រដ្ឋធានីវ៉ាស៊ីនតោន៖ យោងតាមសេចក្តីរាយការណ៍របស់ភ្នាក់ងារសារព័ត៌មាន Reuters កាលពីថ្ងៃទី១២ មិថុនា កន្លងមកនេះបានឲ្យដឹងថា ការិយាល័យគ្រប់គ្រង និងថវិកាក្រោម White House របស់សហរដ្ឋអាមេរិកបានប្រាប់ដល់សភាអាមេរិកថា ពួកគេនឹងសម្រេចគោលដៅហាមឃាត់រាល់កិច្ចព្រមព្រៀងអាជីវកម្មជាមួយនឹងក្រុមហ៊ុនដែលធ្វើអាជីវកម្មជាមួយនឹងក្រុមហ៊ុន Huawei ក្នុងរយៈពេល២ឆ្នាំខាងមុខ ។
លោក Russ Vought ដែលជាប្រធានស្តីទីរបស់ការិយាល័យខាងលើបាននិយាយក្នុងសំបុត្រមួយដែលផ្ញើជូនលោក James Inhofe ដែលជាប្រធានគណៈកម្មាធិការយោធាព្រឹទ្ធសភាថា «សភាជាតិបានឲ្យដឹងច្បាស់ក្នុងរយៈពេលប៉ុន្មានថ្ងៃថ្មីៗនេះពីសារៈសំខាន់នៃការអនុម័តច្បាប់ក្នុងរយៈពេល២ឆ្នាំ ហើយពួកយើងនឹងសម្រេចគោលដៅនេះ»។
កាលពីសប្តាហ៍មុន ការិយាល័យខាងលើបាននិយាយថា ពួកគេនឹងត្រូវការពេលវេលាបន្ថែមក្នុងការអនុម័តការហាមឃាត់ដែលតម្រូវឲ្យក្រុមហ៊ុនផ្គត់ផ្គង់កាត់បន្ថយការទិញ និងប្រើប្រាស់ឧបករណ៍របស់ក្រុមហ៊ុន Huawei ។ ប៉ុន្តែលោក Vought បាននិយាយថា White House បានប្តូរគំនិតបន្ទាប់ពីកិច្ចសន្ទនាក្នុងពេលថ្មីៗជាមួយនឹងសភាជាតិ ។
ការហាមឃាត់នេះគឺជាផ្នែកមួយនៃការខិតខំរបស់សហរដ្ឋអាមេរិកក្នុងការប្រឆាំងនឹងក្រុមហ៊ុន Huawei Technologies Co Ltd ដែលជាក្រុមហ៊ុនផលិតឧបករណ៍ទូរគមនាគមន៍ធំជាងគេរបស់ពិភពលោក ។ ក្រុមហ៊ុននេះត្រូវបានចោទប្រកាន់ពីសហរដ្ឋអាមេរិកថា ប្រព្រឹត្តអំពើចារកម្ម និងរំលោភសិទ្ធិកម្មសិទិ្ធបញ្ញាជាដើម ។
Huawei បានបដិសេធនឹងការចោទប្រកាន់ថា ពួកគេត្រូវបានគ្រប់គ្រងដោយរដ្ឋាភិបាល យោធា ឬអង្គការចារកម្មចិន ។ ពួកគេបានដាក់ពាក្យបណ្តឹងប្រឆាំងនឹងរដ្ឋាភិបាលអាមេរិកផងដែរទាក់ទិននឹងការហាមឃាត់ទាំងនេះ ។
ច្បាប់ដែលសហរដ្ឋអាមេរិកចង់អនុម័តទាំងស្រុងក្នុងរយៈពេលពីរឆ្នាំហាមឃាត់ការប្រើថវិការដ្ឋាភិបាលក្នុងការទិញផលិតផលពីក្រុមហ៊ុន Huawei ព្រោះតែមូលហេតុផ្នែកសន្តិសុខ ។ វារួមមានការហាមឃាត់មិនឲ្យរដ្ឋាភិបាលអាមេរិកទិញឧបករណ៍ Huawei ដោយផ្ទាល់ ដែលនឹងចាប់មានប្រសិទ្ធិភាពក្នុងឆ្នាំនេះ ៕
ប្រភព ៖ reuters , កែសម្រួលដោយ ៖ សំណាង
ចែករំលែកព័តមាននេះ