សហរដ្ឋអាមេរិក-តួកគី ៖ កាសែតបារាំងLE FIGAROបានចេញផ្សាយកាលពីថ្ងៃទី១៤មិថុនានូវអត្ថបទមួយ អំពីការពាក់មុខយក្សដាក់គ្នា រវាងអាមេរិកនិងតួកគីដែលជាតួអង្គសំខាន់មួយក្នុងផ្ទៃអូតង់។ កាសែតនោះរៀបរាប់ថា ប្រព័ន្ធមីស៊ីលការពារអាកាសរុស្សុី S-400 ត្រូវផ្ដល់នាឆ្នាំនេះទៅឲ្យតួកគី តែការទទួលនេះត្រូវបានសហរដ្ឋអាមេរិកយល់ថាមិនសមស្រប ទាក់ទិននឹងសន្តិសុខរបស់អូតង់។
ម្យ៉ាងវិញទៀតការផ្ដល់មីស៊ីលនោះត្រូវបានអាមេរិកយល់ថា អាចបើកដៃឲ្យរុស្ស៊ីក្ដាប់បណ្ដាទិន្នន័យយុទ្ធសាស្ត្រ ទាក់ទិននឹងយន្តហោះបំបាំងកាយជំនាន់ថ្មីរបស់ខ្លួនF-35 ដែលក្រុងអង់ការ៉ាក៏ចង់ទិញដល់ទៅ១០០គ្រឿង។ យន្តហោះអាមេរិកនោះតាមពិតផលិត ដោយឲ្យវាស៊ីគ្នាទៅនឹងបណ្ដាប្រព័ន្ធយោធារបស់អូតង់ ក្នុងនោះក៏មានប្រព័ន្ធការពារប្រឆាំងមីស៊ីលផងដែរ។
ក្នុងគ្រាដំបូងក្រុងវ៉ាស៊ិនតោន បានផ្អាកមិនប្រគល់យន្តហោះF-35ឲ្យដល់តួកគី ហើយព្រមានពីផលវិបាកធ្ងន់ធ្ងរនានា សម្រាប់ទំនាក់ទំនងយោធារវាងប្រទេសទាំង២ ប្រសិនបើក្រុងអង់ការ៉ាពុំព្រមបោះបង់ចោល ការទទួលS-400ពីរុស្ស៊ីទេនោះ។ កាលពីថ្ងៃទី៧មិថុនាក្រុងវ៉ាស៊ិនតោនរហូតដល់ដាក់ឱសានវាទមួយដល់តួកគី ទុកពេលត្រឹមថ្ងៃទី៣១កក្កដា ឲ្យតួកគីបោះបង់ចោលការទិញមីស៊ីលរុស្ស៊ី។
ប្រសិនបើដល់ពេលនោះតួកគីមិនព្រមធ្វើតាមទេ នោះបណ្ដាអ្នកបើកយន្តហោះតួកគី ដែលបច្ចុប្បន្នកំពុងហ្វឹកហ្វឺនពីការប្រើយន្តហោះF-35នៅអាមេរិកនឹងត្រូវបណ្ដេញចេញ រួចបុគ្គលិកជាជនជាតិតួកគីដែលធ្វើការក្នុងក្រុមហ៊ុនផលិតយន្តហោះF-35 ក៏ត្រូវប្ដូរចេញ។ ចំណែកយន្តហោះF-35ចំនួន៤គ្រឿងដែលផ្ដល់ឲ្យតួកគីរួចហើយ តែស្ថិតក្នុងដែនដីអាមេរិកនៅឡើយក៏ឈប់ប្រគល់ឲ្យដែរ។ ចំណែកតួកគីវិញដែលបានបញ្ជូនមនុស្ស ទៅកាន់រុស្សុីដើម្បីរៀនប្រើប្រព័ន្ធS-400 ទោះអាមេរិកដាក់ឱសានវាទបែបនេះក៏ហាក់ធ្វើមិនដឹងមិនឮដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ