ខេត្តតាកែវ ៖ បើតាមជនរងគ្រោះប្រាប់ថា ពងទាដែលពួកគាត់ហូបនេះបានទិញ កាលពីថ្ងៃទី១៦ មិថុនា ចំនួន៧គ្រាប់ពីផ្សារអង្គរកា ហើយយកទៅចៀនហូបអស់៤គ្រាប់ភ្លាមៗ តែពេលនោះ វាមិនបានកើតអ្វី
ទេ ។ លុះនៅព្រឹកថ្ងៃទី១៨ មិថុនា ក៏បានចៀនពងទាចំនួន៣គ្រាប់បង្ហើយយកមកហូបទៀត ស្រាប់តែមានអាការទន់ដៃទន់ជើង ល្ហិតល្ហៃ អស់កម្លាំង និងក្អួត ។ ជនរងគ្រោះបន្ថែមថា ពងទាដែលចៀននោះគឺដាក់គ្រឿងផ្សំមានប៊ីចេង អំបិលធម្មតា ពុំបានដាក់ម្រេចទេ ហើយក៏ពុំបានហូបអ្វីក្រៅពីពងទាដែរ ។
គួររំលឹកថា ពលរដ្ឋមួយគ្រួសារ ដែលមានសមាជិក៨នាក់ មានអាការចុកពោះនិងក្អួតចង្អោរ ហើយក៏សង្ស័យថា ពុលពងទាព្រោះកើតឡើងក្រោយពេលយកពងទាទៅចៀនធ្វើម្ហូបហូប និងបានរត់ចូលពេទ្យសឹងតែមិនទាន់ ។ ករណីសង្ស័យពុលពងទាចៀននេះ កើតឡើងពីថ្ងៃទី១៨ ខែមិថុនា វេលាម៉ោង៨ព្រឹក
នៅភូមិត្រពាំងទឹក ឃុំជាងទង ស្រុកត្រាំកក់ ។
នគរបាលស្រុកត្រាំកក់បានឱ្យដឹងថា គ្រួសារដែលមានសមាជិកចំនួន៨នាក់សង្ស័យថា ពុលពងទានេះរួមមាន ១-ឈ្មោះ ប៊ិន ស្រីអូន ភេទស្រី អាយុ៣២ឆ្នាំ ២-ឈ្មោះ ផាន់ វុទ្ធី ភេទប្រុស អាយុ៣២ឆ្នាំ ៣-ឈ្មោះ
ប៊ិន សុជា ភេទប្រុស អាយុ៤២ឆ្នាំ ៤-ឈ្មោះ ពេជ្រ យ៉ា ភេទស្រី អាយុ៦៦ឆ្នាំ ៥-ឈ្មោះ លឹម ចាន់ថាវី ភេទស្រី អាយុ១០ឆ្នាំ ៦-ឈ្មោះ លឹម ចាន់រស្មី ភេទស្រី អាយុ៨ឆ្នាំ ៧-ឈ្មោះ រិន មករា ភេទប្រុស អាយុ៣ឆ្នាំ និង៨-ឈ្មោះ ហ៊ន ចិន្ដា ភេទស្រី អាយុ៣ឆ្នាំ ។
ពេលនេះ អ្នកជំងឺទាំង៨នាក់ដែលសង្ស័យពុលពងទាចៀននេះ ត្រូវបានសាច់ញាតិនាំយកទៅព្យាបាលនៅមន្ទីរពេទ្យបង្អែកអង្គរការ ចំណែកអ្នកធូរស្រាលក៏បានត្រឡប់ទៅផ្ទះវិញ ទោះបីជាបែបណា ការព្យាយាមសាកសួរទៅគ្រូពេទ្យថា ការពុលនេះអាចនិយាយបានថាជាការពុលអាហារ តែមិនអាចថាពុលពងទាមួយមុខបានទេ ។
គ្រូពេទ្យនិយាយថា ការពុលអាហារបណ្តាលឱ្យមានការក្អួតចង្អោរ ដែលយើងត្រូវតែដាក់សេរ៉ូមជួយឱ្យមានជាតិទឹកក្នុងខ្លួនឡើងវិញ ហើយការក្អួតនោះបើអស់ជាតិអាហារ ក្នុងពោះហើយក៏លែងជាបញ្ហាដែរ ។ (សម្រួលដោយ៖ ស្រីណា)
ចែករំលែកព័តមាននេះ