សង្គ្រាមអ៊ុយក្រែន ៖ រដ្ឋមន្ត្រីការបរទេសរុស្ស៊ី លោកស័រហ្គេយឡាវរ៉ូវ ថ្លែងកាលពីថ្ងៃទី២៩ធ្នូ ថា ជំហរចរចារបស់ក្រុងមូស្គូនឹងផ្លាស់ប្ដូរ បន្ទាប់ពីដ្រូនអ៊ុយក្រែនវាយប្រហារនិវេសនដ្ឋានប្រធានា ធិបតីរុស្ស៊ី លោកវ្ល៉ាឌីមៀរពូទីន…
សង្គ្រាមអ៊ុយក្រែន ៖ រដ្ឋមន្ត្រីការបរទេសរុស្ស៊ី លោកស័រហ្គេយឡាវរ៉ូវ ថ្លែងកាលពីថ្ងៃទី២៩ធ្នូ ថា ជំហរចរចារបស់ក្រុងមូស្គូនឹងផ្លាស់ប្ដូរ បន្ទាប់ពីដ្រូនអ៊ុយក្រែនវាយប្រហារនិវេសនដ្ឋានប្រធានា ធិបតីរុស្ស៊ី លោកវ្ល៉ាឌីមៀរពូទីន នៅតំបន់ណូវហ្គោរ៉ូដ ។
លោកឡាវរ៉ូវថ្លែងទៅកាន់ទីភ្នាក់ងារ ព័ត៌មានរុស្ស៊ី INTERFAX ថា សកម្មភាពនោះ ពិតណាស់នឹងមិនអាចគ្មានការតបតវិញឡើយ ។ លោកចោទប្រកាន់អ៊ុយក្រែនថាបានប្រើដ្រូនរយៈឆ្ងាយ៩១គ្រឿង សំដៅនិវេសនដ្ឋានប្រធានាធិបតី ដែលគេហៅផងដែរវិមានVALDAI កាលពីយប់ថ្ងៃទី២៩ មក ៣០ ធ្នូ ។ លោកឡាវរ៉ូវមិនបានបញ្ជាក់ថា តើលោកពូទីនស្ថិតក្នុងនិវរសនដ្ឋាននោះ ពេលមានការវាយប្រហារដែរ ឬយ៉ាងណាឡើយ ។
ប្រធានាធិបតីអ៊ុយក្រែនលោកវ៉ូឡូឌីមៀរ ហ្សេឡេនស្គី មានប្រតិកម្មចំពោះការអះអាងនោះរបស់ក្រុងមូស្គូ ដោយចាត់ទុកថា ជាការភូតកុហកថ្មីរបស់រុស្ស៊ី ។ ថ្លែងទៅកាន់សារព័ត៌មានកាលពីរសៀលថ្ងៃទី២៩ ធ្នូ លោកហ្សេឡេនស្គីលើកឡើងថា ច្បាស់ណាស់កាលពីម្សិលមិញ យើងបានជួបជាមួយលោកត្រាំ ហើយវាក៏ច្បាស់ដែរថា សម្រាប់រុស្ស៊ីបើគ្មានរឿងអាស្រូវរវាងយើងនិងអាមេរិក ហើយយើងធ្វើឲ្យមានការរីកចម្រើន វាគឺជាបរាជ័យមួយសម្រាប់គេ ។ រុស្ស៊ីមិនចង់បញ្ឈប់សង្គ្រាមឡើយ ហើយគេអាចបញ្ចប់សង្គ្រាមបាន ទាល់តែធ្វើការគាបសង្កត់លើគេ ។ ខ្ញុំប្រាកដក្នុងចិត្តថា រុស្ស៊ីស្វែងរកហេតុផលនានា ។
ប្រធានាធិបតីអ៊ុយក្រែនក៏បានព្រមានផងដែរថា ការអះអាងរបស់រដ្ឋមន្ត្រីការបរទេសរុស្ស៊ី អាចជាលេស សម្រាប់បើកការវាយប្រហារថ្មីៗ ប្រឆាំងបណ្ដាគោលដៅស៊ីវិលនៅអ៊ុយក្រែន ក្នុងនោះ មានបណ្ដាអគាររដ្ឋាភិបាលនៅក្រុងគៀវ ។ ពេលនេះ គ្រប់គ្នាត្រូវតែប្រុងប្រយ័ត្ន ។ ការវាយប្រហារអាចលើរដ្ឋធានីគៀវ ហើយអាចជ្រើសរើសបណ្ដាគោលសមស្របនានា ដែលនោះជាការគំរាមកំហែងមួយ ។
លោកត្រាំរិះគន់ការវាយប្រហារនិវេសនដ្ឋានលោកពូទីន ប្រធានាធិបតីអាមេរិក លោកដូណាល់ត្រាំ កាលពីថ្ងៃទី២៩ ធ្នូ បានរិះគន់ការវាយប្រហាររបស់អ៊ុយក្រែនប្រឆាំងនិវេសនដ្ឋានរបស់លោកពូនទីន ដែលប្រធានាធិបតីអ៊ុយក្រែនបានបដិសេធ ។ លោកត្រាំថ្លែងថា នេះមិនមែនជាពេលវេលាល្អឡើយ ។ ខ្ញុំមិនចូលចិត្តបែបនេះទេ ។ វាមិនមែនជារឿងល្អនោះទេ ។ លោកបន្តថា វាជារឿងរសើបសម្រាប់ពេលនេះ ។ ការវាយប្រហារនោះវាហាក់ដូចជាការវាយប្រហារប្រឆាំងផ្ទះលោកដែរ ។
ទន្ទឹមនឹងនេះ អ្នកនាំពាក្យសេតវិមានលោកស្រីកាឡូរីនលីវីត គូសបញ្ជាក់នាថ្ងៃទី២៩ ធ្នូ ថា លោកត្រាំនិងលោកពូទីន បានជួបគ្នាតាមទូរស័ព្ទផ្ដោតលើការចរចាសន្តិភាពនៅអ៊ុយក្រែន។ លោកស្រីថ្លែងថា បន្ទាប់ពីជួបជាមួយប្រធានាធិបតីអ៊ុយក្រែននៅផ្លរីដា លោកត្រាំបានជួបពិភាក្សាគ្នាតាមទូរស័ព្ទជាមួយលោកពូទីន ដែលការសន្ទនាគ្នានោះមានលក្ខណៈវិជ្ជមាន ៕
ចែករំលែកព័តមាននេះ