ខេត្តកំពត ៖ ដោយមានសំណូមពរពីប្រជាពលរដ្ឋគ្រប់មជ្ឈដ្ឋាននៅក្នុងក្រុងកំពត ជាពិសេសប្រជាពលរដ្ឋទូទាំងខេត្ត សូមឲ្យសមត្ថកិច្ចនិងស្ថាប័នពាក់ពន្ឋ័ចាត់វិធានការចំពោះម៉ូតូដែលកែច្នៃបំពង់ស៊ឺម៉ាំងបំពងសំឡេងបើកបរក្នុងទីប្រជុំជន និងតាមផ្លូវសាធារណៈនានា ដែលធ្វើឲ្យប៉ះពាល់ដល់របៀបរៀបរយ និងសណ្តាប់ធ្នាប់យ៉ាងធ្ងន់ធ្ងរ ជាពិសេសនៅក្បែរមន្ទីរពេទ្យដែលត្រូវការភាពស្ងប់ស្ងាត់ជាដើម ។
ដោយទទួលបានសំណូមពរពីគ្រប់មជ្ឈដ្ឋានខាងលើ លោកឧត្តមសេនីយទោ ម៉ៅ ចន្ទ័មធុរិទ្ឋ ស្នងការខេត្ត បានចេញបញ្ជាឲ្យកំលាំងនគរបាលអន្តរាគមន៍សហការជាមួយកំលាំងនគរបាលក្រុងកំពត ចុះប្រតិបត្តិការឃាត់ម៉ូតូគ្រប់ប្រភេទដែលកែច្នៃបំពង់ស៊ឺម៉ាំងបង្កសំឡេងរំខាន យកមកកាន់អធិការក្រុង ដើម្បីធ្វើការអប់រំដល់ម្ចាស់ម៉ូតូឲ្យដោះបំពង់ស៊ឺម៉ាំងដែលកែច្នៃនោះចេញ ហើយដាក់បំពង់ស៊ឺម៉ាំងឱ្យបានត្រឹមត្រូវដូចដើមវិញ ។
លោកវរសេនីយ៍ឯក ហោ វណ្ណា អធិការនគរបាលក្រុងកំពតបានប្រាប់កោះសន្តិភាពនាព្រឹកថ្ងៃទី១៨ ខែមិថុនា ឆ្នាំ២០១៩នេះឱ្យដឹងថា ក្រោយពីបានទទួលបញ្ជាពីលោកឧត្តមសេនីយ៍ស្នងការខេត្តរួចមក លោកបានដឹកនាំកម្លាំងដោយផ្ទាល់ចុះល្បាតគ្រប់ច្រកផ្លូវក្នុងក្រុងដើម្បីឃាត់ម៉ូតូដែលកែច្នៃបំពង់ស៊ឺម៉ាំងបំពងសំឡេងដែលធ្វើឲ្យរំខានដល់ប្រជាពលរដ្ឋ និងមហាជនគ្រប់មជ្ឈដ្ឋានដែលមានលំនៅដ្ឋានក្បែរដងផ្លូវនោះ ។
លោកអធិការនគរបាលក្រុងកំពតបានបន្តថា ក្នុងកិច្ចប្រតិបត្តិការខាងលើ គ្រាន់តែរយៈពេល៣ថ្ងៃគិតពីថ្ងៃទី១៦ មិថុនា រហូតដល់ថ្ងៃទី១៨ មិថុនា ២០១៩នេះ កំលាំងសមត្ថកិច្ចឃាត់បានម៉ូតូគ្រប់ប្រភេទដែលកែច្នៃបំពង់ស៊ឺម៉ាំងចំនួន២៦គ្រឿង នាំមករក្សាទុកនៅអធិការក្រុង ដើម្បីហៅម្ចាស់ឲ្យចូលខ្លួនមកធ្វើការអបរំ និងឲ្យបញ្ឈប់ការកែច្នៃបំពង់ស៊ឺម៉ាំងបង្កសំឡេងរំខានតទៅទៀត បើមិនរាងចាលនោះទេ ពេលសមត្ថកិច្ចឃាត់បានលើកក្រោយ នឹងចាត់ការតាមច្បាប់ហើយ៕ (កែសម្រួលដោយ ៖ ធីតា)
ចែករំលែកព័តមាននេះ