ខេត្តកំពត ៖ តាមសេចក្តីរាយការណ៍បឋមពីកំលាំងនគរបាលក្រុងកំពតបានឱ្យដឹងថា ស្ត្រីចំណាស់ម្នាក់បានរងរបួសធ្ងន់ ដោយសារត្រូវរថភ្លើងកៀរ ខណៈស្ត្រីរងគ្រោះដើរឆ្លងកាត់ផ្លូវរថភ្លើង ស្របពេលរថភ្លើងកំពុងធ្វើចរាចរណ៍ពីខេត្តព្រះសីហនុឆ្ពោះទៅរាជធានីភ្នំពេញ ។ បន្ទាប់ពីកើតហេតុ ស្ត្រីរងគ្រោះត្រូវបានក្រុមគ្រួសារនិងកំលាំងសមត្ថកិច្ចជួយដឹកយកទៅសង្គ្រោះនៅមន្ទីរពេទ្យបង្អែកខេត្តកំពត ។
ហេតុការណ៍ខាងលើនេះបានកើតឡើងកាលពីវេលាម៉ោង៤និង៤៥នាទីទៀបភ្លឺថ្ងៃទី១៩ ខែមិនា ឆ្នាំ២០១៩ នៅចំណុចផ្លូវរថភ្លើង ម្តុំវត្តវាលពួច ស្ថិតក្នុងភូមិអណ្តូងខ្មែរ សង្កាត់អណ្ដូងខ្មែរ ក្រុងកំពត។
តាមប្រភពពីកម្លាំងនគរបាលក្រុងកំពតបានបន្តថា ស្ត្រីដែលរងរបួសធ្ងន់ខាងលើឈ្មោះ យ៉ែម សារឹត អាយុ៥៦ឆ្នាំ មានទីលំនៅភូមិទ្វីខាងត្បូង សង្កាត់អណ្តូងខ្មែរ ក្រុងកំពត ។
តាមប្រភពពីកម្លាំងនគរបាលក្រុងកំពតបានបន្តទៀតថា ស្ត្រីរងគ្រោះមានសតិមិនគ្រប់ផងដែរ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ