រាជធានីភ្នំពេញ ៖ ក្នុងមួយរយៈចុងក្រោយ គេកត់សម្គាល់ថា អាជីពបើកតារាងបាល់តូចៗត្រូវបានដួលរលំជាបន្តបន្ទាប់ បន្ទាប់ពីបានក្លាយជាមុខរបរដែលអាចរកចំណូលបានកាក់កបខ្លាំងតែមួយប៉ប្រិចភ្នែក ។ ហេតុផលនៃការដួលរលំត្រូវបានគេអះអាងថា ដោយសារតែអ្នកនិយមជួលតារាងបាល់តូចៗដើម្បីលេង ងាកទៅលេងតែក្នុងតារាងបាល់ស្ដង់ដាជំនួស ស្របគ្នាដែលអ្នកនិយមលេងជាលក្ខណៈសប្បាយៗមានការថយចុះ និងបណ្ដាលមកពីទីតាំងដែលធ្លាប់ជួលបើកតារាងបាល់ សុទ្ធតែឡើងថ្លៃកប់ពពក ធ្វើឱ្យអ្នកជួលតស៊ូបន្តកុងត្រាលែងបាន។
កាលពីមួយរយៈមុន តារាងបាល់ទាំងតូចទាំងធំ ដែលត្រូវរៀបចំនៅត្រង់ប្រជុំជនទាំងនោះ ត្រួវគេបំពាក់ភ្លើងភ្លឺចិញ្ចាចអាចលេងបានដល់ម៉ោង១០យប់ដោយមិនភ័យពីរឿងសុវត្ថិភាព ឬងងឹតលេងមិនស្រួលនោះផង ។ ក្រុមយុវវ័យ រួមមានទាំងមនុស្សវ័យកណ្ដាលផង បានប្រមូលផ្ដុំគ្នារៃលុយលេងបាល់នៅក្នុងតារាងសិប្បនិមិត្តដែលមានផាសុកភាពក្នុងរូបភាពគគ្រឹកគគ្រេង ។ ចាប់ពីម៉ោង៣រសៀលតទៅគេឃើញអ្នកនិយមលេងបាល់ច្រើនឡើងជួបជុំគ្នានៅតាមតារាងបាល់ ដោយអ្នកខ្លះមានស្លៀកពាក់ជាឯកសណ្ឋានក្រុមណាមួយផង ដើម្បីចូលលេងក្នុងតារាង ខណៈដែលក្រៅពីបង្ហាញពីការរីកចម្រើនក៏មានបញ្ហាអវិជ្ជមានខ្លះៗកើតឡើងផងដែរសម្រាប់ក្មេងៗដែលញៀនញ៉ាមនឹងការលេងកីឡាមួយនេះនៅក្នុងតារាងដែលបានបង្កើតឡើង ។
អ្នកទាំងនោះច្រើនបែងចែកជាក្រុមម្ខាងម្នាក់ ដោយមានការសន្មតគ្នាថាបើក្រុមណាចាញ់គឺចែកគ្នាចេញថ្លៃតារាង ឬមានការប្រកួតភ្នាល់ដាក់លុយតែម្ដង ដោយក្រុមកំណត់ចំនួនតាមគ្រាប់បាល់ ឬស្ថានភាពចាញ់ឈ្នះអាស្រ័យទៅលើការព្រមព្រៀង។ យ៉ាងណាមិញពួកគេមិនលេងភ្នាល់គ្នាក្នុងទ្រង់ទ្រាយធំនោះទេ គឺគ្រាន់តែដើម្បីបង្កើនការប្រឹងប្រែង និងដើម្បីអោយអ្នកឈ្នះមានទឹកចិត្តលេងដោយសារតែមិនអស់ថ្លៃតារាង និងអាចទទួលបានថវិកាខ្លះៗ ត្រឡប់ទៅវិញប៉ុណ្ណោះ ។
យុវវ័យទាំងនោះបានអះអាងថា ដោយសារតែកំណើនតារាងបាល់ហើយតារាងទាំងនោះក៏មានទីតាំងអំណោយផលផង ទើបចេះតែបំផុសអោយពួកគេមានគំនិតចង់ប្រកួតបាល់ទាត់ ក្នុងបំណងហាត់ប្រាណដើម្បីសុខភាពផង និងដើម្បីបានជួបជុំគ្នាសប្បាយៗផង ។ ម្នាក់ៗសុទ្ធតែយល់ឃើញថាកីឡានាំមកនូវសុខភាព តែថាហេតុផលដែលយុវវ័យភាគច្រើនផ្ដោតលើការជុំគ្នាលេងបាល់គឺដោយសារតែកំណើនតារាងបាល់លេចឡើងព្រោងព្រាតស្ទើរតែគ្រប់កន្លែងដែលធ្វើអោយអ្នកទំនេរពីការងារ និងពីការសិក្សាចង់ជួបជុំគ្នាលេងបាល់នោះឯង ។ ផ្អែកតាមការបញ្ជាក់តម្លៃតារាងត្រូវគេគិតជាម៉ោង ដោយមួយម៉ោងពី១០ដុល្លារទៅ១៨ដុល្លារសម្រាប់តារាងតូច និងពី២០ដុល្លារទៅ៥០ដុល្លារក៏មានសម្រាប់តារាងធំដែលអាចលេងបានគ្នា១១នាក់ម្ខាងៗ។
តារាងតម្លៃនេះ មានការប្រែប្រួលអាស្រ័យទៅតាំងទីតាំង និងអំឡុងពេលមានមនុស្សទៅលេងច្រើន ប៉ុន្តែតារាងដែលមានតម្លៃធូរថ្លៃក៏ត្រូវបានគេនិយមទៅលេងភាគច្រើនផងដែរ បើទោះជាទីតាំងស្ថិតនៅកន្លុកកន្លៀតបន្តិចក្ដី។ យ៉ាងណាមិញ ទីតាំងតូចៗទាំងនោះ ត្រូវបានបិទទ្វារបណ្ដាក់គ្នាដោយសារតែហេតុផលអ្នក លេងថយចុះ។
លោកសីហា ម្ចាស់តារាងបាល់នៅខណ្ឌសែនសុខ ជិតសាកលវិទ្យាល័យIU ដែលទើបបិទចោលតារាងបាល់ បានអះអាងថា ក្រោយបើកដំណើរការតារាងបាល់ប្រមាណជាង១ឆ្នាំលោកកត់សម្គាល់ថាចំនួនអ្នកមកលេងបាល់មានការថយចុះរហូតដល់ថ្នាក់មិនអាចបន្តអាជីវកម្ម។
លោកសម្រេចចិត្តចោលតារាងបាល់ទាត់ ដោយសារតែហេតុផលចំណូលដែលធ្លាប់បានខ្ពស់ ធ្លាក់ដល់កម្រិតទប់ការចំណាយលែងជាប់ ស្របពេលដែលលោកយល់ថាមុខរបរមួយនេះ បើចង់ឈរជើងបន្ត លុះត្រាតែស្ថិតក្នុងទីតាំងអំណោយផល និងត្រូវរៀបចំអោយក្លាយជាតារាងធំស្ដង់ដា ហើយត្រូវមានអាជ្ញាកណ្ដាល ចាត់ចែងការប្រកួតអោយក្រុមនីមួយៗផង។
កាលពីមុនលោកគាំទ្រអោយបើកតារាងបាល់ ដោយអះអាងថា ដើម្បីអាចបើកអាជីវកម្មនេះបានលុះត្រាតែមានដើមច្រើនគួរសម ហើយត្រូវមានទីតាំងច្បាស់លាស់ក្នុងការរកស៊ីទៅទៀត ដោយសារតែមុខរបរនេះបើកុងត្រារកដីជួលមិនបានចាប់ពី៣ឆ្នាំឡើងទៅទេ គឺមិនចំណេញច្រើន ។ ក្នុងនោះចំណាយតែលើការដំឡើងតារាង និងរៀបចំស្មៅសិប្បនិមិត្ត ប្រហែលជាង១ម៉ឺនដុល្លារ ហើយកែកុនអោយមានកន្លែងចតរថយន្ត មានសំណាញ់ការពារបាល់ និងដំឡើងភ្លើងគឺជាការស្រេច ។
លោកថា មុខរបរមួយនេះបើអាចទៅរួចគឺត្រូវចូលគ្នា ហើយត្រូវតែរកតែដៃគូដែលមានចំណូលចិត្តលើមុខរបរបើកតារាងបាល់ដូចគ្នាទើបអាចទៅរួច ។ ប៉ុន្តែនៅក្នុងពេលនេះ លោកថាមុខរបរតារាងបាល់ គឺដូចតែយកដើមទុនបោះចោលអុីចឹង ដោយបើរៀបចំមិនបានល្អ គឺនឹងគ្មានអ្នកមកលេងនោះទេ ហើយតារាងនៅក្នុងពេលនេះ ក៏បើកមិនចំណេញនោះដែរ ដោយសារដីជួលក្នុងទីប្រជុំជនថ្លៃ អ្នកលេងត្រូវការស្ដង់ដាខ្ពស់ ហើយក៏មិនសូវមានអ្នកលេងផុលផុសដូចមុននោះដែរ។
មិនខុសគ្នាដែរ ម្ចាស់តារាងបាល់ដែលបានបិទចោលផ្សេងទៀត ក៏អះអាងថា បើចង់រកស៊ីបើកតារាងបាល់ដូចមុន គឺលុះត្រាតែប្រើដើមធំ រកដីធំ និងមានសេវាច្រើនយ៉ាង ។ ម្នាក់ៗនិយាយថា មនុស្សកាន់តែទំនើប តារាងបាល់ដែលបានបង្កើតឡើងមិនអាចលំៗដូចមុនកើតទេ ជាពិសេសនៅក្នុងកាលៈទេសៈ ដែលមនុស្សចាប់ផ្ដើមចង់លេងតែក្នុងតារាងធំ ស្ដង់ដាហើយលែងចង់លេងតារាងតូចៗ ។ យ៉ាងណាមិញសម្រាប់អ្នកបើកតារាងស្ដង់ដា គឺមានការកក់គូប្រកួតរាល់ថ្ងៃនៅក្នុងពេលនេះ គឺអាចច្រើនជាងមុនដាច់ឆ្ងាយ ដោយសារតែតារាងតូចៗបិទចោល ហើយមនុស្សរត់ទៅសម្រុកតែក្នុងតារាងធំៗជាជំនួស៕ (កែសម្រួលដោយ ៖ បុប្ផា)
ចែករំលែកព័តមាននេះ