ខេត្តបាត់ដំបង ៖ ក្នុងអំឡុងសង្គ្រាមឈ្លានពានពីសំណាក់ពួកទាហានថៃ រយៈពេលជាង២០ថ្ងៃ កាលពីខែធ្នូ ឆ្នាំ២០២៥ កន្លងទៅថ្មីៗនេះ ស្រុកចំនួន០៣ក្នុងខេត្តបាត់ដំបង បានទទួលរងនូវការបំផ្លេចបំផ្លាញដោយគ្រាប់ផ្លោងជាង៣៥០គ្រាប់ រាប់ទាំងគ្រាប់បែកដែលពួកសត្រូវឈ្លានពាននេះ…
ខេត្តបាត់ដំបង ៖ ក្នុងអំឡុងសង្គ្រាមឈ្លានពានពីសំណាក់ពួកទាហានថៃ រយៈពេលជាង២០ថ្ងៃ កាលពីខែធ្នូ ឆ្នាំ២០២៥ កន្លងទៅថ្មីៗនេះ ស្រុកចំនួន០៣ក្នុងខេត្តបាត់ដំបង បានទទួលរងនូវការបំផ្លេចបំផ្លាញដោយគ្រាប់ផ្លោងជាង៣៥០គ្រាប់ រាប់ទាំងគ្រាប់បែកដែលពួកសត្រូវឈ្លានពាននេះ ទម្លាក់ពីលើយន្តហោះចម្បាំងប្រភេទ T-50 ផង ។ នេះបើតាមប្រសាសន៏លោកអភិបាលខេត្ត ដែលបានរាយការណ៍ជូនទៅក្រុមការងារ«AOT» ពេលចុះពិនិត្យ និងផ្ទៀងផ្ទាត់ពីស្ថានការណ៍នៅតាមបណ្ដាស្រុក ជាប់ព្រំដែនកម្ពុជា-ថៃ ដែលរងគ្រោះដោយគ្រាប់ផ្លោងរបស់ពួកសត្រូវឈ្លានពាន ។
អភិបាលខេត្តបាត់ដំបង លោក សុខ លូ បានបង្ហាញរបាយការណ៍ខាងលើនេះ ទៅកាន់ក្រុមការងារ «AOT» កាលពីថ្ងៃទី២១ មករា ក្នុងពេលដែលលោក និងមន្ត្រីក្រោមឱវាទ ចុះជួយសម្របសម្រូលដល់ក្រុមអ្នកសង្កេតការណ៍អាស៊ាន «AOT» តាមបណ្ដាស្រុកនានា ក្នុងភូមិសាស្ត្រខេត្តបាត់ដំបង ជាប់ព្រំដែនកម្ពុជា-ថៃ ដែលរងគ្រោះដោយសារគ្រាប់ផ្លោងរបស់ពួកបច្ចារមិត្ត ក្នុងអំឡុងសង្គ្រាមជាង២០ថ្ងៃកន្លងទៅនេះ ។
ក្នុងកិច្ចប្រតិបត្តិការពិនិត្យ និងផ្ទៀងផ្ទាត់ពីស្ថានការណ៍នៅតាមបន្ទាត់ព្រំដែនដែននេះ លោក សុខ លូ បានរាយការណ៍ប្រាប់ដល់ក្រុមការងារ«AOT»ថា ក្នុងអំឡុងសង្ក្រាមឈ្លានពានរបស់ប្រទេសថៃ មកលើដែនអធិតេយ្យភាពកម្ពុជាជាង២០ថ្ងៃ កាលពីខែធ្នូ ឆ្នាំ២០២៥ កន្លងទៅថ្មីៗនេះ ពួកទាហានថៃបានប្រើប្រាស់អាវុធធុនធ្ងន់ រាប់ទាំងការប្រើប្រាស់យន្តហោះចម្បាំងផង បានបាញ់ផ្លោងធ្លាក់ទៅលើភូមិសាស្ត្រនានា ក្នុងស្រុកចំនួន០៣ក្នុងខេត្តបាត់ដំបង ដែលធ្វើឲ្យខូចខាតលំនៅឋានប្រជាពលរដ្ឋ ហេដ្ឋារចនាសម្ព័ន្ធស៊ីវិលនានា រួមទាំងមន្ទីរពេទ្យផង ។
លោកបានបង្ហាញរបាយការណ៍ពិស្ដារថា ស្រុកទាំង០៣ដែលរងគ្រោះដោយគ្រាប់ផ្លោងរបស់ពួកទាហានថៃ រួមមាន៖ ស្រុកសំពៅលូន ស្រុកភ្នំព្រឹក និងស្រុកបាណន់ ។ ក្នុងអំឡុងសង្គ្រាមឈ្លានពាននេះ ពួកសត្រូវបានធ្វើសកម្មភាពចំនួន២៩លើក ដោយប្រើប្រាសកាំភ្លើងធុនធ្ងន់ (កាំភ្លើងធំផ្លោង) និងយន្តហោះចម្បាំងធុន«T-50»ផង។
លោកអភិបាលខេត្តបានបញ្ជាក់ប្រាប់ដល់ក្រុមការងារ«AOT» ទៀតថា ពួកទាហានថៃ បានប្រើប្រាស់យន្តហោះចម្បាំង«T-50»ចំនួន០៤គ្រឿង ធ្វើសកម្មភាពចំនួន០៣លើក ទម្លាក់គ្រាប់បែកចំនួន០៦គ្រាប់ ចូលទីតាំងស៊ីវិលក្នុងទឹកដីស្រុកបាណន់ និងប្រើប្រាស់កាំភ្លើងធំធុនធ្ងន់បាញ់ផ្លោងចំនួន២៦លើក ស្មើនឹងចំនួន៣៥៤គ្រាប់ ចូលក្នុងភូមិសាស្ត្រ ស្រុកសំពៅលូន និងស្រុកភ្នំព្រឹក ។
សកម្មភាពបាញ់ផ្លោង និងទម្លាក់គ្រាប់បែកពីលើយន្តហោះចម្បាំងផង ចូលដែនអធិបតេយ្យភាពកម្ពុជាយ៉ាងគគ្លើនពីសំណាក់ពួកសត្រូវឈ្លានពានថៃខាងលើនេះបានធ្វើឲ្យប្រជាពលរដ្ឋកម្ពុជា ដែលរស់នៅតាមបណ្ដាស្រុកជាប់ព្រំដែនកម្ពុជា-ថៃ ប្រមាណ២៦,៤៩១គ្រួសារ មនុស្សរាយប្រមាណ៨៩,៤៤៧នាក់ បានរត់ភៀសសឹក ចាកចេញពីផ្ទះសម្បែងមករកតំបន់មានសុវត្ថិភាព ។
ប៉ុន្តែរបាយការណ៍មិនបានលម្អិតពីចំនួនផ្ទះសម្បែងរបស់ប្រជាពលរដ្ឋដែលរងការខូចខាត ឬហេដ្ឋារចនាសម្ព័ន្ធស៊ីវិលផ្សេងៗទេ ហើយប្រជាពលរដ្ឋក៏ពុំមានគ្រោះថ្នាក់ដោយសារគ្រាប់ផ្លោង ឬគ្រាប់បែកទម្លាក់ពីលើយន្តហោះរបស់សត្រូវឈ្លានពានដ៏កំរោលនេះដែរ ៕
ចែករំលែកព័តមាននេះ