ប្រទេសថៃ ៖ យោងតាមភ្នាក់ងារសារព័ត៌មាន Bangkok Post កាលពីថ្ងៃទី១២ មិថុនា កន្លងមកបានឲ្យដឹងថា អ្នកនាំចេញអង្ករថៃកំពុងតែព្រួយបារម្ភពីទស្សនៈវិស័យក្នុងឆ្នាំនេះ ព្រោះប្រទេសចិនចង់បង្កើនការនាំចេញជាពិសេសទៅកាន់អាហ្វ្រិក…
ប្រទេសថៃ ៖ យោងតាមភ្នាក់ងារសារព័ត៌មាន Bangkok Post កាលពីថ្ងៃទី១២ មិថុនា កន្លងមកបានឲ្យដឹងថា អ្នកនាំចេញអង្ករថៃកំពុងតែព្រួយបារម្ភពីទស្សនៈវិស័យក្នុងឆ្នាំនេះ ព្រោះប្រទេសចិនចង់បង្កើនការនាំចេញជាពិសេសទៅកាន់អាហ្វ្រិក ។
លោក Chookiat Ophaswonse ដែលជាប្រធានកត្តិយសប្រចាំសមាគមន៍អ្នកនាំចេញអង្ករថៃបានឲ្យដឹងថា ទិន្នផលអង្កររបស់ប្រទេសចិនមានស្មើប្រមាណ១២០លានតោនក្នុងមួយឆ្នាំ ហើយប្រទេសនេះអាចនឹងបង្កើនការនាំចេញពី ១.៥ ទៅ ២លានតោន មកស្មើ៣លានតោនផងដែរក្នុងឆ្នាំនេះ ។ លោកបានបន្តថា អាហ្វ្រិកគឺជាទីផ្សារដែលមានសក្តានុពលសម្រាប់ប្រទេសចិន ព្រោះអតិថិជនមានទម្លាប់បរិភោគបាយ ។
អង្ករ.សរបស់ប្រទេសចិនមានតម្លៃប្រមាណ ៣០០ដុល្លារក្នុងមួយតោន ខណៈដែលអង្ករ.សថៃមានតម្លៃ៣៩០ដុល្លារក្នុងមួយតោន និងអង្ករ.សវៀតណាមមានតម្លៃ៣៦០ដុល្លារក្នុងមួយតោន ព្រមទាំងអង្ករ.សឥណ្ឌាមានតម្លៃ៣៧០ដុល្លារក្នុងមួយតោន ។
លោក Chookiat បានបន្តថា «អង្ករចិនគឺពិតជាមានតម្លៃទាបណាស់បើធៀបនឹងអង្ករដទៃ ។ លើសពីនេះទៅទៀត ប្រទេសថៃកំពុងតែអស់អង្ករពីស្តុកហើយ» ។ ការនាំចេញអង្កររបស់ប្រទេសថៃសរុបស្មើ ១១.០៩លានតោនកាលពីឆ្នាំមុន ឬធ្លាក់ចុះ ៥%ពី ១១.៦៧លានតោនក្នុងឆ្នាំ ២០១៧ ។
តម្លៃនៃការនាំចេញអង្ករថៃបានកើនឡើង ៨.៣%កាលពីឆ្នាំមុន ពី៥.១៨លានដុល្លារក្នុងឆ្នាំ ២០១៧មកស្មើ ៥.៦១ប៊ីលានដុល្លារ ។ តម្លៃអង្ករនាំចេញជាមធ្យមមានតម្លៃ ៥០៧ដុល្លារក្នុងមួយតោនផងដែរកាលពីឆ្នាំមុន ឬខ្ពស់ជាងតម្លៃក្នុងឆ្នាំ ២០១៧ ១៤.១% ។ សម្រាប់ឆ្នាំ ២០១៩នេះ អ្នកនាំចេញអង្ករថៃព្យាករណ៍ថានឹងអាចនាំចេញបាន ៩.៥លានតោន ឬទាបជាងការព្យាករណ៍របស់ក្រសួងពាណិជ្ជកម្មប្រមាណ៥០ម៉ឺនតោន ។
យោងទៅតាមលោក Chookiat បានឲ្យដឹងទៀតថា ប្រទេសចិនបានបន្តបង្កាត់ពូជប្រភេទអង្ករបន្ថែមដែលអាចប្រមូលទិន្នផលបានច្រើនជាងមុន មានន័យថាប្រទេសនេះអាចបង្កើនការនាំចេញអង្ករទៅកាន់ប្រទេសអាស៊ីក្នុងតម្លៃទាប។
លោកបាននិយាយថា «ឲ្យតែប្រទេសចិនមានសមត្ថភាពក្នុងការនាំចេញអង្ករទៅកាន់អាស៊ីជាពិសេសហុងកុង ឥណ្ឌូនេស៊ី ម៉ាឡេស៊ី និងហ្វីលីពីន ទីផ្សារប្រទេសថៃនឹងទទួលរងការប៉ះពាល់ធ្ងន់ធ្ងរជាងគេ»។ លោកបានបន្ថែមថា រដ្ឋាភិបាលថ្មីគួរតែលើកតម្កើងការបង្កាត់ពូជប្រភេទអង្ករថ្មី និងគាំទ្រការស្រាវជ្រាវនិងអភិវឌ្ឍន៍ដើម្បីបង្កើនតម្លៃអង្ករថៃនិងកាត់បន្ថយការចំណាយក្នុងការដាំដុះស្រូវ ៕
ប្រភព ៖ bangkokpost , កែសម្រួលដោយ ៖ សំណាង
ចែករំលែកព័តមាននេះ