុមារ២នាក់។
បើតាមការបញ្ជាក់ឲ្យដឹងពីប្រធានមន្ទីរសុខភិបាលខេត្តក្រចេះ គឺលោកឈ្នាង វុត្ថា បាន ប្រាប់ឲ្យដឹងនៅថ្ងៃទី២១ ខែមិថុនា នេះថា មូលហេតុដែលស្ថានភាពអ្នកជំងឺគ្រុនឈាមនៅតែមានតួលេខកើនឡើងពីមួយសប្តាហ៍ទៅមួយសប្តាហ៍នេះ គឺកើតមានឡើងដោយសារការមានការចម្លងពីមូសខ្លា។ លោកថា ក្នុងអំឡុងពេលដែលអាកាសធាតុមានភ្លៀងធ្លាក់ខ្លាំងធ្វើឲ្យ កំណើនមុសខ្លាកើតច្រើនទើបធ្វើឲ្យការចម្លងឆ្លងឆាប់រហ័ស។
លោកបានប្រៀបធៀបថា នាឆ្នាំកន្លងមកនេះអត្រាអ្នកកើតជំងឺគ្រុនឈាមមិនមានច្រើនដូចឆ្នាំនេះនោះទេ ។ លោកថា មន្ទីរបានចាត់ឲ្យមន្ត្រីជំនាញចុះពិនិត្យមើលស្ថានភាពគោលដៅងាយរងគ្រោះ ដើម្បីមានវិធានការទប់ស្កាត់ដូចជា ការបាញ់ថ្នាំកម្ចាត់មូស ការដាក់ថ្នាំអាបែតនៅក្នុងពាង ឬអាងទឹករបស់ពលរដ្ឋ និងការអប់រំណែនាំសុខភាពជូនដល់ពលរដ្ឋ។
ជាមួយគ្នានេះ លោកអំពាវនាវឲ្យពលរដ្ឋប្រុងប្រយ័ត្នក្នុងការរស់នៅ និងត្រូវមានអនាម័យ។ លើសពីនេះ លោកប្រធានមន្ទីរបានអំពាវនាវឲ្យពលរដ្ឋប្រុសស្រីក្មេងចាស់ដែលសង្ស័យ ឬកើតជំងឺគ្រុនឈាម ត្រូវរួសរាន់មកព្យាបាលនៅមន្ទីរពេទ្យខេត្តឲ្យបានទាន់ពេលវេលា ព្រោះថា ប្រភេទជំងឺនេះ ទាមទារឲ្យមានការព្យាបាលតាមថេរវេលា។
លោកថា កន្លងមក មន្ទីរសុខាភិបាលបានធ្វើការណែនាំដល់ម្ចាស់គ្លីនិកឯកជនដែលទទួលការព្យាបាលក្រៅមន្ទីរពេទ្យ ឲ្យមានការប្រញាប់បញ្ជូនអ្នកជំងឺមកមន្ទីរពេទ្យខេត្តដើម្បីសង្គ្រោះព្យា បាល ព្រោះមន្ទីរពេទ្យខេត្តមានគ្រូពេទ្យជំនាញឯកទេសត្រឹមត្រូវនិងមានសម្ភារៈបច្ចកទេសគ្រប់គ្រាន់ផងដែរ។
គួរបញ្ជាក់ថា ស្ថានភាពជម្ងឺគ្រុនឈាម បានផ្ទុះការឆ្លងរាតត្បាតយាងកំហុកលើមនុស្ស គ្រប់វ័យពិសេសលើកុមារក្នុងអំឡុងរយៈពេល២ខែចុងក្រោយនេះ។
ក្នុងសប្តាហ៍នេះមានមនុស្សប្រុស ស្រី ក្មេងចាស់ យ៉ាងហោចជិត១០០នាក់ ត្រូវគេរាយការណ៍ថា បាន បញ្ជូនមកសង្គ្រោះនៅមន្ទីរពេទ្យខេត្ត ដោយសាតែពួកគេមានឆ្លងជំងឺគ្រុនឈាម ៕ (កែសម្រួលដោយ ៖ ធីតា)
ចែករំលែកព័តមាននេះ