រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន ប្រធានរដ្ឋសភា បានអំពាវនាវដល់អ្នកភូតកុហក ឈប់ប្រើការឈឺចាប់របស់សម្ដេចកាលពី ៥០មុន ដើម្បីផលប្រយោជន៍ផ្ទាល់ខ្លួនតទៅទៀតទៅ…
រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន ប្រធានរដ្ឋសភា បានអំពាវនាវដល់អ្នកភូតកុហក ឈប់ប្រើការឈឺចាប់របស់សម្ដេចកាលពី ៥០មុន ដើម្បីផលប្រយោជន៍ផ្ទាល់ខ្លួនតទៅទៀតទៅ ។ យោងតាមបណ្ដាញទំនាក់ទំនងសង្គមផ្លូវការ នាព្រឹកថ្ងៃទី ២៣ ខែមករា ឆ្នាំ ២០២៦ សម្ដេចតេជោបានសរសេរថា «សូមបញ្ឈប់ប្រើប្រាស់ការឈឺចាប់របស់ខ្ញុំកាលពី ៥០មុន មកបោកប្រាស់ខ្ញុំតទៅទៀតទៅ» ។
សម្ដេចតេជោលើកឡើងថា ក្រោយរំដោះចេញពីរបបប៉ុល ពត ឆ្នាំ ១៩៧៩ ពិសេសក្រោយពេលដែលខ្ញុំនិយាយពីរឿងកូនស្លាប់ ដោយមានភាគនិទាន និងភាពយន្តរឿង «កូនប្រុសក្រោមពន្លឺព្រះចន្ទពេញបូណ៍មី» មក មានមនុស្សមិនតិចជាង ២០នាក់ ទេ ដែលបន្លំខ្លួនធ្វើជាកំសត់កូនប្រុសខ្ញុំ ដែលបានស្លាប់ទៅនោះមកចាប់ជាតិ ។ មនុស្សទាំងនោះខ្លះសរសេរសំបុត្របញ្ជូនមកខ្ញុំចុះតាមទស្សនាវដ្ដី និងក្រោយបង្ហោះតាមបណ្តាញសង្គមដូចជា Facebook ជាដើម ។
សម្ដេចតេជោបានបន្ថែមថា ៖ «ករណីចុងក្រោយហាក់ដូចធ្ងន់បន្តិចមានទាំងអត្ថបទមានទាំងសារឆ្លើយឆ្លងជាមួយមនុស្សដែលស្គាល់ telegram របស់ខ្ញុំ ។ ខ្ញុំសូមអំពាវនាវដល់អ្នកភូតកុហកឈប់ប្រើការឈឺចាប់របស់ខ្ញុំដើម្បីផលប្រយោជន៍ផ្ទាល់ខ្លួនតទៅទៀតទៅ» ៕
ចែករំលែកព័តមាននេះ