ខេត្តតាកែវ ៖ ផ្ទុយពីការចោទថា ពេទ្យភ្លេចយក «កុំប្រេស» ឬបង់រុំរបួសចេញពីស្បូន តាមរយៈការបំភ្លឺរបស់គណៈកម្មការមន្ទីរពេទ្យនៅថ្ងៃ១៩ មិថុនា បានបង្ហាញថា ការសម្រាលដោយកាត់ទ្វារមាស…
ខេត្តតាកែវ ៖ ផ្ទុយពីការចោទថា ពេទ្យភ្លេចយក «កុំប្រេស» ឬបង់រុំរបួសចេញពីស្បូន តាមរយៈការបំភ្លឺរបស់គណៈកម្មការមន្ទីរពេទ្យនៅថ្ងៃ១៩ មិថុនា បានបង្ហាញថា ការសម្រាលដោយកាត់ទ្វារមាស និងបូមជំនួស មានការហូរឈាមខុសធម្មតា ។ តាមបច្ចេកទេសត្រូវពាក់ «កុំប្រេស» ដើម្បីឃាត់ឈាមដោយទុករយៈពេលពី២៤ម៉ោងទៅ៤៨ម៉ោង តែអ្នកជំងឺបានចេញពីពេទ្យមុនកំណត់ហើយថា មករកពេទ្យវិញ តែគាត់មិនមកពេទ្យទេ គឺសម្អាតខ្លួនឯងដោយយក«កុំប្រេស» ២ដុំចេញមក នេះមិនមែនជាការភ្លេចរបស់ពេទ្យទេ ។ ខាងក្រោមនេះជាការបំភ្លឺពីមន្ទីរពេទ្យ ។
ការខ្វះចន្លោះរបស់បុគ្គលិកមន្ទីរពេទ្យបង្អែក ក្រោមការគ្រប់គ្រងដោយមន្ទីរសុខាភិបាលខេត្ត នៅតែបន្តកើតមានជាបន្តបន្ទាប់ ហាក់មិនបានកែលម្អធាតុអសកម្ម ដែលកើតមានឡើងធ្វើឱ្យបាត់បង់ការទុកចិត្តពីអ្នកជំងឺនោះទេ ។ ជាក់ស្តែង នៅយប់ថ្ងៃទី១៨ ខែមិថុនា មានករណីគួរឲ្យហួសចិត្តមួយបានកើត ឡើងនៅមន្ទីរពេទ្យបង្អែកខេត្តតាកែវ ផ្នែកសម្ភពដែលវះកាត់ បង្កើតកូនបែរជាគ្រូពេទ្យភ្លេចបង់រុំរបួសក្នុងស្បូន តែជាគ្រោះល្អមិនមានគ្រោះថ្នាក់ដល់អាយុជីវិត ហើយដោយសារតែមានការហូរឈាមមិនឈប់ទើបទៅពេទ្យពិនិត្យនិងបានដឹង ។
សូមបញ្ជាក់ថា ស្ត្រីរូបនេះបានវះកាត់ឆ្លងទន្លេ កាលពីថ្ងៃទី៧ ខែមិថុនា ហើយដោយសារតែមានធ្លាក់ឈាមក៏វិលមកពេទ្យសាជាថ្មី នៅថ្ងៃទី១៨ ខែមិថុនា លុះពិនិត្យទៅទើបដឹងថា ភ្លេចបង់រុំរបួសនៅក្នុងពោះ ។
បើតាមគណនីហ្វេសប៊ុកឈ្មោះ នួន ឈិន បានបង្ហោះថា (១៨/០៦/២០១៩)ពេលនេះភរិយាខ្ញុំរួចផុតពីគ្រោះថ្នាក់ហើយ ខ្លាចហើយពេទ្យផ្នែកសម្ភពនៅមន្ទីរពេទ្យបង្អែកខេត្តតាកែវ សម្អាតមិនស្អាត ហើយថែមទាំងមានបង់រុំរបួសក្នុងស្បូនទៀត ។ ពិតជាខកចិត្តខ្លាំងណាស់ ដែលសម្រេចចិត្តទៅសម្រាលនៅពេទ្យនោះ ខ្លាចហើយរាងហើយ ។
ទាក់ទិននឹងករណីនេះ លោករដ្ឋមន្ត្រីក្រសួងសុខាភិបាល គួរតែចាត់វិធានការចំពោះការបំពេញការងារខ្ជីខ្ជានិងធ្វេសប្រហែសនេះ ព្រោះបើនៅតែបែបនេះទៀត តើឲ្យប្រជាពលរដ្ឋទៅរំពឹងអី? ប្រសិនបើពលរដ្ឋមានគ្រោះថ្នាក់បាត់បង់ជីវិតវិញ តើអ្នកណាជាអ្នកទទួលខុសត្រូវ ?
លោក នុត សុីណាត ប្រធានមន្ទីរសុខាភិបាលខេត្ត នៅព្រឹកថ្ងៃទី១៩ ខែមិថុនា បានប្រាប់តាមទូរស័ព្ទយ៉ាងខ្លីថា រឿងហ្នឹងលោកកំពុងស្រាវជ្រាវសិន ។ ចំណែកលោក ឈូវ ឈួន ប្រធានមន្ទីពេទ្យបង្អែកខេត្ត បានប្រាប់តាមទូរស័ព្ទដែរថា ករណីនេះ លោកកំពុងពិនិត្យនិងស្រាវជ្រាវ ។
បើតាមព័ត៌មានចុងក្រោយឲ្យដឹងថា នៅពេលនេះស្ត្រីដែលឆ្លងទន្លេដោយវះកាត់ហើយពេទ្យភ្លេចបង់រុំរបួសនៅក្នុងពោះនោះ ត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត ឯរាជធានីភ្នំពេញហើយ ដោយសារហូរឈាមខ្លាំងពេក ។
ចែករំលែកព័តមាននេះ