ខេត្តបន្ទាយមានជ័យ ៖ គោទាំងហ្វូងៗដើរដេកយ៉ាងអនាធិបតេយ្យតាមលើផ្លូវជាតិ និងផ្លូវបេតុងក្នុងក្រុងប៉ោយប៉ែត ដែលអាចនិងបង្កជាបញ្ហាដល់អ្នកស្រុកខ្លះធុញទ្រាន់ ព្រោះបើកភ្នែកឡើងឃើញសុទ្ធតែលាមកគោពេញមុខផ្ទះ។
ករណីនេះបានកើតមានដដែលៗជាយូរមកហើយ ដែលមិនអាចលុបបំបាត់បាន បើទោះជាសមត្ថកិច្ចជំនាញបានចាប់យកគោមួយចំនួនទៅចងទុករកមុខម្ចាស់នៅអធិការដ្ឋាននគរបាលក្រុងប៉ោយប៉ែតដើម្បីអប់រំ ឬផាកពិន័យ និងធ្វើកិច្ចសន្យាម្តងម្កាលក៏ដោយ។
សមត្ថកិច្ចម្នាក់សុំមិនបញ្ចេញឈ្មោះនិយាយទាំងខឹងសម្បាថា គាត់បានរងរបួសស្រាលកាលពីយប់ថ្ងៃមួយក្នុងខែឧសភា ឆ្នាំ២០១៩ នៅលើដងផ្លូវជាតិលេខ៥ ក្នុងសង្កាត់ផ្សារកណ្តាល ក្រុងប៉ោយប៉ែត ព្រោះតែជិះម៉ូតូបុកគោដេកលើផ្លូវ ។
ក្រៅពីសមត្ថកិច្ចខាងលើ អ្នកធ្វើដំណើរផ្សេងៗទៀតក៏បានសម្តែងការខឹងសម្បាដូចគ្នាផងដែរ ព្រោះមួយរយៈកន្លងមកនេះ អគ្គិសនីដាច់ម្តងៗគាប់ជួនមេឃងងឹតពិតជាលំបាកដល់ពួកគាត់ខ្លាំង ព្រោះពេលខ្លះកំពុងបើកបរយានយន្តក៏វាក់នឹងហ្វូងគោដេកព្រោងព្រាតតាមផ្លូវស្ទើរជាន់ហ្វ្រាំងយានយន្តមិនជាប់។
បើទោះបីជានៅក្រុងប៉ោយប៉ែតខុសពីបណ្តាស្រុក-ក្រុងមួយចំនួនដែលបច្ចុប្បន្នផែននគរបាលចរាចរណ៍និងសណ្តាប់ធ្នាប់ក្រុងមួយនេះមានអធិការរងទទួលផែនខុសគ្នា២នាក់ (អធិការរងទទួលផែនចរាចរណ៌ និងអធិការរងទទួលផែនសណ្តាប់ធ្នាប់)ក្តី តែហ្វូងគោនៅតែដើរដេកយ៉ាងអនាធិបតេយ្យតាមដងផ្លូវមិនអាចលុបបំបាត់បានដដែល។
លោកឈឿន ប៊ុនថា អធិការរងទទួលផែនចរាចរណ៍នៃអធិការដ្ឋាននគរបាលក្រុងប្រាប់តាមទូរស័ព្ទថា បញ្ហាខាងលើនេះ លោកនឹងឲ្យប៉ុស្តិ៍រដ្ឋបាលពិនិត្យ និងតាមរកម្ចាស់គោដើម្បីអប់រំ។ លោកបន្តថាបើបង្កទៅជាគ្រោះថ្នាក់ចរាចរណ៍ធំដុំ លោកនឹងមានវិធានការចាប់គោរក្សាទុក ដើម្បីឲ្យម្ចាស់ចេញមុខដោះស្រាយ៕ (កែសម្រួលដោយ ៖ ធីតា)
ចែករំលែកព័តមាននេះ