ខេត្តស្ទឹងត្រែង ៖ អំណោយរបស់សប្បុរសជនជាបន្តបន្ទាប់តាមរយៈកោះសន្តិភាពបានយកទៅឱ្យដល់ដៃកូនប្រុសភ្លោះកំព្រា២នាក់ផ្ញើខ្លួនលើជីដូនជរារស់នៅក្នុងវត្តទាំងលំបាកវេទនា ។ ព្រហ្មលិខិតកំណត់ឱ្យពួកគេកើតមកជាកូនភ្លោះ ក្នុងត្រកូលអ្នកក្រខ្សត់ និងថែមទាំងមានកាយសម្បទាមិនគ្រប់គ្រាន់ស្វិតដៃជើងមិនអាចកំរើក ឬដើរបានក្រៅពីយកគូទជំនួសជើង ។ ភ្នាក់ងារកោះសន្តិភាពបានយកអំណោយទៅជូនផ្ទាល់មានសំលៀកបំពាក់កីឡាចំនួន២សំរាប់ សារុង១ ក្រមា១ លុយចំនួន២២០.០០០រៀល និង៧០ដុល្លារ ដែលថវិកានេះបានទទួលពីមន្ត្រីនៅខុទ្ទកាល័យលោកជំទាវបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាមាន ១-លោកឈរ ផល្លី នាយករងខុទ្ទកាល័យលោកជំទាវប្រធាន ១០ដុល្លារ, ២-លោកថោ ជេដ្ឋា នាយករងខុទ្ទកាល័យលោកជំទាវប្រធាន ៥០ដុល្លារ, ៣-លោកសំ វណ្ណារ៉ា និងលោកជំទាវ គង់ ម៉ារី លេខាលោកជំទាវប្រធាន ៨ម៉ឺនរៀល. ៤-កញ្ញា ឈរ ស្រីពីង លេខាលោកជំទាវប្រធាន ១០ដុល្លារ និង៥-លោកតាំង សាមឿន លេខាលោកជំទាវប្រធាន ១០ម៉ឺនរៀល និងមួយផ្នែកទៀតទទួលបានពីលោកយាយ ចាន់ ឃឺន, លោកញ៉ែម មឿន និងភរិយា ឧបត្ថម្ភសំលៀកបំពាក់២សំរាប់ សារុង១ ក្រមា១ និងថវិកា៤ម៉ឺនរៀល ។
ជីដូនរបស់ដួង ហួ និងដួង ហៃ ពេលទទួលអំណោយបានប្រាប់ថា គាត់កំពុងតែមានជំងឺ ចំណែកចៅទាំង២មានជំងឺក្តៅខ្លួន និងរាកទៀតផង ហើយត្រូវសាច់ញាតិរបស់លោកយាយ ទូ គីមឡេង ជួយថែរក្សា ។ លោកយាយអង្អែលក្បាលចៅរបស់គាត់ដោយទឹកមុខញញឹម រួចលើកដៃទាំង២ប្រណម្យបួងសួងដល់ទេវតាឱ្យជួយថែរក្សាដល់សប្បុរសជនទាំងអស់ដែលបានដាក់ទានដល់រូបគាត់ និងចៅៗកំពុងរងទុក្ខលំបាកទាំងនេះ ។ លោកយាយឱ្យដឹងថា កាលពីមុនលោកយាយ និងចៅរស់នៅក្នុងផ្ទះនេះដោយមានដំបូលប្រក់ស្លឹក ជញ្ជាំងប្ញស្សីប៉ុណ្ណោះ តែក្រោយមកគណៈកម្មការវត្ត ព្រមទាំងព្រះសង្ឃមើលឃើញពីការលំបាករបស់គាត់ទើបសង់ផ្ទះស្នាក់មួយខ្នងដំបូលប្រក់ស័ង្កសីជូនដល់គាត់ និងចៅ ។ កន្លងមកមានសប្បុរសជនជួយជាថវិកា និងសំភារមួយចំនួនដល់រូបគាត់ដែរ ហើយបន្ទាប់ពីសារព័ត៌មានកោះសន្តិភាពបានចុះផ្សាយ ក៏មានអំណោយទានជាបន្តបន្ទាប់គ្រាន់ផ្គត់ផ្គង់ និងទិញថ្នាំសង្កូវ ។
លោកយាយរៀបរាប់ថា ទោះបីជាលំបាកយ៉ាងណាក៏គាត់នៅតែពុះពារចិញ្ចឹមបីបាច់ថែរក្សាចៅទាំង២នាក់ដែរ ។ សព្វថ្ងៃនេះគាត់មិនអាចទៅរកកំរៃមកផ្គត់ផ្គង់ជីវភាពទេ ដោយសារតែគាត់សុំសីល រស់បានដោយប្រាក់ដែលសប្បុរសជនដាក់ទានប៉ុណ្ណោះ គឺចំណីអាហាររបស់ពួកគាត់បានមួយថ្ងៃគិតមួយថ្ងៃ ។ ខ្លួនគាត់មិនសូវមានកម្លាំងទេ ឯដៃជើងស្ពឹកស្រពន់ពិបាកក្នុងការថែរក្សាចៅទាំង២ណាស់មិនដូចមុនឡើយ ៕
ចែករំលែកព័តមាននេះ