រាជធានីភ្នំពេញ ៖ រថយន្តបែនចង្កូតស្ដាំដឹកខ្សាច់១គ្រឿង ខណៈកំពុងបើកបរលឿនបានវាក់ជាមួយរថយន្តកុងតឺន័រ១គ្រឿងទៀត ដែលកំពុងបើកបរឆ្លងផ្លូវ ពេលនោះ ជាន់ហ្វ្រាំងឈប់មិនទាន់ ក៏ជ្រុលទៅបុកចំទទឹងខ្លួនរថយន្តកុងតឺន័រនោះពេញទំហឹង បណ្ដាលឲ្យរថយន្តដឹកខ្សាច់ខាងលើ រងការខូចខាតខ្ទេចកាប៊ីនទាំងស្រុង…
រាជធានីភ្នំពេញ ៖ រថយន្តបែនចង្កូតស្ដាំដឹកខ្សាច់១គ្រឿង ខណៈកំពុងបើកបរលឿនបានវាក់ជាមួយរថយន្តកុងតឺន័រ១គ្រឿងទៀត ដែលកំពុងបើកបរឆ្លងផ្លូវ ពេលនោះ ជាន់ហ្វ្រាំងឈប់មិនទាន់ ក៏ជ្រុលទៅបុកចំទទឹងខ្លួនរថយន្តកុងតឺន័រនោះពេញទំហឹង បណ្ដាលឲ្យរថយន្តដឹកខ្សាច់ខាងលើ រងការខូចខាតខ្ទេចកាប៊ីនទាំងស្រុង និងគាបបុរសដែលជាអ្នកបើកបររងរបួសស្រាល ។
ឧប្បត្តិហេតុនោះ បានកើតឡើងនៅវេលាម៉ោង៦ និង៣៥នាទីព្រឹកថ្ងៃទី៥ ខែមីនា ឆ្នាំ២០២៦ នៅលើផ្លូវជាតិលេខ៤ ត្រង់ចំណុចមុខវត្តកំបូល ស្ថិតនៅក្នុងភូមិផ្សារកំបូល សង្កាត់កំបូល ខណ្ឌកំបូល រាជធានីភ្នំពេញ ។ រថយន្តបែនដឹកខ្សាច់១គ្រឿងខាងលើនោះពណ៌ខៀវ ឆ្នូតស ពាក់ស្លាកលេខចង្កូតស្ដាំPRV-0037 បើកបរដោយបុរសមិនស្គាស់អត្តសញ្ញាណម្នាក់ ។ ចំណែករថយន្តដឹកទូកុងតឺន័រដែលបើកឆ្លងផ្លូវ ម៉ាកSCANIA ពណ៌ខៀវលាយស ពាក់ស្លាកលេខភ្នំពេញ3F-9485 បើកបរដោយបុរសម្នាក់មិនស្គាស់អត្តសញ្ញាណដូចគ្នា ។
បុរសអ្នកលក់នំកងម្នាក់បាននិយាយថា នៅមុនពេលកើតហេតុ ខណៈដែលគាត់កំពុងជិះ
ម៉ូតូដើរលក់នំកងតាមផ្លូវជាតិលេខ៤ ទៅដល់ត្រង់ចំណុចកើតហេតុបានឃើញរថយន្តកុងតឺន័រម៉ាកSCANIA នោះបើកចេញពីផ្លូវបេតុងភូមិកំរៀងស្រែក្នុង រួចឡើងឆ្លងផ្លូវជាតិលេខ៤ ។ ខណៈនោះគាត់ក៏បានឈប់ម៉ូតូឲ្យរថយន្តនោះឆ្លងសិន ស្រាប់តែឃើញរថយន្តបែនដឹកខ្សាច់បើកបរតាមផ្លូវជាតិលេខ៤ ក្នុងទិសដៅពីលិចទៅកើតលឿនគួរសមទៅដល់បុកចំទទឹងខ្លួនរថយន្តកុងតឺន័រនោះពេញទំហឹង ជាហេតុបណ្ដាលឲ្យរថយន្តដឹកខ្សាច់រងការខូចខាតខ្ទេចកាប៊ីនទាំងស្រុង ហើយគាបអ្នកបើកបរជាប់ក្នុងកាប៊ីនតែម្ដង ។
សមត្ថកិច្ចបានប្រាប់ថា អ្នកបើកបររថយន្តបែនដឹកខ្សាច់រងរបួសស្រាលទេ ប៉ុន្តែបានជាប់នៅក្នុងកាប៊ីនរថយន្តចេញអត់រួច ហើយក៏បង្កឲ្យមានការកកស្ទះចរាចរផងដែរ ក្រោយពេលកើតហេតុ ក្រុមរុករកនិងសង្គ្រោះអង្គភាព៧១១ បានចុះទៅជួយកាត់ដែកកាប៊ីនរថយន្តទើបទាញយកអ្នកបើកបរចេញបាន ។
ចំណែករថយន្តកុងតឺន័របានរងការខូចខាតតិចជាងរថយន្តបែនដឹកខ្សាច់នោះទេ បន្ទាប់មក នគរបាលប៉ុស្តិ៍កំបូល និងនគរបាលចរាចរណ៍នៃអធិការដ្ឋានខណ្ឌកំបូល បានចុះទៅធ្វើការវាស់វែង និងសម្រួលចរាចរមិនឲ្យកកស្ទះ ព្រមទាំងនាំយករថយន្តទាំង២គ្រឿងទៅរក្សាទុករង់ចាំការដោះស្រាយគ្នានៅពេលក្រោយ ៕
ចែករំលែកព័តមាននេះ