រាជធានីភ្នំពេញ ៖ សម្តេច ស ខេង ឧបកនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានព្រមានចាត់វិធានតាមផ្លូវច្បាប់ចំពោះអតីតមន្ត្រីបក្សប្រឆាំង ប្រសិនប្រមូលផ្តុំគ្នា ដើម្បីហូបនំបញ្ចុក ក្នុងគោលបំណងផ្តួលរំលំរាជដ្ឋាភិបាល ។…
រាជធានីភ្នំពេញ ៖ សម្តេច ស ខេង ឧបកនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានព្រមានចាត់វិធានតាមផ្លូវច្បាប់ចំពោះអតីតមន្ត្រីបក្សប្រឆាំង ប្រសិនប្រមូលផ្តុំគ្នា ដើម្បីហូបនំបញ្ចុក ក្នុងគោលបំណងផ្តួលរំលំរាជដ្ឋាភិបាល ។ ការលើកឡើងរបស់សម្តេច ស ខេង ក្រោយពីព្រឹត្តិការណ៍ហូបនំបញ្ចុកទូទាំងប្រទេសបានបញ្ចប់ទៅដោយរលូន កាលពីថ្ងៃទី៩ មិថុនា ដោយសមាជិកគណបក្សប្រជាជនកម្ពុជាមានបានចូលរួមហូបនំបញ្ចុកមានចំនួនច្រើនជាងអតីតបក្សប្រឆាំង ។
ប៉ុន្តែយ៉ាងណាក្តីលោកសម រង្ស៊ី អតីតប្រធានគណបក្សសង្គ្រោះជាតិអះអាង ខ្លួនទទួលបានជោគជ័យក្នុងការកៀគរឲ្យសកម្មជនហូបនំបញ្ចុក ហើយលោកក៏អំពាវនាវឲ្យសកម្មជនខ្លួនបន្តហូបនំបញ្ចុកបន្តទៀតដោយហៅថា ហូបនំបញ្ចុកសង្គ្រោះជាតិ ។ ទាក់ទិននឹងនំបញ្ចុកនេះដែរនៅក្នុងពិធីប្រកាសចូលកាន់មុខតំណែងក្រុមប្រឹក្សាខេត្តស្វាយរៀង អាណត្តិទី៣ នៅថ្ងៃទី១៦ ខែមិថុនា ឆ្នាំ២០១៩ សម្តេចក្រឡាហោម ស ខេង នាយករដ្ឋមន្ត្រីស្តីទីបានថ្លែងថា ការហូបនំបញ្ចុករបស់សកម្មជនអតីតគណបក្សសង្គ្រោះជាតិ (CNRP) ដើម្បីប្រជុំគ្នាពិភាក្សារឿងនយោបាយ ខណៈនំបញ្ចុកសមាជិក-សមាជិការបស់គណបក្សប្រជាជនកម្ពុជា គឺហូបជុំគ្នា ដើម្បីបង្ហាញពីភាពសាមគ្គីគ្នាទៅវិញទៅមក ។
សម្ដេច ស ខេង បានឲ្យដឹងថា កម្មវិធីនំបញ្ចុករបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាប្រធានគណបក្សប្រជាជនកម្ពុជា គឺជារឿងត្រឹមត្រូវ ដើម្បីបង្ហាញអំពីសាមគ្គីភាព និងឯកភាពជាតិ ។ សម្ដេចមានប្រសាសន៍ថា «ក៏ប៉ុន្ដែមានក្រុមមួយនោះ (ក្រុមអតីតបក្សប្រឆាំង) នំបញ្ចុក គឺជាការប្រជុំធាតុពិតជាការប្រជុំនយោបាយ ។ ខ្ញុំបានបញ្ជាក់ កាលពីនៅត្បូងឃ្មុំថា ការប្រជុំនយោបាយនេះមានពីរពួកគាត់ប្រជុំ ដើម្បីអនុវត្តន៍តាមគោលការណ៍លទ្ធប្រជាធិបតេយ្យសេរីពហុបក្សតាមច្បាប់ជាធរមាន ដើម្បីត្រៀមបោះឆ្នោតនាពេលខាងមុខ ២០២២-២០២៣ អាហ្នឹងត្រឹមត្រូវ ហើយលើកទឹកចិត្តថែមទៀត» ។ សម្ដេចក្រឡាហោម ស ខេងក៏បានព្រមានយ៉ាងដូច្នេះបើហូបនំបញ្ចុក ដើម្បីប្រមូលគ្នាចាត់តាំងគ្នាមកធ្វើបដិវត្ដន៍ពណ៌ ផ្ដួលរំលំរដ្ឋាភិបាលបញ្ហាហ្នឹងខុសច្បាប់ទៅវិញទេ ច្បាប់នឹងចាត់វិធានការតាមផ្លូវច្បាប់ ។
ជាមួយគ្នានេះសម្ដេចបានគូសបញ្ជាក់ «ការជួបជុំមានបំណងប្រមូលផ្ដុំ ដើម្បីនាំគ្នាបះបោរ ផ្ដួលរំលំរដ្ឋាភិបាលដែលកើតចេញពីការបោះឆ្នោត គឺខុសខ្ញុំបញ្ជាក់ថា គឺខុស ។ ចឹងយើងមានភារៈកិច្ចធ្វើម៉េច ? យើងមានភារៈកិច្ចគ្រប់គ្រងសារភាពការមិនឲ្យអ្នកឯងធ្វើចឹងបានទេ ។ ហើយផ្ដើមចេញពីការផ្សព្វផ្សាយនៃការពន្យល់ជូនប្រជាពលរដ្ឋ ជូនការគាត់មិនដឹងគាត់ចេះ តាមគេដូចការឆ្នាំ២០១៣ នាំគ្នាធ្វើបាតុកម្មអស់ជ្រូក អស់មាន់ បើធ្វើរបៀបនឹងខុសច្បាប់ ហើយយើងនឹងមានវិធានការ» ៕ កែសម្រួលដោយ៖ សុឃាក់
ចែករំលែកព័តមាននេះ